Header Nepal rastra bank Adv

पहिचानया आन्दोलनया नितिं येँया मेयरय् जिगु उम्मेदवारी : डा. सैंजु

नेवा: अनलाइन न्युज – ललेन्द्र शाक्य | २०७९ बैशाख २३, शुक्रबार १२:१४:०१

नेपाः राष्ट्रिय पार्टीया नायः डा. विजय सैंजुं येँ महानगरय् मेयरया उम्मेदवारी पहिचानया आन्दोलन न्ह्याकेगु  नितिं जूगु विचाः प्वंकादीगु दु ।

नेवाः अनलाइनन्यूजलिसे खँ ल्हासें वय्कलं पहिचानया आन्दोलन आन्दोलनकारीपिन्सं ल्वःमंकाः यंकूगुलिं थःपिन्सं उम्मेदवारी बियाः उगु आन्दोलनयात निरन्तरता बिइगु कुतः यानागु खँ कनादीगु दु ।

डा. सैंजुं थःगु खँ तयेगु झ्वलय् येँय् मेयरया उम्मेदवारीइ जिल्ला पिनेया खय्तसें स्वतन्त्र उम्मेदवार धकाः बियाच्वंगु इलय् थःपिनिगु उम्मेदवारी महत्वपूर्ण जूगु खँ तयादिसें येँ दुने ३० प्रतिशत जक पार्टीया भोट दूगु व ७० प्रतिशत स्वतन्त्र जनताया भोट दूगुलिं थःपिं न्ह्यःने हे दूगु विचाः नं प्वंकादीगु दु ।

नेपाः राष्ट्रिय पार्टीया संगठन येँय् लिसें २३ गू जिल्लाय् दूगु जानकारी बियादिसें थुगु स्थानीय तहया निर्वाचनय् मकवानपुर, गोरखा, तनहुँ, नुवाकोटय् वडाध्यक्षलिसें वडा सदस्यया उम्मेदवारी कथं पार्टीं उम्मेदवार ब्यूगु जानारी नं वय्कलं बियादिल ।

नेवाः समुदायया नितिं पलिस्था जूगु नेपाः राष्टिय पार्टीयात नेवाःतसें हे च्यूताः मतःगु खँयात कयाः डा. सैंजुं विस्तारं नेवाःत सचेत जुयाः थःगु नितिं थःगु हे पार्टी माः धकाः न्ह्याःवइगु भलसा थःपिन्सं कयागु खँ नं वय्कलं कनादिल ।

भाजु सैंजुं पहिचानया पक्षधरलिसे पार्टी एकीकरण जुइफूगु विचाः नं तयादीगु दु । लिसें वय्कलं तःधंगु पार्टी कांग्रेस, एमाले पहिचान विरोधी पार्टी जूगुलिं उगु पार्टीं उम्मेदवार जूपिन्त जनतां पराजय यायेमाःगु विचाः नं तयादीगु दु ।

नेपाः राष्ट्रिय पार्टीया नायः डा. विजय सैंजु स्वंगू दशक न्ह्यःनिसें बालअधिकार व मानवअधिकार क्षेत्रय् आवद्ध व्यक्ति खःसा नेपालय् दकले न्हापां बालअधिकार सम्बन्धी पिएचडी यानादीम्ह खः ।

अथेहे, वय्कः नेपालभाषा ख्यःया सक्रिय व्यक्तित्व खः ।

Categorized in नेवाः