ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

पंचायतकालय् नं थुलि अप्वः विकृति मजू : विप्लव

नेवा: अनलाइन न्युज – ललेन्द्र शाक्य | २०७८ श्रावण ६, बुधबार १७:१४:००

जनमत संग्रह यायेगुलि मवंसे सुख हे दइमखु : विप्लव

नेपाल कम्युनिष्ट पार्टीया महासचिव नेत्रविक्रम चन्द विप्लवं संसदीय व्यवस्थाया औचित्य समाप्त जुइधुंकूगु धाःगु दु । येँय् पार्टीया अंग्रेजी मुखपत्र रेडफ्रन्ट विमोचन यासें विप्लवं आः पंचायतकालय् सिबें आपालं विकृति अप्वः हे खनेदयावःगु धाःगु दु ।

राजनीतिया दलालीकरण जूगु धासें विप्लवं थःगु देसया निर्णय थःपिन्सं हे कायेमफूगु अवस्था दूगु धाःगु दु । विप्लवं धाःगु दु, ‘आः पार्टी एकता यायेत विदेशी माः, पार्टी फुटाऊ यायेत विदेशी माः, वासः यायेत विदेश माः, पंचायतय् नं थुलि अप्वः विकृति मजू । दलालीकरणया भद्दारुप आः खनेदयाः वयाच्वंगु दु ।’

फुक्क खँया थःपिन्सं हे निर्णय यायेगु अवस्था ब्वलंकेत वैज्ञानिक समाजवादया लँपुइ वनेमाःगु विप्लवं धाःगु दु । वैज्ञानिक समाजवादया विषयस जनमत संग्रहस मवंसे सुख हे मदूगु विप्लवया धापू दु ।

गुलिखे जनमत संग्रहस वनेत आःया दलं बिइ ला ? धकाः न्ह्यसः नं तयेगु यानाहःगु धासें विप्लवं धाःगु दु, ‘थ्व मबिल धाःसा लाकाः नं कायेगु खँ खः । २०३६ सालय् जनमत संग्रह यायेज्यूसा आः छाय् मज्यू ?’

विप्लवं न्ह्यसः तसें धाःगु दु, ‘सत्ता कायेत देस हे मिइत स्वइगु, राज्य व राष्ट्रयात सुविधाया नितिं कालबिल याइगु विषय गथे वयाच्वंगु दु ? थनया जमिन दलालया ल्हातय् दु, घडेरी न्यायेत जिन्दगीभर क्वँय् च्वलाः नं फइमखु, चरम माफियाकरण दु ।’

आःया व्यवस्थाय् कम्युनिष्टं पूँजीवादीया सेवा यानाच्वंगु धासें विप्लवं थ्व लज्जास्पद जूगु धाःगु दु । विप्लवं नेपाली कांग्रेसयात नं न्ह्यसः तःगु दु, ‘छिकपिन्सं धाःगु लोकतान्त्रिक समाजवाद व संसदीय व्यवस्था छगू हे खः ? मखुसा उगु विषयस छाय् न्वःवायेगु मयाना ?’

 

Categorized in राजनीति