zero media family planning adv

पुल्चोक झडपया जिम्मेवारी राज्यं कायेमा : गुथि विधयेकविरुद्ध एकीकृत आन्दोलन

नेवा: अनलाइन न्युज – Rakesh Maharjan | २०७७ भाद्र २२, सोमबार १३:१९:२८

येँ – बुंगःद्यः सालेगु झ्वलय् यलया पुल्चोकय् जूगु अप्रिय घटनाया जिम्मेवारी राज्यं कायेमाःगु खँ गुथि विधयेकविरुद्ध एकीकृत आन्दोलनं धाःगु दु ।

गुथिया कजि डा. महेशमान श्रेष्ठया ल्हाःचिं तयाः सोमवाः पिथंगु विज्ञप्तिइ मूल रुपं राज्य, स्थानीय प्रशासन व गुठी संस्थानया अकर्मण्यता व गैरजिम्मेवारीं उगु घटना जूगु न्ह्यथनातःगु दु ।

विज्ञप्तिइ पदीय दायित्व खःकथं पूवंकेमफुम्ह अक्षम ललितपुर प्रमुख जिल्ला अधिकारी लिसें गुथि संस्थानया नायःतय्त याकनं हे कारबाही यायेमाःगु माग नं यानातःगु दु ।

अथे हे, रथयात्राया झ्वलय् पुलिसं ज्वनाः मखुगु अभियोग तयाः मुद्दा न्ह्याकेत्यंगुलिं उकिया घोर विरोध यासें ज्वनातःपिं सकसितं याकनं हे त्वःतेमाःगु माग नं गुथिं याःगु दु ।

गुथि व रैथानेतय् सम्पदा, संस्कृतियात कयाः राज्यं न्ह्याकाच्वंगु अनुचित हस्तक्षेप व नियन्त्रणया लिच्वलं बुंगःद्यःया रथयात्रा व जात्राय् जटिलता खनेदुगु खँ नं विज्ञप्तिइ न्ह्यथनातःगु दु ।

विज्ञप्तिइ धयातःगु दु, ‘आदिवासी रैथाने समुदायं दयेकातःगु अले म्हालासाला यानातःगु जात्रा, पर्व, रिति, परम्पराया ज्याय् उमित हे स्वतन्त्रता व स्वायत्तता बीमाःगु अन्तर्राष्ट्रिय मान्यता व प्रचलन दु । तर नेपाल सरकारं आः क्यनाच्वंगु पहः धाःसा गुथि थेंजाःगु प्रथायात बीमा स्वायत्तताया मूल्यमान्यता अःखः दु ।”

विज्ञप्तिइ गुथियात प्रथाया हैसियत बिइमाःगु व गुथि न्ह्याकीपिं समुदायतय्त पूर्ण स्वायत्ततता व स्वतन्त्रता बीमाःगु माग नं यानातःगु दु ।

 

 

Categorized in नेवाः