zero media family planning adv

न्हूम्ह गायिका सुमनया भ्वासि जुया म्ये पिदन

नेवा: अनलाइन न्युज – ललेन्द्र शाक्य | २०७८ बैशाख १६, बिहिबार १३:४२:३४

नेपालभाषा संगीत ख्यलय् कोरोना महामारीया हुनिं जूगु लकडाउनया जःखः आपालं म्युजिक भिडियो पिहाँ वयाच्वंगु दुसा थुगुसी लकडाउन जुइ छन्हु न्ह्यः बुद्धवाः सुमन श्रेष्ठ मुना नांयाम्ह न्हूम्ह गायिकाया छपु न्हूगु म्येया पितब्वज्या जुउगु दु । नांजाःम्ह व लोकंह्वाम्ह कलाकार रुपेन्द्र श्रेष्ठ थक्वाःमिया नापनापं थ्वहे म्येपाखें दुहाँ वःम्ह न्हूम्ह मोडल मुस्कान राजभण्डारीं अभिनय यानातःगु ...भ्वासि जुया... बोलया थ्व म्येया च्वमि चन्देश्वर महर्जन खःसा संगीतकार सुरेन्द्र श्रेष्ठ खः ।

थ्व म्येया म्युजिक भिडियोया निर्देशन नेपालभाषाया नांजाःम्ह संकिपा निर्देशक रामकृष्ण खडगीं यानादीगु खःसा किपालुमि रकि महर्जन, छ्याय्फ्वायकःमि बालकृष्ण बंशी खः ।

यल पूच्वया एम्बियन्स ३६५ य् जूगु पितब्वज्या ज्याझ्वलय्  विशिष्ट पाहाँ नांजाःम्ह संगीत न्ह्यलुवाः अमरराज शर्मा राजोपाध्यायं म्येया प्रस्तुति स्वया थःयात थःगु ल्याय्म्ह ई लुमना वल धकाः धयादिलसा मेम्ह पाहाँ भजन साम्राज्ञी धकाः धयातःम्ह रमना श्रेष्ठं गायिका सुमन श्रेष्ठ नेवाः संगीतख्यःया छम्ह बाँलाःम्ह प्रतिभा खः धकाः धयादिल ।

थ्व पितब्वज्या ज्याझ्वः विशिष्ट पाहाँ राजोपाध्यायं त्वाःदेवाय् मत च्याकाः उलेज्या यानादीगु खः । गायिका मुनाया अबुजु रामहरि श्रेष्ठया सभानायःसुइ जुउगु ज्याझ्वलय् थ्व म्येलिसे स्वापू दुपिं सकसिनं थःथःगु नुगःखँ तयादीगु खःसा नांजाःम्ह संकिपा पत्रकार विजयरत्न असंबरें न्हूम्ह गायिका सुमन श्रेष्ठ व न्हूम्ह मोडल मुस्कान राजभण्डारीं थ्व ख्यलय् थःगु पलाः क्वातुके फइगु सम्भावना दु धकाः धयादिल ।

Categorized in कला