2565 buddha Jayanti ADV

पपस्टार भीम तुलाधरया ‘दोष’ पप किङ्ग ओमविक्रम विष्टं मंगलवाः सार्वजनिक याइगु

नेवा: अनलाइन न्युज – ललेन्द्र शाक्य | २०७८ जेठ १७, सोमबार १९:२९:०४

४० या दशकय् अतिकं लोकंह्वाःगु ‘दि इन्फ्ल्युन्स ब्याण्ड’या मू गायक भीम तुलाधरया ‘भनिदेऊ मायालु...’ लिपा २०४६÷०४७ सालपाखे ‘जिजीविषा’ म्येचाः पिदंगु खः । थुगु म्येचाः अतिकं लोकंह्वाःगु खः । थ्वहे म्येचाः दुने दुथ्याःगु छपू म्ये ‘दोष म कस्लाई दिऊँ, यो भाग्यलाई दिऊँ या तिमीलाई...’ म्ये नं अतिकं लोकंह्वाःगु खःसा आः थ्वहे म्येया म्यूजिक भिडियो सार्वजनिक जुइगु जूगु दु । 

भेट्रान पपस्टार भीम तुलाधरं जानकारी बियादी कथं थुगु म्ये रिमेक कथं न्हूगु बाखंया आधारय् व न्हू ढंगया स्क्रीप्टया आधारय् म्यूजिक भिडियोया रुपं पिदनेत्यंगु दु ।

नेपाःया लोकंह्वाःम्ह भेट्रान पपस्टार भीम तुलाधरया न्हूगु म्यूजिक भिडियो ‘दोष’ कन्हय् मंगलवाः सार्वजनिक जुइत्यंगु दु । पपस्टार तुलाधरं थःगु फेसबुक वाल व यूट्युब च्यानलपाखें सार्वजनिक यायेत्यंगु दु । 

पपस्टार तुलाधरं धयादी, ‘कन्हय् मंगलवाः सुथय् ९ ता इलय् जूप एपपाखें भच्र्युअल ज्याझ्वः यासें म्यूजिक भिडियो सार्वजनिक यायेत्यनागु दु । नेपाली संगीत क्षेत्रय् पप किङ्ग कथं म्हस्यूम्ह बरिष्ठ गायक ओमविक्रम विष्टया ल्हाःतं दोष...म्यूजिक भिडियो सार्वजनिक जुइत्यंगु दु । उकिं कन्हय् मंगलवाः सुथय् जूम एपया भच्र्युअल म्यूजिक भिडियो सार्वजनिक ज्याझ्वलय् सहभागी जुइत सकल संगीतह्यःमिपिन्त इनाप यानाच्वना ।’

न्हापा बि.सं.२०४६/०४७ पाखे ‘जिजीविषा’ म्येचाः दुने पिदनेत्यंगु म्यूजिक भिडियोया म्ये ‘दोष’ भुपालमान सिंहं संगीत संयोजन यानातःगु खःसा आः रिमेक कथं भुपेन्द्र बज्राचार्यया संगीत संयोजनय् पपस्टार तुलाधरं हालादीगु खः ।

थ्व म्ये ‘दोष...’या विषयस भीम तुलाधरं धयादी, ‘जिजीविषा म्येचाः पिथनेधुंकाः उगु इलय् थ्व म्ये अतिकं लोकंह्वाःगु व आपालं आपाः संगीतह्यःमिपिन्सं ययेकूगु म्ये खः, थ्व म्ये जिं स्वयं थःत नं अतिकं यःगु म्ये खः । उकिं आःया न्हूपुस्ताया ट्रेन्ड कथंया संगीत संयोजनय् हाकनं थःगु सलं रिकर्ड यानागु खः ।’

निरन्तर रुपं संगीत ख्यलय् पलाः न्ह्याकाः वयाच्वनादीम्ह पपस्टार भीम तुलाधरं आःतकया दुने दर्जनौं याकः म्येचाः पिथनाः बजारय् हयेधुंकूगु दुसा वय्कःया ‘सपनीमा’ व ‘जीजिविषा’ म्येचाः अतिकं लोकंह्वाःगु म्येचाः खः । अथेहे, तुलाधरया नेपालभाषाया म्येचाः ‘भीम तुलाधरया जः’ म्येचाः नं अतिकं लोकंह्वाःगु म्येचाः खः ।

कन्हय् मंगलवाः सुथय् सार्वजनिक जुइगु म्यूजिक भिडियो म्ये ‘दोष’ म्येया म्येच्वमि कविन्द्रमान शाक्य व ओमहरी श्रेष्ठ खःसा लय् स्वयं गायक भीम तुलाधरं चिनादीगु खः । 

अथेहे, म्यूजिक भिडियोया परिकल्पना व निर्देशन रवि सायमिं यानादीगु दुसा भवानी शिलाकारं क्यामेरा पर्सनया भाला कुबियादीगु दु ।

थ्वहे झ्वलय् म्यूजिक भिडियोया सम्पादन वाइल्ड बुल्स प्रोडक्सनया दुसा म्यूजिक भिडियोय् निरोज शाक्य व डान्सिङ्ग क्वीन आराध्यालक्ष्मी खड्गीं जीवन्त अभिनय यानादीगु दु ।

Categorized in कला