zero media family planning adv

पब्जीया विकल्पय् ...फौजी...हयेगुलि हिरो अक्षय कुमार

नेवा: अनलाइन न्युज – ललेन्द्र शाक्य | २०७७ भाद्र २३, मंगलबार १३:३७:१८

भारतय् चिनियाँ गेमिंग एप पब्जीइ प्रतिबन्ध तयेधुंकाः भारतीय हिरो अक्षय कुमारलिसे जानाः एककोर गेम्स नांया कम्पनीं ...फौजी...मोबाइल गेम हइगु जूगु दु । थुगु मोबाइल गेमयात पब्जीया प्रतिस्पर्धीया रुपं स्वःगु दु ।

कम्पनीं ब्यूगु जानकारी कथं अक्टोबरया लिपांगु ईतकया दुने बजारय् थुगु गेम वइ । कम्पनीया संस्थापक विशाल गोन्डलं बुखँ एजेन्सी रोयटर्सलिसे खँ ल्हासें थुगु गेमया पूवंक नां ...फियरलेस एण्ड युनाइटेड गार्डस्... जूगु धाःगु दु ।

वं थुगु गेम निर्माणया नितिं ताःई न्ह्यःनिसें ज्या जुयाच्वंगु न्ह्यथंगु दु । वं गेमया न्हापांगु लेभल भारतया चीनलिसेया सीमा विवाद जूगु गलवान घाटीइ आधारित जूगु धाःगु दु ।

वंगु जुन महिनाय् भारत व चिनियाँ सेनाया दथुइ गलवान घाटीइ ल्वापु जूगु खः । उगु ल्वापुइ कम्ती नं २० म्ह भारतीय सैनिकया ज्यान वंगु खः । वधुंकाः थुखे निगू मुलुकया दथुइ तनाव ब्वलनाः वयाच्वंगु दु ।

तनाव अप्वयेधुंकाः भारतं लोकंह्वाःगु गेमिंग एप पब्जीलिसें चिनियाँ कम्पनीं निर्माण याःगु ११८ मेमेगु मोबाइल एपय् बुधवाः प्रतिबन्ध तयेगु निर्णय याःगु खः ।

भारतय् लिपांगु दँ थुखे पब्जी अतिकं लोकप्रिय जुयाः वयाच्वंगु दु । हलिंन्यंकं पब्जी म्हितीपिंमध्ये थ्यंमथ्यं २५ प्रतिशत भारतीय दु । चीनय् १७ व अमेरिकाय् ६ प्रतिशत पब्जी म्हितीपिं दु ।

कम्पनीया सहसंस्थापक गोल्डेनया कथं थुगु मोबाइल गेमपाखें जुइगु आम्दानीया २० प्रतिशत भारतया नितिं सहिद जूपिं छेँजःया दुजःपिन्त बिइगु जुइ ।

कम्पनीया कथं थुगु गेमया नां ...फौजी... हिरो अक्षय कुमारं हे तःगु खः । शुक्रवाः अक्षय कुमारं सामाजिक संजाल ट्विटरपाखें थुगु गेमया विषयस जानकारी ब्यूगु खः । वं थुगु गेम हयेत्यंगुलिं थःत गर्व महसूस जुयाच्वंगु धाःगु दु ।

Categorized in कासा