zero media family planning adv

पृथ्वीनारायण शाहयात थुकलं बिइगु ‘छ्याकः ल्वहँ’ थ्वहे खः

नेवा: अनलाइन न्युज – ललेन्द्र शाक्य | २०७२ पौष २७, सोमबार ११:२३:३८

ललेन्द्र शाक्य

थौं आदिवासी जनजातिपिन्सं कथित राष्ट्रिय एकता दिवसया नामय् हाकू न्हि हनाच्वंगु दुसा अथेहे किपुली नं पृथ्वीनारायण शाह क्रुर शासक जूगु धासें किपूया ३ वडा गलेच्वंगु छ्याकः ल्वहँतय् ई फानाः थुकलं बिइगु ज्याझ्वः तःगु दु ।

नेवाः प्रदेशय् आदिवासी जनजाति जागरण अभियानया न्हापांगु चरणया ज्याझ्वः क्वचायेकेगु कथं किपूया ऐतिहासिक लाय्कू (दरबार स्क्वायर)य् थौं न्हिनसिया २ ता इलय् छगू सभा याइगु ज्याझ्वः तयातःगु दु । थुगु सभालिपा किपू नपा–३ वडाय् च्वंगु छ्याकः ल्वहँतय् वयाः ई फानाः थुकलं बियाः अभियानया न्हापांगु चरणया ज्याझ्वः क्वचायेकेगु ग्वसाः ग्वयातःगु दु ।

थ्वहे झ्वलय् थौं हे आदिवासी जनजाति राष्ट्रिय आन्दोलन नेपालं थौं पुस २७ गतेयात हाकू न्हिया रुपं हनेत येँया रत्नपार्कय् च्वंगु शान्तिवाटिकाय् तःजिगु हाकू न्हि सभा ज्याझ्वःया ग्वसाः ग्वयातःगु दु ।

(किपूया ३ वडा चिथु गले च्वंगु छ्याकः ल्वहँ)

छु खः किपुली च्वंगु ‘छ्याकः ल्वहँ’

किपू नगरपालिका ३ वडा, चिथु त्वाः, मंगल उच्च मा.वि.या लिक्क च्वंगु छ्याकः ल्वहँयात किपूया बासीपिन्सं विशेष महत्व बियाः सदियौंनिसें न्ह्याम्ह मनूत वःसा उगु ल्वहँतय् ई फायेगु चलन न्ह्यानाः वयाच्वंगु खः । अनया बुढापाकापिन्सं उगु छ्याकः ल्वहँया विषयसं जानकारी ब्यूगु कथं उगु छ्याकः ल्वहँ शाह जुजुपिनिगु लाय्कू (राजदरबार) व पृथ्वीनारायण शाहलिसे स्वानाच्वंगु दु धैगु सीदूगु दु ।

पृथ्वीनारायण शाह नं किपू देय् त्याकेत १२ दँ ई बिकूगु खः । किपुमिपिंलिसे न्हापांगु लँडाईस  बांमलाक्क बुत । हाकनं निक्वःगु लडाई जुल, पृथ्वीनारायण शाह थःगु ज्यान बचे यानाः बिस्यु वन । अले झिंनिदँया ई लिपा हाकनं पृथ्वीनारायणं स्वक्वःगु लडाई यात । तर थुगु लडाईलय् पृथ्वीनारायणं छलकपट यानाः लडाईया नियम अःखतं आक्रमण यानाः किपू देय् थःगु ल्हाःतय् काःगु खःसा किपूमिपिन्त तच्वकं सास्ती ब्यूगु खँया नं इतिहास दु । गथेकि किपुमिपिनिगु न्ह्याय् ध्यंगु इतिहास दु । मिजंपिं नापलाक्वसित तरवारं पालाः स्याःगु व ल्यासेपिन्त बलात्कार यानाः हत्या याःगु इतिहास नं दु ।

 (किपूया ३ वडा चिथु गले च्वंगु छ्याकः ल्वहँ)

 थ्वहे क्रुर शासकया क्रुर व्यवहारयात थुकलं बिइगु कथं उगु छ्याकः ल्वहँतय् ई फानाः थुकलं बिइगु यानाः वयाच्वंगु खः । यानि कि पृथ्वीनारायण शाहयात थुकलं बिइगु यानाः वयाच्वंगु खः ।

अले हाकंनं मेगु खँ, किपूया उत्तरपत्ति शाह जुजुपिनिगु राजदरबार खनेदु । वहे राजदरबारय् शासन याइपिन्त ई फानाः थुकलं बिइगु चलन सदियौंनिसें न्ह्याना ः वयाच्वंगु खः । छाय्कि शाह जुजु पृथ्वीनारायणं आमने सामने च्वनाः लडाई यायेगु आँट मदयाः छलकपट व लडाईया नियम अःखः पलाः छिनाः किपू देय्यात थःगु ल्हातलय् काःगु हुनिं किपुमिपिनिगु मिखां पृथ्वीनाराण कुतुं वंगु खः । थुकिया प्रमाण धैगु छ्याकः ल्वहँतय् ई फानाः थुकलं बिइगु चलन न्ह्यानाः वयाच्वंगु खः । थ्व चलन थौंतक नं न्ह्यानाच्वंगु दनि ।

Categorized in नेवाः