zero media family planning adv

पहुँचया भरय् क्वारेन्टाइनं लिकयाः यंकल, गां थ्यनेधुंकाः संक्रमण पुष्टि

नेवा: अनलाइन न्युज – ललेन्द्र शाक्य | २०७७ जेठ २९, बिहिबार ०७:१३:४६

भारतं लिहाँ वःपिं नागरिकपिंके कोरोना भाइरस कोभिड १९ या संक्रमणया उच्च जोखिम जुयाच्वंगु अवस्था दु । उकिं इमित क्वारेन्टाइनय् तयातःगु दु ।

भद्रगोल क्वारेन्टाइनय् दुःख कष्ट फयाः च्वनाच्वंपिनिगु ल्याः १ लख ७२ हजारसिबें अप्वः दु । तर धादिंगय् राजनीतिक पहुँचया हे आधारय् क्वारेन्टाइनय् च्वनेमाःपिन्त छेँय् यंकूगु सीदूगु दु । इपिंमध्ये निम्हेसिके कोरोना संक्रमण पुष्टि जुइधुंकाः गामय् ग्याःचिकु ब्वलंगु दु ।

धादिंगया नीलकण्ठ नगरपालिकाय् च्वंगु क्वारेन्टाइनय् च्वनाच्वंपिं ७ म्ह भारतं वःपिं ल्यायम्हपिन्त राजनीतिक पहुँचया आधारय् गां दुकाःगु सीदूगु दु । उपिंमध्ये निम्हेसिके म्हिगः बुधवाः कोरोना संक्रमण पुष्टि जूगु दु ।

नगरपालिकाया बाल मन्दिरय् दयेकातःगु क्वारेन्टाइनय् आः थ्यंमथ्यं साढे २०० म्ह भारतं वःपिं च्वनाच्वंगु दु । नगर प्रमुख भीम ढुंगानाया कथं भारतं वःपिं एकाध व्यक्ति बाहेक फुक्क बालमन्दिर क्वारेन्टाइनय् च्वनाच्वंगु जानकारी ब्यूगु दु ।

तर भारतं वयाः छुं दिं क्वारेन्टाइनय् च्वनाच्वंपिं ७ म्ह मनूपिन्त धाःसा प्रदेशसभा सांसद रामकुमार अधिकारीया स्वकीय सचिवं विना जानकारी धुवाँकोटया गामय् यंकूगु सीदूगु दु । छम्ह अधिकारयिा कथं सांसदया स्वकीय सचिव प्रदीप यादवं विना जानकारी क्वारेन्टाइनं लिकयाः गामय् छ्वःगु खः ।

स्वकीय सचिव यादवं नं भारतपाखें वःपिन्त क्वारेन्टाइनं लिकयाः यंकागु स्वीकार याःगु दु ।

यादवं बाल मन्दिरया क्वारेन्टाइनय् सुविधा मदूगु धैगु गुनासो वयेधुंकाः थःपिन्सं ७ म्हेसित गामय् हे हयागु खँ स्वीकार याःगु दुसा यादवं इपिंमध्ये छम्हेसित होम क्वारेन्टाइनय् तयागु व ल्यंदुपिन्त गामय् च्वंगु स्कूलय् क्वारेन्टाइनय् तयागु खः धकाः धाःगु दु ।

निम्हेसिके संक्रमण पुष्टि

बुधवाः स्वास्थ्य व जनसंख्या मन्त्रालयं धादिंगय् १६ म्हेसिके कोरोना संक्रमण पुष्टि जूगु घोषणा याःगु दु । उपिंमध्ये १४ म्ह नीलकण्ठ नगरपालिकाय् च्वंगु बाल मन्दिर क्वारेन्टाइनय् च्वनाच्वंपिं खःसा ल्यंदुपिं निम्ह साविकया धुँवाकोट गाविसय् च्वनाः वयाच्वंपिं खः धकाः जिल्ला जनस्वास्थ्य ज्याकुथि धादिंगं जानकारी ब्यूगु दु । इपिं फुक्क भारतं वःपिं खः ।

संक्रमितपिं मध्ये निम्ह साविकया धुवाँकोट गाविसया खः । अथेहे, नगरपालिकाया वडा ल्याः १४ या ९ म्ह, वडा ल्याः ३ या १ म्ह, वडा ल्याः ११ या २ म्ह, वडा ल्याः २ या १ म्ह, वडा ल्याः ५ या २ म्ह, वडा ल्याः १ या १ म्ह व वडा ल्याः ७ या १ म्ह खः ।

Categorized in राजनीति