nepal investment baink

पाकिस्तानय् मतदान, मोबाइल सेवा बन्द

नेवा: अनलाइन न्युज – ललेन्द्र शाक्य | ने.सं. ११४४ पोहेलागा त्रयोदसी

पाकिस्तानय् थौं बिहिवाः आम निर्वाचनया दिं देय् न्यंकं मोबाइल सेवा बन्द याःगु दु ।

गृहमन्त्रालयं सुचं सार्वजनिक यानाः सुरक्षा उपाय छ्यलेमाःगु जूगुलिं मोबाइल सेवा अस्थायी रुपं बन्द यानागु जानकारी ब्यूगु दु ।

सार्वजनिक जूगु सुचनाय् धयातःगु दु, ‘देसय् थौंकन्हय् जुयाच्वंगु आतंकवादी घटनाया हुनिं यक्वसिगु ज्यान वंगु दु । सम्भावित खतरापाखें तापाक्क च्वनेगु नितिं सुरक्षाया उपाय छ्यलेगु आवश्यक जूगु दु । उकिं देय् न्यंकं मोबाइल सेवा अस्थायी रुपं बन्द यायेगु निर्णय याःगु दु ।’

मतदानया पूर्व सन्ध्याय् बलुचिस्तान प्रान्तय् जूगु बम विष्फोटय् कम्ती नं २३ म्ह मनूत सीगु खः । निर्वाचनयात शान्तिपूर्ण रुपं क्वचायेकेत सुरक्षाकःमिपिंलिसें ६ लख ५० हजारम्हेसित परिचालन याःगु रेडियो पाकिस्तानं जानकारी ब्यूगु दु ।

पाकिस्तानय् थौं बिहिवाः ३३६ सिटया नितिं निर्वाचन जुयाच्वंगु दु । सरकार दयेकेत कम्ती नं १६९ सित त्याकेमाःगु आवश्यक दु ।

निदँ न्ह्यः अविश्वास प्रस्ताव हयाः इमरान खान नेतृत्वया सरकार क्वःथःगु खः । आः इमरान खान भ्रष्टाचार द्वपनय् जेलय् च्वनाच्वंगु दु । खानयात १४ दँया जेल सजायँ न्यंकूगु दु । खान नेतृत्वया पार्टी पाकिस्तान तेहरिक ए इन्साफ (पीटीआई)यात चुनाव ल्वायेत प्रतिबन्ध तःगु दु । उकिं पीटीआईया उम्मेदरवारपिंस्वतन्त्र रुपं प्रतिस्पर्धाय् क्वाहाँ वःगु दु ।

स्वक्वःतक प्रधानमन्त्री जुइधुंकूम्ह नवाज शरीफ नं चुनावी प्रतिस्पर्धाय् दु । वयात भावी प्रधानमन्त्रीया रुपं स्वःगु दु ।

नवाज शरीफया कट्टर आयोचक इमरान खान जेलय् दूगु व वया पार्टी पीटीआईयात चुनाव ल्वायेत रोक तःगुलिं नवाज शरीफया पार्टी पाकिस्तान मुस्लिम लिग–वाज (पीएमएल–एन) चुनाव त्याकाः न्हूगु सरकार दयेकीगु अनुमान याःगु दु ।

अथेहे, बुलावल भुट्टो जरदारीया पाकिस्तान पिपुल्स पार्टी (पीपीपी) नं थ्व निर्वाचनया मू प्रतिस्पर्धी खः । पीपीपीं जरदारीयात भावी प्रधानमन्त्रीया रुपं न्ह्यःने हःगु दु ।

Categorized in अन्तर्राष्ट्रिय