nepal investment baink

पूर्वराष्ट्रपति ओबामालिसें न्यासःम्ह अमेरिकीपिन्त रुसी प्रतिबन्ध

नेवा: अनलाइन न्युज – ललेन्द्र शाक्य | २०८० जेठ ७, आइतबार ११:४२:३५

अमेरिकां थःपिन्त लादेयाःगु नाकाबन्दीया प्रतिकार यासें रुसं पूर्वअमेरिकी राष्ट्रपति बाराक ओबामालिसें न्यासःम्ह उच्च पदस्थ अमेरिकी नागरिकपिन्त रुसं प्रतिबन्ध तःगु दु ।

रुसी विदेश मन्त्रालयं पूर्वराजदूत जन हन्टस्म्यान, सिनेटरपिं लिसें प्रख्यात टेलिभिजन ज्याझ्वः न्ह्याकामि जिम्मी किम्मेल, कोलवर्ट, सेथ मेइर्स लिसेंया  अमेरिकी नागरिकपिन्त रुस प्रवेशय् निषेध याःगु केबल न्युज नेटवर्क (सीएनएन)पाखें जानकारी ब्यूगु दु ।

‘वासिङ्टनया दुर्भावनापूर्ण फुक्क पलाःया लिसः मस्कों बिइ, थ्व खँ वयात ज्ञान जुइमा’ रुसी विदेश मन्त्रालयं अमेरिकी नागरिकपिन्त तःगु प्रतिबन्धय् धयातःगु दु ।

थ्यंमथ्यं झिंन्याला (१५ महिना)निसें रुस व युक्रेनदथुइ युद्ध जुयाच्वंगु दु । अमेरिकालिसें पश्चिमा देसं युक्रेनयात जूगु रुसी हमलाया निन्दा यासें मस्कोयात आर्थिक नाकाबन्दी याःगु दु । छुं महिना न्ह्यःनिसें रुसी पलाःया विरोध यासें हलिंया १४१ गू देसं युक्रेनयात जूगु हमला अविलम्ब अन्त्य जुइमाःगु राष्ट्रसंघीय प्रस्तावया पक्षय् मतदान याःगु खः ।

Categorized in अन्तर्राष्ट्रिय