Newa Ekata Diwas Gosthi Adv

पुलांम्ह म्येहालामिया न्हूगु म्युजिक भिडियो पिदन

नेवा: अनलाइन न्युज – ललेन्द्र शाक्य | २०७७ पौष २६, आइतबार ११:०१:२४

नेपालभाषाया संगीत ख्यःया छम्ह पुलांम्ह म्येहालामि विनोद मानन्धरया छपू न्हूगु म्युजिक भिडियोया शनिवाः छगू ज्याझ्वःया दथुइ सार्वजनिक याःगु दु ।

म्येहालामि विनोल मानन्धरं हालातःगु छपू तसकं लोकंह्वाःगु म्ये ”थाय् छकु खालि दनि” म्येया म्युजिक भिडियो विशिष्ट पाहाँ कथं झायादीम्ह नेपालभापाया न्हापांम्ह म्युजिक भिडियो निर्देशक लिसें नेपालभाषाया न्हापांम्ह बरिष्ठ सिने पत्रकार व फिल्म निर्देशक विजयरत्न असंबरें यानादीगु खः ।

उगु म्येया पितब्वज्याय् सुल्तान अफ स्ट्रींगया रुपय् नांजाःम्ह संगीतकार अनिल शाही , पेजथ्री बाःछि पौया सम्पादक दर्शनवीर शाक्य व विजयरत्न असंबरें उगु ज्याझ्वःया पोस्टरया उलेज्या नं यानादीगु खः ।

म्येहालामि मानन्धरया ”थाय् छकु खालि दनि” थौंसिबें नीन्यादँ न्ह्यः हे लोकंह्वाःगु म्ये खःसा वयकया ”छोयलाबजि छोयलाबजि हजि” म्ये नं तसकं हे लोकंह्वाःगु म्ये खः ।

म्येहालामि मानन्धर थःम्हं हे निर्देशन याःगु म्युजिक भिडियोया पितब्वज्याय् विशिष्ट पाहाँ असंबरें नेवाः म्युजिक भिडियो ख्यः न्हियान्हिथं तब्या जुयावयाच्वंगु खँ न्ह्यथंसें थ्व ख्यःयात अझ थपू यायेगु भाला ल्यायम्ह पुस्तायागु जूगु विचाः प्वंकादिल ।

ज्याझ्वलय् मेम्ह विशिष्ट पाहाँ शाक्यं थौयां न्हूपिं हे कन्हे वना पुलांपिं जुइगु खँ न्ह्यथनाः दिलसा विशिष्ट पाहाँ अनिल शाहीं संगीत ख्यलय् वयाच्वंगु ह्युपाःया तारीफ यानादिल ।

म्येहालामि विनोद मानन्धरया अबुजु चन्द्रमान मानन्धरया सभानायःसुइ न्ह्याःगु उगु ज्याझ्वः लोकंह्वाःगु टिभि ज्याझ्वः ”समयबजि”या सुरेन्द्र मानन्धरं न्ह्याकादीगु खःसा म्येहालमि विनोद मानन्धरं लसकुस न्वचु व म्येच्वमि  अमृतरत्न शाक्यं सुभाय न्वचु तयादीगु खः ।

ज्याझ्वलय् उगु म्युजिक भिडियोया कलाकार, प्राविधिक, ग्वाहालिमिपिन्त विशिष्ट पाहाँ विजयरत्न असंबरेया ल्हाःतं ग्वसाःखलःपाखें मतिनाया चिं लःल्हानादीगु खः ।

Categorized in कला