Mohanai 2078 KTM

पाकिस्तानय् भुखाय् : २० म्ह सित, आपालं घाःपाः

नेवा: अनलाइन न्युज – ललेन्द्र शाक्य | २०७८ आश्विन २१, बिहिबार १२:३६:४५

पाकिस्तानय् थौं बिहिवाः सुथय् भुखाय् ब्वःगु दु । उगु भुखाचय् लानाः कम्ती नं २० म्ह मनूत सीगु दुसा आपालं मनूत घाःपाः जूगु दु ।

पाकिस्तानया पश्चिम क्षेत्रय् लाःगु बलुचिस्तान प्रान्तया क्वेटा क्षेत्रय् थौं सुथय् थ्यंमथ्यं ३ ता इलय् ५.७ रेक्टरस्केलया भुखाय् ब्वःगु खः । सुथय् देनाच्वंगु इलय् भुखाय् धक्का महसुस जुइधुंकाः मनूत ग्याःचिकुइ लानाः भागाभाग जूगु खः ।

उगु भुखाचं तःधंगु क्षति जूगु अनुमान याःसां नं खुलस्त रुपं गुलि क्षति जुल सार्वजनिक जूगु मदुनि । बलुचिस्तान प्रान्तया आन्तरिक मामिलामन्त्री मिरजिया उल्लाहं आःतक २० म्ह मनूत सीगु पुष्टि याःसां नं सीपिनिगु ल्याः अप्वयेफूगु धाःगु दु ।

भुखाचं छेँत दुनावःगु व लँपु अवरुद्ध जूगु लू सामाजिक संजालय् सेयर याःगु दु । समाचार एजेन्सी एएफपीया कथं छेँया पलि व अंगः दुनाः वयाः आपालं मनूत ल्हाःगु दु । भुखाय् लिच्वः लाःगु क्षेत्रय् उद्धार व मालेगु ज्या जुयाच्वंगु दु ।

Categorized in अन्तर्राष्ट्रिय