coved ad

पुस ९ गते शुक्रवाः इतुंबहालय् महापरित्राण पाठ ज्याझ्वः जुइगु

नेवा: अनलाइन न्युज – ललेन्द्र शाक्य | २०७८ मङ्सिर २३, बिहिबार १२:१८:०१

बुद्ध शान्त पार्क निर्माण समिति व नवलपरासी गैंडाकोट ३ केलाडीइ च्वंगु थुगु हे समितिया शाखा ज्याकूया ग्वसालय् वइगु बुद्ध संवत २५६४ (पुस ९ गते) शुक्रवाः महापरित्राण पाठ ज्याझ्वः जुइगु जूगु दु ।

येँया २४ वडा इतुंबहालय् जुइगु उगु महापरित्राण पाठ श्रद्धेय भिक्षु संघपाखें सकल प्राणीया कल्याण व मंगल कामनालिसें जुइगु जानकारी ग्वसाः खलः बुद्ध शान्त पार्क निर्माण समितिं ब्यूगु दु । थुगु हे महापरित्राण पाठ माघ ३ गते सोमवाः चितवनया बुद्धपार्क नारायणी खुसि सिथय् जुइगु जानकारी नं ब्यूगु दु ।

‘दान यायेनु, पुण्य कमेयायेनु’ धैगु नारा थ्वयेकाः पुस ९ गते जुइगु उगु महापरित्राण पाठ सुथसिया ६ ता इलंनिसें न्ह्याइगु जानकारी नं ग्वसाः खलकं ब्यूगु दु ।

उगु महापरित्राण पाठ ज्याझ्वलय् सुथसिया ६ ता ईनिसें ७ ता ईतक जलपान, सुथसिया ७ ता ईनिसें ७ः३० ता ईतक ज्ञानमाला भजन, सुथसिया ७ः३० ईनिसें ८ ता ईतक शोभा यात्रा मण्डप प्रवेश, सुथसिया ८ ता ईनिसें ८ः३० ता ईतक बुद्धपूजा, सुथसिया ८ः३० ता ईनिसें ९ः३० ता ईतक धर्मदेशना, सुथसिया ९ः३० ता ईनिसें ११ ता ईतक सामुहिक पाठ, सुथसिया ११ ता ईनिसें १२ ता ईतक भोजन दान, न्हिनसिया १२ ता ईनिसें १ ता ईतक आगन्तुकपिन्त भोजन, न्हिनसिया २ ता ईनिसें ३ ता ईतक दान प्रदान, न्हिनसिया ४ ता ईनिसें ४ः१५ तक अष्ट परिष्कार दान, न्हिनसिया ४ः१५ ता ईनिसें ४ः३० ता ईतक पुण्यानुमोदन व न्हिनसिया ४ः३० ता ईनिसें सनिलया ५ ता ईतक चियापान व जल सुत्रका प्रदान जुइगु जानकारी ग्वसाः खलकं ब्यूगु दु ।

थुगु महापरित्राण पाठ ज्याझ्वःया नितिं येँ महानगरपालिका, येँ मनपा वडा ल्याः २४ ज्याकू, केशचन्द्र पार्वत महाविहार, इतुंबहाः सुधार समिति, महादेव मखन क्लब, नेवाः पुचः चितवन ग्वाहालिमि संस्था कथं न्ह्यःने वःगु दु ।

Categorized in स्थानिय-समाज