zero media family planning adv

पाकेटमारया छेँ

 नर्मदेश्वर प्रधानपाकेट मारे याइ । व:गु आर्जनं स्वतँजा: छेँ दयेकी । खबर ब्वने । पाकेट मारं आर्जनया श्रोत क्यनी । पाकेट मारे यानागु खँ स्वीकार याइ ।

थौंकन्हय् न्हियान्हिथं थें आप–राधिक घटनातय्गु बारे बुखँ वइ । भ्रष्टाचारया खँ वइ । घुस न:गु समाचार ब्वने । बलात्कारया हृदयविदारक घटनात जुइ । न्यने । म्ह पीसे च्वनी । आपराधिक गतिविधित झन् झन् वृद्धि जुयाच्वनी । सूचाङ्कं क्यनी । सतहय् व:गु घटना ला सीके दइ । सीके मफुगु भूमिगत स्तरय् जुइगु गुलिखे अपराधत सीके हे फइ मखु । पिहां हे वइ मखु । दण्ड हे फये म्वाकं गुलिखे अपराधीत बचे जुइ । थम्हं या:गु अपराध पचे याना बी । थम्हं यानागु अपराधं सुरक्षित जुइ । अपराधीतय् अपराधया लिच्व: जनतां फइ । समाज उकिं पीडित जुइ माली । असुरक्षित जुइ । छुं छुं आपराधिक घटनात जनसमक्ष वइ । आपराधिक गतिविधिपाखे पुलिस, सरकार सचेत जूगु अनुभव जुइ । अनुसन्धान कार्य तीव्र जूगु अनुमान याये फइ । पाकेट मारे याना: स्वतँ छेँ दयेकूम्ह अपराधीयात पुलिसं ज्वन । ज्वनेत सफल जुइ । आपराधिक गतिविधिया विरोधय् पुलिसया सक्रियता दु । विश्वास जुइ ।

स्वतँजा: छेँ दयेकेगु । उन्नति विकासया खँ जुइ । तर पाकेट मारे याना: दयेकूगु छेँ धायेबलय् छेँ अनसं पा:ता: जूगु अनुभव जुइ । निर्माणया अनुभूति जुइ मखु । त:भुखाचं क:गु अनुभव जुइ । मनूतय्सं स्वतँ जा:या छेँ खनी । नां छुइ । ‘पाकेटमारया छेँ’ । छेँया लुखाय् नेम प्लेट हे म्वा: । अथें हे मिखां झलझल खनी – आख:त ‘पाकेट मारया छेँ’ । स्पष्ट । छेँया नामाकरण जुइ । पाकेटमारया कायम्ह्याय्, कला: दइ । उमित समाजं मेगु हे मिखां स्वइ । विशेष परिचय बी । पाकेटमारया कायम्ह्याय् । पाकेटमारया कला: । उपिं कलंकित जुइ । अपहेलित जुइ । पाकेटमारं या:गु अपराधयागु दण्ड वया परिवारं फये माली । बदनामी सह याये माली । घुर्के माली ।

पाकेटमारं स्वतँजा: छेँ दयेकूगु खँ न्यने । पुलिसया पञ्जाय् पाकेट– मार ला:गु खँ सीके । पाकेटमारं थ:गु कुकर्मया लिच्व: फये माली । वयात मा:गु कसा: बीमा: । मनं मनं धाये । तर थ्व घटनां जित: मेकथं गम्भीर याना बी । जिगु न्ह्यपु संका बी । जिगु बिचा: ब्वइ । जिके अनेक तर्क लुइ । वइ ।

लक्ष्मी निवास । निर्मल निवास । बबर महल । सिंहदरबार । अनेक दरबार महलतय्गु नांत ख: थुपिं । सलंस: पी बुँ घेरे याना: दयेकात:गु शानदार, भव्य महलत ख: थुपिं । छगू इलय् राणा शासनया शाक्तिशाली परिवारया निजी विलाशी छेँत ख: थुपिं । हरेक महलया नां दइ । पाकेटमारया छेँया थें । राणा शासन वसेंलि काठमाडौं दुने अनेक महलत खनेदइ । राणा परिवारतय् महल दयेकेगु प्रतिस्पर्धा जुइ । काठमाडौंबासीतय्गु द्वलंद्व: पी बुँ राणा शासकतय्सं काइ । अधिग्रहण याइ । काठमाडौंया बुँथुवा:तय्गु बुँ हडपे याइ । राणा शासकतय्गु न्ह्य:ने सुनानं नवायेगु खँ जुइ मखु । छखे महलतय्गु वृद्धि जुइ । मेखे सामान्य जनता भूमिहीन जुइ । उपत्यकाया कृषि पेशाय् त:धंगु वज्रपात जुइ । गुलिखे बुँथुवा:त कंगाल जुइ । महलधारीतय्गु आगमनं काठमाडौंबासीतय्गु आर्थिक जीवन बेहाल जुइ । उमिसं दु:ख सी । उमिगु सन्तानं दु:ख सी ।

मती वइ । राणा निरंकुश शासकतय्सं महल दयेकेत का:गु अल्याख बुँ व यथार्थय् आपराधिक कार्य मखु ला ? व पाकेटमारं या:गु स्वयां जघन्य अपराध मखु ला ? गुलि जनता उबलय् नये मखना: सित जुइ ? व निर्मम आपराधिक ज्या मखु ला ? तर शक्तिं अपराधयात गुकथं उपलब्धी हीका बी । गुकथं गौरवानुभव याकी । महल– थुवा:तय्गु शानं क्यनी ।

थौं देशय् अपराध, भ्रष्टाचारया चरम सिमाय् थ्यनाच्वंगु दु । हर क्षेत्रय् स्वये । न्यायालय दुनेया भ्रष्टाचारया खँ वयाच्वंगु दु । स्वास्थ्य जगतय् जुइगु शोषण दोहनया चर्चा जुयाच्वंगु दु । व्यापार क्षेत्रय् जुयाच्वंगु अनियन्त्रित नाफाखोरीतपाखें जनता मर्माहत जुयाच्वंगु दु । बजारय् अखाद्य वस्तुत बिक्री जुइ । जनता विष नयेत बाध्य । गुणस्तरहीन वास:त सेवन यायेत विरामीत बाध्य । दैनिक मजीक मगा:गु वस्तुतय्गु नं हाकु बजा: । देशय् छद्म भेषय् जुयाच्वंगु भ्रष्टाचार, हाकुबजा:, लब:सिं फुक्क पाकेटमार, चोरी, डकैटी मखु ला ? थुमिसं दंगु तत:खागु छेँ, महलतय्गु नामाकरण अनेक कथंया कुञ्ज, निवास, भवन गथे जुइ फइ ? संविधान निर्माणया नामय् अरबौं दां झ्वाम्म । व छु ? पाकेटमार मखु ला ?

थौं देशय् निखल: पाकेटमारत दु । छखल: भाग्यमानी । दण्ड फये म्वा:पिं पाकेटमारत । उमिसं आलिशान महल दयेके फइ । मेखल: अभाग्यमानी पाकेटमारत । दण्ड फये मा:पिं । स्वतँ जा:गु छेँ दयेकेफुपिं । दशां क:पिं ।

(सन्ध्याटाइम्सपाखें)