zero media family planning adv

पिनें स्वनिगलय् वइपिन्त पनेमाल कि क्वारेण्टाइनय् तयाजक दुकाये माल — कलाकार सुनिता श्रेष्ठ

नेवा: अनलाइन न्युज – विजयरत्न | २०७७ बैशाख १९, शुक्रबार १७:२५:४५

सुनिता श्रेष्ठ नेपाःया संकिपाख्यःया छम्ह नांजाम्ह कलाकार खः । विशेष याना नेवाः फिल्मया ख्यलय् छगु बिस्कं हे म्हसिका दयेकेत ताःलाम्ह सुनिता श्रेष्ठ खस नेपाली फिल्मय् नं उत्तिग्यंक्क पलाः न्ह्याका वया च्वंम्ह कलाकार खः । कलाकारिताय् थःगु न्हापांगु पलाः हे लोकंह्वाःगु नेवाः टिभि ज्याझ्वः “समयबजि” पाखें न्ह्याकादीम्ह सुनिता श्रेष्ठया कलाकारिताया पलाः झिंन्यादँ झिंखुदँति न्ह्यः न्ह्याःगु खःसा व धुंका  “ग्वंगःक्वसः” नांयागु नेवाः फिल्मय् बचाधंगु भुमिकाय् अभिनय याना थःगु पलाः क्वातुका दिल । सुनिता श्रेष्ठया आः तक “व मिसा”, “जिगु मिखाया न्ह्योने”, “मिखा दुम्ह कां”, “वाया दुने जाकि दु”, “गज्या गज्यापिं मनूत दै थन” लगायत आपालं नेवाः फिल्म पिदने धुंकुगु दुसाः निर्देशक आर्यम नकःमिया  “सनाखत” नांयागु छगु नेवाःफिल्म धाःसा संसारय् न्यनावंगु कोरोना संक्रमणया हुनिं जारी जुउगु लकडाउनया हुनिं थाति लाना च्वंगु दु ।

कलाकार सुनिता श्रेष्ठं खस नेपाली भाय्या फिल्मख्यलय् निर्देशक नबीन सुब्बाया बहु चर्चित टिभि सिरीयल “दलन” व के।पि।पाठकया “मैना” फिल्मपाखें कलाकारिता न्ह्यब्वयादीगु खः । अथेहेतुं सुनिता श्रेष्ठया एक दिन एक रात,रामकहानि, चौकादाउ,ऐश्वर्या,सुश्री सम्पत्ति,कथा काठमाण्डौ व हरि लगायतया आपालं खस नेपाली फिल्म पिहाँ वयेधुंकुगु दुसाः लभ यु जिन्दगी नांयागु छगु फिल्म थ्वहे लकडाउनया हुनिं थाति लाःगु दु ।

नेपाःया फिल्मख्यलय् थःगु पलाः क्वातुके धुंकुम्ह सुनिता श्रेष्ठया विचाः कथं संसारय् न्यक्कभनं न्यनावना च्वंगु थ्व कोरोना भाइरसया संक्रमणपाखे सुरक्षित यायेत लकडाउनयात प्रभावकारी उपाय कथं छ्यला वया च्वंगु दु । थन नं वहे उपाय नाला कया च्वंगु दु । थ्व पायछी हे खः । तर मेमेगु देशय् थें थः नागरीकयात लकडाउनया ईलय् जीवन हनेत थाकुमजुइमा धका थीथी कथंया सुविधा धाःसा थन नेपालय् बिया च्वंगु मदु धका लोकंह्वाम्ह कलाकार सुनिता श्रेष्ठं धयादिल ।

“ आः झन नेपाःया मेमेगु जिल्लाया मनूत थन स्वनिगलय् लिहाँ वयेगु शुरु जुइ धुंकल । इमित कि त पने माल कि यंकायींका क्वारेण्टाइनय् निं झिंप्यन्हु तया हयेमाल । थुलि यायेफुसा जक स्वनिगः सुरक्षित जुइ , मखुधइगु खःसा थन संक्रमणया रुप भयावह जुइतिनि धका विचाः यायेमा । आःयात थ्व संक्रमणपाखें पूर्ण रुपं मुक्त मजुतलेया निंतिं छगु थासं मेगु थासय् वयेवनेगुलि नियन्त्रण यायेमा थें जिं स्वयेबले । ” धका कलाकार सुनिता श्रेष्ठं थःगु विचाः प्वंका दिल ।

कलाकार श्रेष्ठंथ्व लकडाउनया ईलय् युट्युबलागायत थीथी सामाजिक सञ्जाल स्वया न्हि छ्याना वया च्वंगु दुसाः थ्वपाखें थीथी नसा ज्वलं नं दयेके सयेका च्वंगु दु । काय् भारतय् च्वना च्वंगुलिं थन छेँय् थः जहान व सुनिता निम्हजक च्वना च्वंगु दुसाः वयकया जहानया छेँय्ज्याःय् उलि ल्हामज्वंगुलिं थौंकन्हे विशेष याना सुनितया ई छेँय्ज्याय् तक्यना च्वंगु दु ।

विशेष याना थःगु हे क्यबय् सनेगुलिइ नुगः क्वसाम्ह सुनिता श्रेष्ठ थ्व ई क्यबय् नं सनेगु याना च्वंगु दु । थ्व लकडाउनया न्ह्यः शिल्पि थियटरया ग्वसालय् भारतं वःम्ह नांजाम्ह रंगकर्मि उज्ज्वल सिन्हापाखें जुउगु एक्टिंग वर्कशपय् मेम्ह नेवाः कलाकार मञ्जु श्रेष्ठलिसे ब्वतिकयादीगु खःसा वकृशपय् ब्वतिकाःपिन्सं तयार याःगु नाटक धाःसा लकडाउनया कारणं क्यने मखंगुलिं सुनिता श्रेष्ठयात भचा नुगः मछिंना च्वंगु दु ।

थ्व लकडाउनया कारणं थः जहानया पश्मिना उद्योग नं थप्प जुया च्वंगु खँ न्ह्यथसें सुनिता श्रेष्ठं धयादिल कि , “ थ्व संक्रमण न्यनावनेगु खतरा दुगु ई जुउगुलिं सकलें थ्व पाखें सुरक्षित जुया च्वनेगु हे मू उपाय खः । उकिं सरकारं मेगु बाँलागु वैकल्पिक लँपु मालेमफुतले आःयात थंम्हं हे सुरक्षाया दक्वं उपाय नाला थःथःगु छेँय् हे सुरक्षित रुपं च्वनेगु हे पाय्छी जुई ।”

Categorized in कला