Newa Ekata Diwas Gosthi Adv

पूर्व गोलकिपर शाही मन्त

नेवा: अनलाइन न्युज – ललेन्द्र शाक्य | २०७७ पौष २७, सोमबार १४:४२:५९

नेपाली राष्ट्रिय फुटबल टोलीया पूर्व गोलकिपर व अखिल नेपाल फुटबल संघ (एन्फा)या पूर्व महासचिव लोकबहादुर शाही आकाझाकां मन्त । शाही ६५ दँया उमेरय् आइतवाः बहनी मदुगु खः ।

ताःई न्ह्यःनिसें थीथी ल्वचं पीडित जुयाच्वंम्ह शाही दैलेखया चौडत्ताय् च्वंगु छेँय् मदुगु एन्फाया नायः कर्माछिरिंग शेर्पां जानकारी ब्यूगु दु । मदुम्ह शाहीया थौं सोमवाः दाहसंस्कार जूगु छेँजः श्रोतं जानकारी ब्यूगु दु । शाही सन् १९७९ निसें १९८९ तक राष्ट्रिय टोलीया गोलकिपर जूगु खः ।

सन् १९८४ स नेपालय् हे जूगु न्हापांगु साफय् नेपालं स्वर्ण पदक त्याकूबलय् शाही टोलीया महत्वपूर्ण कासामि खः । शाहीं प्यक्वःतक साफ कासा म्हितूगु दु । सन् १९८२ स ९ क्वःगु एसियाली खेलकुद म्हितूबलय् नं शाही गोरकिपर जूगु खः । शाहीं सन् १९८९ स राष्ट्रिय टोलीपाखें सन्यास काःगु खः ।

शाही २०५२ सालय् गणेश थापा एन्फाया नायः जूबलय् महासचिवय् निर्वाचित जूगु खः । लिपांगुखुसि शाही नेपाल बक्सिंग संघया तकं महासचिव जूगु खः।

बि.सं. २०७० स नेपाल आइस हक्की संघ पलिस्था जूबलय् शाही संघया संस्थापक नायः पदय् च्वनादीगु खः ।

Categorized in कासा