नेवा: अनलाइन न्युज – ललेन्द्र शाक्य | २०७७ पौष २७, सोमबार १२:५४:५३

बंगलादेशय् जुयाच्वंगु बंगबन्ध शेख मुजिब म्याराथनय् नेपाःया पुष्पा भण्डारीं भारतीय कासामियात ल्यूने लाकाः स्वर्ण पदक त्याकूगु दु ।

ढाकाय् म्हिगः आइतवाः जूगु दक्षिण एसियाली क्षेत्रया म्याराथनय् पुष्पा भण्डारीं निर्धारित दूरी निघौ ५९ मिनेट ४१ सेकेण्डय् पूवंकाः स्वर्ण पदक त्याकूगु खः ।

उगु धेँधेँबल्ला कासाय् भारतया ज्योति गवातीं रजत पदक त्याकूगु खः । वं निर्धारित दूरी स्वघौ ४६ सेकेण्डय् पूवंकूगु खः । उगु कासाय् भारतया हे गिगमत डोल्मां स्वघौ ९ मिनेटय् निर्धारित दूरी पूवंकाः कास्य पदक त्याकूगु खः । वंगु दँ नेपालय् क्वचाःगु १३ क्वःगु दक्षिण एसियाली खेलकुद (साग)य् पुष्पा भण्डारीं म्याराथनय् रजत पदक जक त्याकूगु खः ।

पुष्पा भण्डारी विभागीय टोली सशस्त्र प्रहरी बलया एपीएफ क्लबय् आबद्ध जुयाच्वंगु दु । मिजं म्याराथनय् नेपाःया किरणसिंग बोगटी हःपाः जूगु दु । बोगटीं निर्धारिरत दूरी निघौ २४ मिनेट  १३ सेकेण्डय् पूवंकूगु खः । ब्वां वनेगु झ्वलय् बोगटी घाःपाः जुइधुंकाः ब्वां वनेगुलिं ल्यूने लाःगु प्रशिक्षक धनीराम चौधरीं जानकारी ब्यूगु दु ।

वं १३ क्वःगु सागय् धाःसा म्यारथनय् स्वर्ण पदक त्याकूगु खः । उगु स्पर्धाय् भारतया बहादुर सिंहं निर्धारित दूरी निघौ २१ मिनेट ४० सेकेण्डय् पूवंकाः स्वर्ण पदक त्याकूगु खः । भारतया हे राजपाल सिंह निघौ २१ मिनेट ४१ सेकेण्डय् दूरी पूवंकाः रजत पदक व भारतया रवि प्रकाश निघौ २५ मिनेट २३ सेकेण्डया इलय् ब्वाकासा पूवंकाः कास्य पदक त्याकूगु खः ।

Categorized in कासा