नेवा: अनलाइन न्युज – ललेन्द्र शाक्य | २०७७ चैत्र २७, शुक्रबार १४:२०:३६

सांसद पद गुमेयाःपिं प्यम्ह नेतापिन्सं थौं शुक्रवाः हाकनं मन्त्री पदया सपथ काइगु जूगु दु ।

माओवादी केन्द्र त्वःता आः नकनिति एमाले दुहाँ वंपिं टोपबहादुर रायमाझी, लेखराज भट्ट, प्रभु शाह व गौरीशंकर चौधरीयात प्रधानमन्त्री केपी शर्मा ओलीं मन्त्री पदय् हाकनं नियुक्तिया सिफारिस याःगु खः ।

इमिगु सपथ ज्याझ्वः थौं शुक्रवाः सनिलया ५ ता इलय् क्वःछिनातःगु प्रधानमन्त्रीया प्रेस सल्लाहकार सूर्य थापां जानकारी ब्यूगु दु ।

आः नकतिनि एमाले केन्द्रीय दुजलय् मनोनित जूपिं इमित नेकपा माओवादी केन्द्रं दलपाखें निष्काशनया कारवाही याःगु खः । राजनीतिक दलसम्बन्धी ऐनय् सांसदयात निर्वाचित जूगु दलं निष्काशन यायेधुंकाः सांसद पदपाखें नं पदमुक्त जुइगु व्यवस्था दु ।

माओवादी केन्द्रं कारवाही याःगु सुचं सभामुख अग्नीप्रसाद सापकोटां संसद बैठकय् वाचन यायेधुंकाः प्यम्हं मन्त्रीया सांसद पद खारेज जूगु खःसा सांसदपिनिगु हैसियतय् काःगु मन्त्री पदपाखें नं पदमुक्त जूगु खः ।

पदमुक्त जूपिं इमित प्रधानमन्त्री ओलीं हाकनं नियुक्तिया नितिं सिफारिस याःगु खः । सांसद मजूपिं व्यक्ति नं ६ महिनातक मन्त्री जुइफइगु संवैधानिक व्यवस्था दु ।

Categorized in राजनीति