nepal investment baink

पाहाँचःह्रे नखः व येँ देसय् जात्राया लकस

पाहाँचःह्रे, खँग्वलं हे प्रष्ट यानाच्वंगु दु कि पाहाँ विशेषया चःह्रे नखः धकाः । पाहाँ सःताः नकेगु जात्रा पाहाँचःह्रे जात्रा । खय्तला, आपाः धयाथें नेवाःतसें हनीगु नखः चखः व जात्रापर्वय् पाहाँ सःताः नकेमाःगु ब्यागलं परम्परा दु । थ्वहे झ्वलय् येँय् थीथी कथंया जात्रा पर्वपिं मध्ये छगू महत्वपूर्णगु नखः खः पाहाँँचःह्रे । पाहाँचःहे्र मूल रुपं येँ देय्या नेवाःतसें हनीगु खःसां नं थीथी नेवाः वस्तीइ नं यःसिं थनाः पाहाँचःह्रे नखः हनीगु यानाः वयाच्वंगु दु । न्हापा न्हापा ला पाहाँचःह्रे स्वनिगःया फुक्क हे नेवाःतय्सं हनेगु यानाच्वंगु खःसा लिपा वनाः जक त्वःतावंगु खः धाइपिं नं मदुगु मखु ।

पाहाँचःह्रे चिल्लागा चःह्रेया न्हियात केन्द्रविन्दु नालाः हनावयाच्वंगु नेवाः समुदायया मौलिक संस्कृति खःसा थ्व मुक्कं नेपाःया बिस्कं पहःया म्हसीका दूगु नखः खः । पाहाँचःह्रेयात नेवाःतय्सं इलय् ब्यलय् पासाचःह्रे, लाभाचःह्रे नं धायेगु यानावयाच्वंगु दु । बसन्त ऋतुया ई जुयाः फय् वइगु नापं मौसमया ल्याखं नं धू ब्वइगु जुया कीटाणुतपाखें वइगु महामारी ल्वचं तापाक्क च्वनेगु नितिं लाभा नयेगु नखःया रुपय् नं पाहाँचःह्रेयात हनाच्वंगु खः धकाः धयाः वयाच्वंगु दु । पाहाँचःह्रेया झ्वलय् द्यःखः जात्रा मल्लकालय् सुरु जूगु खः । थुगु नखःया झ्वलय् पाहाँ ब्वनेगु यानाच्वंगुलिं हे पाहाँचःह्रे धाःगु धाइ । पाहाँचःह्रेया इलय् मूद्यः कथं जात्रा याइगु लुमरी अजिमा वतु, लुमरी अजिमा तेबाहाः व कंगः अजिमायात तःकेहेँपिं धाइ । पाहाँचःह्रे उपिं तःकेहेँपिं नापलाइगु जात्रा खः धकाः नं धायेगु परम्परा व चलन दु ।

चःह्रेकुन्हु चान्हय् हे फुक्क अजिमापिं गमय् अर्थात् पीगनय् तयेयंकेगु याइ । अन हे चच्छि तयेगु याइ । चःह्रेया कन्हय् कुन्हु आमैया दिनय् सुथय् येँया थाय्थासय् मरःजा नकीगु चलन दु । इहि मयाःनिपिं नापं कय्तापुजा मयाःनिपिंत नकीगु जा धइगु हे मरःजा खः । येँया लुमरि अजिमा अर्थात् भद्रकाली द्यःयाथाय्, मखं, वंघः, न्यत, भिंद्यःत्वाः, यतखा, कोहिति, भलःननि आदि थीथी लागाय् अथे मरःजा नकीगु परम्परा व चलन दु । मरःजा नल धाःसा मस्तय्त ल्वचं कइमखु धइगु जनविश्वास दु ।

पाहाँचःह्रेया इलय् हे येँय् तःजिक सल जात्रा अर्थात् घोडा जात्रा नं याना हयाच्वंगु दु । उकिं लिपांगु इलय् वयाः पाहाँचःह्रे स्वयां नं सल जात्रा अर्थात् घोडा जात्रा चर्चा अप्वः जुयाच्वंगु दु । न्हूगु पुस्तायापिंसं पाहाँचःह्रे धाःगु मसिउ, घोडा जात्रा धालकि सिउ । राज्यं हे घोडा जात्रायात मान्यता बिउगुलिं पाहाँचःह्रे ध्याकुनय् लानाः वनाच्वंगु खः धकाः स्पष्ट रुपं धायेथाय् दु । उकिं पाहाँचःह्रेयात घोडा जात्रां धित्तुधिनाच्वंगु दु, व पाहाँचःह्रेयात ध्याकुनय् तयाः वयाच्वंगु दु ।

पाहांचःह्रेया झ्वलय् दकलय् महत्वपूर्ण बाजं धइगु हे नायःखिं बाजा खः । द्यःखः जात्राया नितिं मथासे हे मगाःगु बाजं नापं जात्राया इलय् नं थानावनीगु बाजं धइगु हे नायःखिं बाजं खः । नायः अर्थात् नायःतय्सं थाइगु बाजं जुयाः हे थुगु बाजंयात नायःखिं बाजं धाःगु खः । खड्गी समुदायया मूल बाजं कथं नालातःगु नायःखिं बाजं थानाः न्ह्यइपुसेच्वंक जात्रा याइगु खः । नायःखिं बाजं नापनापं धिमे बाजं नं थायेगु यानाः वयाच्वंगु दु ।

पाहाँचःह्रेया झ्वलय् येँया थीथी द्यःपिनि जात्रा याइगु चलन दु । मूल रुपं लुमरी अजिमा तेबहा खः, लुमरी अजिमा वतु खः व कंगः अजिमा खः जात्रा जुइगु खःसा थुकिया लिसें तक्ति अजिमा, लुँचुभुलु अजिमा, न्हाय्कंत्वाःया अजिमा, नरसिंह आजु, गणेद्यः नापं त्यंगः गणेद्यःया नं जात्रा याइगु चलन दु । थःथःगु त्वाःया द्यःयात जात्रा यानाः थाय् थासय् चाःहिइकेगु याना वयाच्वंगु दु ।

तिंख्यलय् द्यः ल्वाकीगु जात्रा

पाहाँचःह्रेया झ्वलय् आमैकुन्हु चान्हय् तिंख्यलय् द्यः ल्वाकी । उगु इलय् लुमरी अजिमा खः कथं वतुया लुमरी खः व तेबाहाःया लुमरी खः नाप कंगः अजिमा खः ल्वाकेगु याइ । तिंख्यलय् लुमरी अजिमाया वतु खः व तेबाहाया खः नापं दिकातइ । कंगः अजिमाया खतं निगुलिं द्यःखः चाःहिलाः वतु खःलिसे मिप्वाः हिलाबुलाः यानाकाइ । उकियात हे द्यः ल्वाकेगु धाइ । जात्रा यानाः हाकनं द्यःखः थःथःगु थासय् यंकीगु चलन दु ।

असनय् द्यःखः ल्वाकीगु

पाहाँचःह्रे नखःया झ्वलय् चौलाथ्व पारुकुन्हु तःधंगु जात्रा जुइ । उगु इलय् स्वखः द्यःखः जक मखु मेमेगु द्यःखः नं कुबियाः जात्रा याइगु चलन दु । पारु कुन्हु सनिलय् येँया असंमरु अजिमा लागाय् लुमरी अजिमाया वतु खः व तेबाहाः खःयात दिकातइ । कंगः अजिमाया द्यःखतं चाःहिलेगु याइ । अनं लिपा तेबाहाः खःलिसे कंगः अजिमा खतं मिप्वाः हिलाबुला यानाकाइ । मिप्वाः हिलाबुला याना काइगुयात हे द्यःखः ल्वाकेगु धाइगु खः ।

वतु व तेबाहा द्यःखः

वतु व तेबाहाः लागां पिकाइगु द्यःखः धइगु लुमरी अजिमाया हे द्यःखः खः । न्हापा न्हापा लुमरी अजिमाया छखः जक द्यःखः खःसा लिपा तेबाहाः व वतुयापिनि दथुइ कचमच जुयाः छगू कथं ब्यागलं ब्यागलं जात्रा यायेगु सुरु याःगु धाइ । अले निगू हे त्वालं थःथःगु कथंया जात्रा याना हयेगु चलन याःगु खः । लुमरी अजिमाया द्यःछेँ वतुइ लानाच्वंगु दु । थुगु कथं निगू हे त्वाःया छम्ह द्यःया नामं निखः जूगुलिं तिंख्यलय् द्यः ल्वाकीबलय् छगू त्वाःलिसे अले असनय् द्यः ल्वाकीबलय् मेगु त्वाःलिसे कंगः अजिमां मिप्वाः हिलाबुला याना कायेगु यानाच्वंगु खः ।

न्यतमरु अजिमाया प्याखं

पाहाँचःह्रेया हे झ्वलय् येँय् ख्वाःपाः प्याखं कथं न्यतमरु अजिमाया प्याखं क्यनीगु चलन दु । थुगु प्याखनय् सिंघिनी, गणेद्यः, ब्रम्हायणी, रुद्रायणी, इन्द्रायणी, नारायणी, महालक्ष्मी, बाराही, भैरव, कुमारी, न्यतमरु अजिमा व ब्याग्रिनीया ख्वाःपाः पुया पाहाँचःह्रेया बहनी न्यतया दबुलिइ प्याखं क्यनेगु याना वयाच्वंगु दु । दँय्दसं क्यनीगु थुगु प्याखंया झ्वलय् झिंनिदँय् छकः धाःसा दैत्य क्वःथयेगु प्याखं क्यनी । न्यतपाःच्वया द्यःछेँय् निसें ख्वाःपाः पुया वयाः दबुलिइ पाहाँचःह्रे कुन्हु गणेद्यः, ब्रम्हायणी, इन्द्रायणी, नारायणी, रुद्रायणी व महालक्ष्मीया प्याखं क्यनेगु याइ । अथेहे कन्हय् कुन्हु बाराही, भैरव, कुमारी, अजिमा, सिंघिनी व ब्याग्रीनीया प्याखं क्यनेगु याइ । अनं लिपा निम्ह मचाया प्याखं धकाः अजिमा व कुमारीया प्याखं क्यनीसा अले प्यम्ह मचाया धकाः बाराही, कुमारी, भैरव व अजिमाया प्याखं क्यनेगु चलन दु । अथेहे प्याखं ल्हुइगु झ्वलय् म्येय् व फै बलि बिइगु चलन दु । खिं बाजं (नेकुं खिं), ताः, भुस्याः, प्वंगा, खिमचाया तालय् अथे द्यः जुयाः प्याखं ल्हुइगु खः । थुगु प्याखं न्यत लागाया ज्यापुतय्सं क्यना वयाच्वंगु दु ।

थुगु कथं पाहाँचःह्रेया झ्वलय् थीथी कथंया द्यःपिनिगु जात्रा यानावयाच्वंगु जूसां नं मूल रुपं कंगः अजिमा व लुमरी अजिमा हे खः धकाः धायेफइगु अवस्था दु । अले बाजंया ल्याखं नायःखिं बाजंयात मू बाजंया रुपय् नालातःगु दुसा अथेहे न्यतमरु अजिमाया प्याखं नं क्यनेगु यानावयाच्वंगु दु ।

नेवाः समाजय् अजिमा द्यः धाइपिं थःगु हे पहःया मिसाद्यः खः । थाय् विशेष कथं नां बियातःगु जूसां मूल रुपं मिसाद्यः हे खः । अले अजिमा द्यःयात अष्टमातृका प्रतिक कथं नं नालाः वयाच्वंगु दु । अजिमा द्यःया जात्रा नापनापं पाहाँचःह्रेया दिनय् विशेष यानाः लाभा नयेमाःगु नापं थःथितियात पाहाँ ब्वनेमाःगु चलन दु । मौसमया ल्याखं लाभा नयेगु जात्राया रुपय् नं पाहाँचःह्रेयात नालातःगु दु । उकिं न्हापा न्हापा मौसमयात ल्वयेक हनेगु याना वयाच्वंगु पाहाँचःह्रे नखःया विशेषता खः । अले द्यःखः जात्रा मल्लकालय् सुरु जूगु खःसां वसिबें न्हापा हे पाहाँचःह्रेयात पासाचःह्रे, लाभाचःह्रे धकाः येँया नेवाःतय्सं हना वयाच्वंगु खः धाइ । थुगु कथं लिपांगु इलय् वयाः पाहाँचःह्रे धइगु येँया मौलिक जात्राया रुपय् विकास जुयावंगु दु ।

लिपांगु इलय् वयाः पाहाँचःह्रेया इलय् हे तिंख्यलय् घोडा जात्रा अर्थात् सल जात्रा यायेगु ज्या राणाकालय् वयाः सुरु याःगु खः । अले राज्यं नं वहे सल जात्रायात प्राथमिकता बिया वयाच्वंगुलिं पाहाँचःह्रे नखः छगू कथं ध्याकुनय् लाः वंगु दु । पाहाँचःह्रेया इलय् याइगु घोडा अर्थात् सल जात्रायात जक मनूतय्सं चर्चा यायेगु नापं राष्ट्रियस्तरं प्रचारप्रसार यायेगु ज्या जूगुलिं येँया नेवाःतय्सं हनावयाच्वंगु पाहाँचःह्रे नेवाः समाजय् जक लिकुना वंगु अवस्था खनेदु । आः वयाः ला थःथितियात पाहाँ ब्वनेगु अर्थात् नखत्याया इलय् नं पाहाँचःह्रेया लसताय् धायेगु बुलुहुँ बुलुहुँ त्वःताः घोडा जात्रा अर्थात् सल जात्राया लसताय् धकाः तकं धायेगु यानाहःगु दु । थुगु हे कथं न्ह्याः वन धाःसा कन्हय् वना पाहाँचःह्रे धइगु हे घोडा जात्रा अर्थात् सल जात्रा जकं मखुला धकाः मनूतय्सं धयाहयेफुगु सम्भावना दु । उकिं थ्व इलय् पाहाँचःह्रे नखःया महत्वयात अझ ब्यापक याना यंकेमाःगु नापं पाहाँचःह्रे नखःया बारे अझ अप्वः अध्ययन अनुसन्धान याना यंकेमाःगु अवस्था दु । अले येँयापिं नेवाःतय्गु म्हसीका पिब्वयाच्वंगु पाहाँचःह्रेयात प्राथमिकता बियावनेगु ज्या यायेमाःगु दु । थथे यायेमफुत धाःसा नेवाः म्हसीका व नेपाःया मौलिक म्हसीका कथं धस्वानाच्वंगु पाहाँचःह्रे लिसेलिसें नेवाः समुदाय नं तनावनीगु अवस्था ब्वलनाच्वंगु दु । सम्बन्धित निकाय वा पक्षय् थुकियात विशेष ध्यान बिइमाःगु थौंया आवश्यकता खः ।