zero media family planning adv

पहिचानया उपहास बागमती प्रदेश

नेवा: अनलाइन न्युज – निश्चल | २०७६ पौष १४, सोमबार २०:१६:१८

बिजय कृष्ण श्रेष्ठ

२०१८ सालं नेपाःयात १४गू अञ्चल व ७५गू जिल्लाय् विभाजन यायेसिकं न्ह्यः बागमती धइगु नां छगू पवित्र खुसिया जक नां खः । थाय् व क्षेत्रविशेषया नांकथं इतिहासय् गुबलें नं थुकियात छ्यलातःगु खनेमदु । पिने पिने देसय् खुसिसिथय् सभ्यता विकास जूगु धकाः खुसिया नामं सभ्यता धाःथें थन बागमती सभ्यता धायेगु याःगु नं लिपा हे जक खनेदु । नेपाःया सीमाना गुबलें तःधं जुल व गुबलें चीधं  जुल,, तर थनया नां नेपाः व नेपालमण्डल हे खः । स्वनिगलं पिनेया मनूतसें नं थन वयेत नेपालय् हे वयेगु धकाः जनबोलिइ धया हे वयाच्वंगु खः । 

मेगु खँ, भारत व चीन आदि देसय् स्वयेगु खःसा थुकथंंं प्रान्त व प्रदेशया विभाजन याःबलय् पुलांगु व ऐतिहासिक कालंनिसें चले जुयावयाच्वंगु नांयात हे निरन्तरता ब्यूगु खनेदु, न्हूगु नां क्वचिने हःगु खनेमदु । जनस्तरया परम्परा स्वयेगु खःसा जाति व जातविशेषया नामं नं मनूतसें थाय् बिशेषया नां तयेगु यानाच्वंगु यक्व दु । नेवाःत यक्व दुथाय् नेवार गाउँ धकाः नं अथें नं धायेगु यानावयाच्वंगु दु धाःसा खरेलत यक्व दुथाय् खरेलथोक धायेगु याः । भारतया राज्यया नामाकरण नं उकथं हे जुयाच्वंगु खनेदु । आधुनिक इलय् जुजुपिं, शहीद आदि प्रसिद्ध मनूतय्गु नामं नं थाय्विशेषया नामाकरण यायेगु याः । 

थुकथं ३ नं. प्रदेशया नामाकरण यायेगु सवालय् नेवाः ताम्सालिङ्ग धइगु जातीय पहिचानया लिधंसाय् वा नेपाल मण्डल धइगु ऐतिहासिक पहिचानया लिधंसाय् नामाकरण यायेगु हे दक्कय्  उपयुक्त खः । न्हापांगु संविधान सभाया राज्य पुनर्संरचना व राज्यशक्तिया बाँडफाँड समितिं तयार याःगु पहिचानया न्यागू आधारयात सकसिनं धइथे स्वीकार याःगु खः, यद्यपि गुगु पहिचान नालेगु धइगु सम्बन्धय् धाःसा छगू मत मदुगु खः । 

थुकथं स्वयेगु खःसा बागमती धइगु गुगु नं पहिचान दुने लाःगु खँ मखु । थुगु नामय् सुनां नं थःगु या महसुस यायेफइगु अवस्था मदु । गन तक थनया गैर नेवाः व गैर तामाङ मनूतय्सं अपनत्व महसुस यायेफइ धइगु खँ खः, व हे भ्रमपूर्ण खँ खः । नेपाल संवत् सकसिंगु खः, तर थनया गैर नेवाःतसें थःपिनिगु ला संवत् मदु धकाः चायेकल अले जिमिगु नं विक्रम संवत् दु धकाः क्यनाः सत्ताय् दुगु ल्याखं चले यात । थ्व ला मचा छम्हस्यां मालपा छपा ज्वनावल धाःसा मेम्ह मचां पसलय् खुयाहयाः नं जिके नं जेरी दु धकाः क्यनेगु थुज्वःगु खँ जुल । थुज्वःगु मनोविज्ञानं थनया छगू जातिया मनूत प्रभावित जुयाः न्ह्यानाच्वंगु दु । उकिं नेपाल मण्डल धायेवं नेवाःतय्गु जुल, ताम्सालिङ्ग धायेवं तामाङ्गतय्गु जुल । झीगु छु ? धायेबलय् बागमतीयात थःगु दयेकाः हःगु जुल । यदि बागमती धइगु नं नेवाःतय्गु स्वामित्वया खः धइगु कथंया मनोविज्ञान दुगु खःसा इमिसं गौरीशंकर धकाः तइगु जुइ । थ्व मनोविज्ञान स्वयं विभाजनया मनोविज्ञान जूगुलिं थुकिं भिंकेगु ज्या याइमखु । 

निर्वाचित प्रदेश सभाया स्वब्वय् निब्व बहुमतं पारित यायेमाःगु खँयात नेकपाया सचिवालयं निर्णय यानाः संसदीय दलय् निर्देशन बीगु धकाः निर्णय याःगु धइगु खँय् नेकपाया प्रदेश सभाया दुजःत हे असन्तुष्ट जुयाच्वंगु दु । थ्व निरंकुशताया अभ्यास जुल, जनवादी मखसें केन्द्रीयता लादे जुल, अधिकारया हनन जुल, हस्तक्षेप जुल इत्यादि खँ ला इमिसं हे न्ववानाजूगु दु । अथे जूगुलिं थ्व सवालय् आपाः खँ धयाच्वनेम्वाः । प्रदेश सभाय् छलफल जुयाः मतदान जुयाः नं गुगु नं पक्षय् स्वयब्वय् निब्व बहुमत मखात धाःसा पार्टीं हस्तक्षेप याःगुया नं छुं औचित्य दइगु खः, आः प्रदेश सभाय् छलफल हे मजूनी पार्टीया सचिवालयं निर्णय यायेगुया औचित्य छु? 

नेपाःया राजनीतिइ उबलय् रामचन्द्र पौडेल १७क्वः तक मतदान जुयाः नं मवः । वयां न्ह्यः राष्ट्रपतिं धुवांधू प्रधानमन्त्री जू वा धकाः सूचं जारी यातं नं ज्या मजू । व सिकं नं न्हापांगु संविधान सभां ला प्यदँ तक च्वनं नं संविधान जारी यायेमफु । सत्य निरुपण व बेपत्ता आयोगया ज्या खुलाया दुने सिधयेकेमालं ११ दँ दतं नं थाग्रांग हे तिनि । उलि जक मखु, गुलिखे आयोग, गुलिखे थासय् भागबण्डा मिले मजुयाः मनू तयाः ज्या याकेमखु । अथे जूगुलिं प्रदेश सभा च्वंपिं क्वय्यापिं जूगुलिं निर्णय यायेफइमखु, थःथः ल्वाइ धकाः निर्णय याःगु धायेत नं च्वय् च्वंपिं जक गुलि निर्णय यायेफुपिं खः धकाः सकसिनं स्वया हे वयाच्वंगु खँ खः । 

घटनाक्रम स्वयेबलय् प्रदेश ३ या मुख्य मन्त्री भाजुं थःगु पार्टीया पासापिसं हे थीथी खँ ल्हाःगु हुनिं यानाः थःगु खँ लागू जुइमफइगु खनाः नेतातय्त थःगु अधिकार लःल्हाःगु खनेदु । थ्व धइगु खँ प्रधानमन्त्री जूम्हेस्यां न्हापा दरबारयात प्रजातन्त्र लःल्हात धइथें ज्वःगु खँ खः । दन्हापा काँग्रेसं प्रधानमन्त्री जुयाच्वंम्ह प्रधानमन्त्री मातृका कोइरालां जक राजिनामा बियाः दरबारयात सत्ता लःल्हात व लिपा हानं जुजुया निगाहया प्रधानमन्त्री जुल । अथे हे तुं शेर बहादुर देउवां नं थःत हे असक्षम धायेकाः दरबारयात सत्ता लःल्हायेत बलिको बोका जूगु खः । थुकथं हे ३ नंं मुख्यमन्त्रीं संसदया सामना यानाः थःगु एजेन्डा पास मजुइगु खनाः नेतातय्त अधिकार लःल्हाःगु वय्कःया अभिव्यक्तिं खनेदु । 

 

Categorized in बिचा: