ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

पुष्पलाल श्रेष्ठया बःचाधंगु म्हसीका

नेवा: अनलाइन न्युज – ललेन्द्र शाक्य | २०७८ श्रावण ७, बिहिबार ११:१९:५७

नेपाल कम्युनिष्ट पार्टीया संस्थापक नेता पुष्पलाल श्रेष्ठ वि.सं. १९८१ असार १५ गते पूर्व २ नम्बर रामेछाप जिल्लाय् अबु भक्तलाल व मां तुलसीकुमारीया दातिम्ह (माहिलाम्ह) काय् जुयाः बूगु खः ।

अबु भक्तलाल श्रेष्ठ २००९ सालया अखिल नेपाल न्यून वैतनिक सरकारी कर्मचारीपिनिगु हडतालया झ्वलय् एक्सन कमिटीया नायः जूम्ह खः । वि.सं. १९९७ सालय् थः दाजु अमर शहीद गंगालाल श्रेष्ठयात गोली क्ययेकाः स्याये पायछि छन्हु न्ह्यः भद्रगोल जेलय् सकल छेँजःपिं नापलाः वंबलय् गंगालाल श्रेष्ठं पुष्पलाल श्रेष्ठयात ‘माईला, जिं प्रजातन्त्रया निमित्त च्याकागु पाल्चायात छं प्रज्ज्वलित यायेमाः’ धकाः धाःगु खः व दाजुया थ्वहे खँग्वः हे पुष्पलालया नितिं राजनीतिइ दुहाँ वयेगु प्रेरणाया श्रोत जुल ।

वि.सं. १९९८ सालय् पुष्पलाल श्रेष्ठं नेपालभाषा ख्यःया भाषानिभाः प्रेमबहादुर कसाःलिसें शम्भुराम श्रेष्ठ, सूर्यबहादुर भारद्वाज व राजारामलिसे छप्पं जुयाः नेपाली प्रजातान्त्रिक संघ नीस्वंगु खः । संघय् दुपिं दुजःपिन्सं थःथःगु हिं प्रतिज्ञा पत्रय् सही यानाः पार्टीइ जुइमाःगु नियम खः । संघं राणाशासनया विरोध यायेगु, विद्यालयत चायेकाः थीथी कथंया (सिपमूलक तकं) तालिम बिइगु खः । 

भारतय् नं राणाविरोधी क्रियाकलाप अप्वयेकूम्ह पुष्पलालं वि.सं. १९९७ सालनिसें बन्दी जीवन बितेयानाच्वंपिं नेपाल प्रजा परिषदया नेतापिंलिसे गोप्यरुपं स्वापू तयाः टंकप्रसाद आचार्य लिसेंया मेमेपिं नेतापिनिगु नेललिसेंया किपाः सन् १९४२ य् भारत, पटनापाखें पिदनीगु ‘जनता’ पत्रिकाय् पिथनेत ग्वाहालि यात ।

२००४ सालय् नेपाली राष्ट्रिय कांग्रेसं नागरिक अधिकारया नितिं याःगु आन्दोलनया नेतृत्व पुष्पलाल श्रेष्ठ, शम्भुराम श्रेष्ठ, स्नेहलता श्रेष्ठ, साहना प्रधान आदिपिन्सं यात । जनतापाखें याःगु थ्व न्हापांगु जनआन्दोलनया हुनिं पद्म शमशेरं सुधारया पलाः न्ह्याकेगु घोषणा यात ।

मार्क्सवाद–लेनिनवादयात सर्वोत्तम विचारधारा तायेकाः २००६ सालय् कलकत्ताय् पुष्पलालं नेपाल कम्युनिष्ट पार्टीया पलिस्था यात । २००६ सालय् भारतया कलकत्ताय् भारत कम्युनिष्ट पार्टीया नेता अजय चक्रवर्तीलिसेया नापलाये ज्यां पुष्पलालया जीवनय् न्हूगु मोड हल । उगु इलय् पुष्पलाल पश्चिम बंगलाया वर्तमान मुख्यमन्त्री ज्योति बसुया लिक्क लाःम्ह खः । पुष्पलालं नेपालय् साम्यवादी विचारधाराया व्यापक प्रचारप्रसार यायेत ‘कम्युनिष्ट पार्टीया घोषणापत्र’ खस नेपाली भाषां अनुवाद यात । सम्भवतः नेपाली भाषाया दकले न्हापांगु साम्यवादी साहित्य थ्वहे खः । 

पुष्पलाल श्रेष्ठया ब्याहा नेकपा एमालेया नेतृ साहना प्रधानलिसे जुल । २०१५ सालया आमनिर्वाचनय् बन्दीपुर, २०१७ सालय् पार्टी प्रभाव विस्ता यायेत तेह्रथुम –लिम्बुवान) बजारय् थ्यंकल । २०१६ सालय् पुष्पलाल श्रेष्ठं सोभियत संघय् जूगु कम्युनिष्ट अन्तर्राष्ट्रिय सम्मेलनय् ब्वति कयाः वहे दँ चीन भ्रमण याःगु खः ।

२०१७ साल पुष १ गते जुजुपाखें न्ह्याकूगु पलाः लिपा भूमिगत व निर्वासित जीवन बितेयायेत बाध्य पुष्पलाल श्रेष्ठं प्यख्येंरं छरेजुयाच्वंपिं कम्युनिष्टपिन्त भेला यानाः स्वक्वःगु महाधिवेशन यात ।

नेपाली कांग्रेस व कम्युनिष्ट छप्पं जुयाः संघर्ष याःसा जक नेपालय् निरंकुश पंचायती व्यवस्था समाप्त जुइफु धैगु भविष्यवाणी याःम्ह नेता पुष्पलाल श्रेष्ठ २०३५ साल साउन ७ गते भारतया न्हूदिल्लीइ च्वंगु अल इण्डिया मेडिकल इन्स्टिच्युटय् वासः यायेगु झ्वलय् मदुगु खः ।

Categorized in राजनीति