Header Nepal rastra bank Adv

पर्यटनमन्त्री प्रेमबहादुर आलें माधव नेपालयात लःल्हात राजीनामा पौ

नेवा: अनलाइन न्युज – ललेन्द्र शाक्य | २०७९ आषाढ १२, आइतबार १३:५४:२१

नागरिक उड्डयन व पर्यटनमन्त्री प्रेमबहादुर आलें मन्त्री पदं राजीनामा ब्यूगु दु । आलें पार्टी नायः माधवकुमार नेपालयात राजीनामा पौ लःल्हाःगु खः ।

आलें शुक्रवाः थःम्हं ४८ घौ दुने राजीनामा बिइगु घोषणा याःगु खः । वहे कथं नायः नेपालयात राजीनामा पौ लःल्हाःगु आले लिक्क लाःगु स्रोतं जानकारी ब्यूगु दु ।

उगु स्रोतं धाःगु दु, ‘राजीनामा पौ नायःयात लःल्हायेधुंकूगु दु । नायः नं प्रधानमन्त्रीलिसे सल्लाह यानाः न्ह्यःने यंकेगु ज्या याइ ।’

मन्त्री आलें थःगु कार्यकालय् जूगु ज्याया धलः सार्वजनिक यायेगु तयारी तकं याःगु दु ।

आलेलिसें, विरोध खतिवडा, किसान श्रेष्ठ, रामकुमारी झाँक्री व मन्त्री मजूपिं मेपिं सांसद लिसें यानाः १० म्हेस्यां मन्त्रिपरिषद हिलाबुलाप्रति असन्तुष्टि प्वंकूसें नायः माधवकुमार नेपालयात ध्यानाकर्षण पौ लःल्हाःगु दु ।

तर लिपा ल्हाःचिं तःपिंमध्ये पर्यटनमन्त्री आलेलिसें ६ म्ह सांसदं नां लितकाःगु खः ।

Categorized in राजनीति