city axpris 2

पपुवा न्युगिनीविरुद्ध नेपालं अःपुक्क त्याकल, क्वालिफायर लिक्क

नेवा: अनलाइन न्युज – ललेन्द्र शाक्य | २०७९ फाल्गुण २९, सोमबार १३:२३:३६

आईसीसी क्रिकेट विश्वकप लिग टु कासाय् नेपालं पपुवा न्युगिनीविरुद्ध अःपुक्क त्याकूगु दु ।

किपूया त्रिवि क्रिकेट ख्यलय् टस बुकाः न्हापां ब्याटिङ याःगु पपुवा न्युगिनीं ३२ ओभरय् फुक्क विकेट गुमेयानाः ९४ रन दयेकूगु खः । नेपालं १ विकेट गुमेयानाः ७.४ ओभरय् लक्ष्य पूवंकूगु खः ।

नेपाःया नितिं आसिफ शेखं अर्धशतक पूवंकल । वं २१ बल म्हिताः ८ चौका व ३ छक्काया ग्वाहालिं अविजित ५३ रन दयेकूगु खः ।

कुशल भुर्तेलं १४ बल म्हिताः ४ चौका व २ छक्का ग्वाहालिं ३३ रन दयेकूगु खः । न्हापांगु विकेटया नितिं कुशल भुर्तेल व आसिफ) ३.३ ओभरय् हे ५१ रनया साझेदारी याःगु खः । भुर्तेल आउट जुइधुंकाः आसिफं मेम्ह कुशल मल्ललिसे मिलेजुयाः नेपाःयात त्याकेत ताःलाकूगु खः । कुशल मल्लं अविजित १२ रन दयेकूगु खः । १३ बल म्हितूम्ह वं १ चौका व १ छक्का प्रहार याःगु खः ।

घरेलु मैदानय् जुयाच्वंगु लिट टु कासाया लिपांगु श्रृंखलाय् मदिक्क स्वक्वः त्याकेधुंकाः आः नेपाः विश्वकप क्वालिफायरय् थ्यंकेगुलि छगू जित जक तापानाच्वंगु दु । आः नेपाःया लक्ष्य लिग टु या शीर्ष स्वंगूलि च्वनाः जिम्बाब्बेय् वइगु जुन व जुलाईस जुइगु विश्वकप क्वालिफायर म्हितेगुलि दु । उकिया नितिं नेपालं बिहिवाः जुइगु लिग टु या हे लिपांगु कासाय् युएईयात बुकेमालीगु जूगु दु ।

लेग स्पीनर सन्दीप लामिछानें ५ विकेट कायेधुंकाः टस बुकाः न्हापां ब्याटिङ  याःगु पपुवा न्युगिनी (पीएनजी) ३२ ओभर म्हिताः ९५ रनय् हे अलआउट जूगु खः ।

पीएनजीया १० मध्ये ९ विकेट नेपाली स्पीनरं काःबलय् सन्दीप याकःचां ५ विकेट काःगु खः । वं १० ओभरय् १ मेडन तसें २५ रन जक खर्चेयानाः सर्वाधिक ५ विकेट काःगु खः ।

सन्दीपं लिग टु कासाय् निक्वःगुखुसि ५ वा वसिबें अप्वः विकेट काःगु खः । वसिबें न्ह्यः २०२० स नेपालय् हे जूगु लिग टु स अमेरिकाविरुद्ध वं ६ विकेट काःगु खः ।

अथेहे, ललित नारायण राजवंशीं ७ ओभरय् १ मेडन तसें १३ रन खर्चेयानाः २ विकेट काःगु खः । कुशल मल्लं ३ ओभरय् १ मेडन तसें ६ रन खर्चेयानाः २ विकेट काःगु खः । सोमपाल कामीं ५ ओभरय् २ मेडन तसें २२ रन खर्चेयानाः १ विकेट काःगु खः ।

पीएनजीया नितिं कप्तान असद भालां दयेकूगु २० रन हे व्यक्तिगत उच्च स्कोर जुल । सेस बाउ १८, चाल्र्स अमिनी १६ व हिरी हिरी १४ रन दयेकाः आउट जुल । ल्यंदुपिं कासामिपिन्सं दोहोरो अंकय् रन मुंके मफुत ।

Categorized in कासा