city axpris 2

पाकिस्तानया पूर्व प्रधानमन्त्री इमरान खान व वया जहानयात १४ दँ जेल सजायँ

नेवा: अनलाइन न्युज – ललेन्द्र शाक्य | २०८० माघ १८, बिहिबार १२:११:३८

पाकिस्तानया पूर्व प्रधानमन्त्री इमरान खान व वया जहान बुशरा बीबीयात भ्रष्टाचारया अभियोगय् बुधवाः १४ दँया जेल सजायँ न्यंकूगु दु ।

राष्ट्रिय निर्वाचनया छवाः न्ह्यः खानयात राज्यया गोप्य सुचं चुहावट सम्बन्धी मुद्दाय् १४ दँया जेल सजायँ न्यंकूगु छन्हु लिपा थ्व फैसला वःगु खः ।

पीटीआईया संस्थापक व पूर्व प्रधानमन्त्री खान व वया जहानयात १४ दँतक छुं नं सार्वजनिक पद धारण यायेत अयोग्य घोषित याःगु दुसा वयात ७८ करोड ७० लख पाकिस्तानी दां जरिवाना तकं याःगु दु ।

एआरवाई न्यूजया कथं बुधवाःया सुनुवाईस पीटीआईया संस्थापक बीबीयात अदालतय् पेस याःगु खः ।

खानया पाकिस्तान तेहरीक–ए–इन्साफ (पीटीआई) पार्टीया प्रवक्तां धाःगु दु, ‘जिमिगु न्यायिक प्रणालीयात थुनेत्यंगु दु । थ्व पाकिस्तानया इतिहासय् मेगु दुःखुद् दिं खः ।’

वंगु अगष्टय् गिरफ्तारीइ लायेधुंकाः निसें अधिकांश ई हिरासतय् तयातःगु जेल दुने जूगु सुनुवाइलिपा खानया सजायँ मदिक्क वा नापनापं न्ह्याइगु खः वा मखु धैगु स्पष्ट जुइ फूगु मदुनि ।

खानया वकिल सलमान सफदरं नं एएफपीलिसे खँ ल्हासें खान व वया जहान बुशरा बीबीयात सजाय न्यंकूगु पुष्टि याःगु दु ।

सफदरं धाःगु दु, ‘खान व वया जहान बीबीयात सजायँ न्यंकूगु दु । बीबीयात आःतक गिरफ्तार याःगु मदु ।’

इमिगु सन् २०१८ स खान प्रधानमन्त्री निर्वाचित जुइगु सिबें छुं महिना न्ह्यः ब्याहा जूगु खः ।

खानं आध्यात्मिक मार्ग दर्शनया नितिं सम्र्क याःबलय् बीबीयात नापलाःगुव बीबी सार्वजनिक रुपं ब्यागलं खनेदःवःगु खः ।

थ्यंमथ्यं १२ करोड ७० लख पाकिस्तानीं वइगु बिहिवाः जुइगुचुनावया दिं मतदान यायेखनी, गुकी खान व पीटीआई बहसया केन्द्रय् लाःगु दु ।

मतदानय् धाँधलीया द्वपं लाःगु दु, खानयात भ्रष्टाचारया न्ह्यःया अभियोगपाखें बिस्युं वनेत रोक तःगु दु व वया पार्टीं व्यापक दमनया सामना यायेमाःगु दु ।

सन् २०२२ स सत्ताच्युत जुइधुंकाः थुखे खानयात पाकिस्तानया सैनय योजनाकारविरुद्ध अवहेलनाया अभियान न्ह्याकेधुंकाः हाकनं सत्ताय् लिहाँ वयेके मबिइगु अदालती मुद्दां गाडेयाःगु दु ।

खानं थःगु कार्यकालया अधिकांश ई साझेदारीइ शासन याःगु शक्तिशाली सेनायात अमेरिका समर्थित षड्यन्त्रय् थःत सत्ताच्युत याःगु द्वपं ब्यूगु खः । वंगु दँया मे महिनाय् खानयात न्हापांगुखुसि गिरफ्तार याःबलय् देय् न्यंकं दंगा ब्वलंगु खः ।

वया सतक आन्दोलन छगू सैन्य दमनपाखें निष्क्रिय याःगु खः गुकी द्वलंद्वः पीटीआई समर्थकपिन्त हिरासतय् काःगु खः । वमध्ये सलंसःपिन्सं बन्द ध्वाखादुने सैन्य सुनुवाईया सामाना यानाच्वंगु दु व दर्जनौं बरिष्ठ नेतापिन्त भूमिगत जुइत बाध्य याःगु दु ।

खानं सामाजिक संजाल एकस(ट्वीटर)य् थःगु प्रोफाइलय् पोष्ट याःगु सन्देशय् धयातःगु दु, ‘हरेक अन्यायया बदला फेब्रुअरी ८ य् थःगु भोटपाखें कायेमाः । इमित मतदानपाखें लिसः बियादिसँ झीपिं तुतांपाखें लिइफुपिं फैचा मखु ।’

Categorized in अन्तर्राष्ट्रिय