1142 nhoo dan adv

पाण्डासिबें दुर्लभ प्रजातिया इली पिका

२०७१ चैत्र १०, मंगलबार १०:४५:२८

चीनया पाण्डायात दुर्लभ प्रजातिया जनावर कथं संरक्षण यानातःगु दु । आः चीनया हे जिनजियाङ लागाय् जीव वैज्ञानिकतय्सं मेम्ह स्तनधारी प्रजातिया जनावर लुइकूगु दु गुपिंत आः पाण्डासिबें दुर्लभ प्रजाति कथं कयाः संरक्षणया ज्या जुयाच्वंगु दु ।

दकलय् न्हापां थुमित सन् १९८३ स खंकूगु खः । थुपिं च्वनीगु बासस्थान ‘इली’या नामं थुमिया नामाकरण ‘इली पिका’ याःगु खः ।

थौंकन्हय् चीनय् द्वःछिम्ह जक ल्यं दुपिं थुम्ह प्रजातिया जनावरया किपा सन् २०१४ जुलाइ कुन्हु काःगु खः । टेडी बियर थें खनेदुपिं थुपिं चीधिपिं हिसिचा दुपिं जनावरत चीनया उत्तरपश्चिमी इयानशान पर्वतीय श्रृंखलाय् खंकूगु खः ।

इली पिका

२० सेन्टिमिटर जक ताःहाकःपिं थुपिं तजाःगु पहाडय् घाँय् नयाः म्वानाच्वंपिं खः ।

थुकिया लुइकूगु व अध्ययनया ज्या यानाच्वनादीम्ह जीव वैज्ञानिक ली वेइडङया कथं उगु इलंनिसें आःतक थुमिगु ल्याखय् ७० प्रतिशत म्हो जूगु दु ।

“जिं लुइकागु प्रजाति जूगुलिं यदि थुपिं जिगु न्ह्यःने हे लोप जुयावन धाःसा जिगु निंतिं थ्व तसकं मछालापुगु खँ जुइ,” ली नं सिएनएनयात ब्यूगु खँल्हाबल्हाय् धयादीगु दु । लीया कथं ग्लोबल वार्मिङया हुनिं थुमिगु वासस्थान स्यना वनाच्वंगु दु । न्हापा ३२०० निसें ३४०० मिटरया पहाडी लागाय् खनेदुपिं थुपिं थौंकन्हय् वसिबें च्वय् ४१०० मिटर खनेदयाच्वंगु दु ।

आईयुसिएनपाखें सन् २००८ स थ्व प्रजातियात दुर्लभ व संरक्षित प्रजातिया धलखय् दुथ्याकेधुंकूगु दु ।


इली पिका

ली वेइडङ