Header Nepal rastra bank Adv

पुस १५ गते बिहिवाः कीर्तिपुर सिंगिङ आइडल ११४२ या बिजं कासा, तयारी तीव्र

नेवा: अनलाइन न्युज – ललेन्द्र शाक्य | २०७८ पौष १५, बिहिबार ००:५६:१८

पाल संवत ११४२ थिंलागा एकादसी (पुस १५ गते) बिहिवाः किपू नगरपालिकां ग्वसाः ग्वःगु कीर्तिपुर सिंगिङ आइडल ११४२ या बिजं कासाः (फाइनल कासा) जुइगु जूगु दु ।

बिहिवाः न्हिनय् २ ता ईनिसें किपूया पांगाय् च्वंगु कीर्तिपुर सिनेप्लेक्स हलय् जुइगु उगु कीर्तिपुर सिंगिङ आइडल ११४२ या बिजं कासाय् किपू नगर दुनेया झिम्ह न्हूप्रतिभा कासामिपिं टप टेनय् थ्यंगु खःसा उपिं हे टप टेनपिनिगु दथुइ धेंधेंबल्ला जुइगु जानकारी आइडलया कजि हरिशरण सायमिं जानकारी बियादीगु दु ।

कासामिपिन्सं नेपालभाषा व खस नेपाली भाषाया यानाः निपू म्ये हालेमाःगु प्रावधान तयातःगु दु । थ्व ल्याखं झिम्ह कासामिपिन्सं म्हतिं निपू निपू यानाः ज्याझ्वलय् २० पू म्ये स्वकुमिपिन्सं न्यनेदइगु जूगु दु । थुगु कासाय् निम्ह गैरनेवाः कासामिपिं दुथ्याःगु दु । उमिसं नं नेपालभाषाया म्ये हालीगु जूगु दु ।

 

ज्याझ्वलय् किपू नगरपालिकाया मेयर रमेश महर्जन, उपमेयर सरस्वती रिजाल खड्कालिसें येँ महानगरपालिकाया मेयर विद्यासुन्दर शाक्य, मध्यपुरथिमि नगरपालिकाया मेयर मदनसुन्दर श्रेष्ठलिसें नेपाल सरकारया थीथी ख्यःया उच्च ओहोदाया व्यक्तित्वपिनिगु उपस्थिति दइगु जानकारी ग्वसाः खलः किपू नगरपालिकां ब्यूगु दु ।

 

अथेहे, स्रोतया पाखें सीदूगु कथं ज्याझ्वलय् ख्यालिजुजु मदनकृष्ण श्रेष्ठया नं विशेष उपस्थिति दइगु जानकारी वःगु दुसा आपालं संगीत ख्यःया दिग्गज व्यक्तित्वपिनिगु उपस्थिति नं दइगु जानकारी ग्वसाः खलकं ब्यूगु दु ।

कीर्तिपुर सिंगिङ आइडल ११४२ या थ्व स्वंगूगु चरणया लिपांगु फाइनल ज्याझ्वः खः । थुगु कासाय् प्रतियोगीपिन्सं लाईभ ब्याण्ड म्यूजिकय् थःपिनिगु सांगितिक ब्वज्या याइगु जूगु दु । फाइनल ज्याझ्वःया नितिं किपूया नेपालभाषा एकेदेमिया हलय् बुधवाःतक नं रिहर्सल जूगु खःसा हलया सकतां तयारी क्वचायेधुंकूगु जानकारी ग्वसाः खलकं ब्यूगु दु ।

 

कीर्तिपुर सिंगिङ आइडल ११४२ स्वयेगु नितिं ग्वसाः खलकं कीर्तिपुर नगरपालिकां पासया व्यवस्था यानातःगु दु । ज्याझ्वलय् टप टेन प्रतियोगीपिनिगु लिसेलिसें पाहाँ कलाकारपिनिगु नं सांगितिक व सांस्कृति ब्वज्या जुइगु जानकारी नं ग्वसाः खलकं ब्यूगु दु ।

Categorized in कला