nepal investment baink

पपुवा न्युगिनीयात बुकाः नेपाः फाइनलय्

नेवा: अनलाइन न्युज – ललेन्द्र शाक्य | ने.सं. ११४४ सिल्लागा दुतिया (२०८० फागुन २९ गते)

नेपालं त्रिकोणात्मक टी–२० आईसिरिजय् पपुवा न्युगिनीयात ८५ रनं बुकुसें फाइनलय् थाय् पक्का याःगु दु ।

नेपाः निगू कासाय् ३ ल्याःया लिसें शीर्ष थासय् च्वनाः फाइनलय् थ्यंकूगु खः ।

त्याकेगु नितिं १९९ रनया आज्जु काःगु पपुवा न्युगिनी १६.१ ओभरय् ११३ रनय् अलआउट जूगु खः । पपुवा न्युगिनीया हिरी हिरीं १९ बलय् १ चौका व २ छक्कालिसें सर्वाधिक २८ रन दयेकूगु खः । टोनी उरा १३ व सेसेबाउ २१ रनय् आउट जूगु खः । मेगु सुं नं ब्याटरं बांलाःगु प्रदर्शन यायेमफुत ।

नेपाःया कुशल भुर्तेलं ४ ओभरय् १२ रन खर्चेयानाः ४ विकेट काःगु खः । प्रतिश जिसीं ४ ओभरय् ४० रन खर्चेयानाः २ विकेट काःगु खः । गुलशन झा व आकाश चन्दं छगू छगू विकेट काःगु खः ।

वसिबें न्ह्यः मोगंकोगंय् टस बुकाः न्हापां ब्याटिङ याःगु नेपालं २० ओभरय् ६ विकेट गुमेयानाः १९८ रन दयेकूगु खः । नेपाःया जितय्कुशल भुर्तेलं ३९ बलय् ४ चौका व ४ छक्कालिसें सर्वाधिक ५९ रन दयेकूगु खः ।

सन्दीप जोरां २६ बलय् ३ चौका व ४ छक्कालिसें ५६ रन दयेकूगु खः ।

टी–२० आईस कुशल भुर्तेलया च्याक्वःगु व सन्दीप जोराया निक्वःगु अर्धशतक खः ।

नेपाःयात ओपन विनोद व कुशल भुर्तेलं ७.३ ओभरय् ६४ रनया सुरुवात ब्यूगु खः । विनोद भण्डारी २२ बलय् २ चौका व १ छक्कालिसें २७, रोहित पौडेल  व आरिफ शेख ४ रनय् आउट जूगु खः ।

लोकेश बम ६ बलय् २ छक्कालिसें १४ रनय् रन आउट जूगु खः । विवेक यादव ४ बलय् ३ छक्कालिसें १९ रनय् नट आउट जूगु खः । गुलशन झा १२ बलय् १ छक्कालिसें १५ रनय् नट आउट जूगु खः ।

पपुवा न्युगिनीया असाद भालां ३ ओभरय् १८ रन खर्चेयानाः २ विकेट काःगु खः । नोसैना पोकना, जोहन कारिको व नर्मन भानुआं छगू छगू विकेट काःगु खः ।

नेपाः व हङकङ दथुया न्हापांगु कासा वा वःगु हुनिं रद्ध जूगु खः । पपुवा न्युगिनीं छुं ईलिपा थौं हे हङकङलिसे हे म्हितीगु जूगु दु । गुकिया विजेतां बुधवाः नेपाःलिसे फाइनलय् धेंधेंबल्ला याइगु जूगु दु ।

Categorized in कासा