न्हूदँ समारोहया तिथि पौ छ्यलेत इनाप
नेवा: अनलाइन न्युज – ललेन्द्र शाक्य | २०७८ कार्तिक २५, बिहिबार ११:१८:३२
नेपाल संवत राष्ट्रिय न्हूदँ समारोह समिति ११४२ पाखें दँय् दसं पिथनीगु नेपाल संवतया तिथि पौं (नगुमा) छ्यलेत तिथि पौ उपसमितिया कजि देवदास मानन्धरं इनाप यानादीगु दु ।
कछलाथ्व पारु न्हूदँकुन्हु बसन्तपुरय् जूगु भिन्तुना सभाय् प्रधानमन्त्री शेरबहादुर देउवां उलेज्या याःगु उगु तिथि पौ देय् न्यंकं थ्यंकेगु तयारी जुयाच्वंगु खँ मानन्धरं कनादीगु दु ।
लिसें वय्कलं उगु तिथि पौ येँय् सितिकं भोताहितिया नातिबज्रया सफू धुकू, रक्तकालीइ च्वंगु आशा सफू कुथि च्वंगु सफू धुकू, देसय् मरु झ्याः क्वसं च्वंगु निरन स्टेशनरी, थायमदुया पवन तुलाधरया पत्रिका पसः, थँहितिइ शान्ति शिक्षा मन्दिर न्ह्यःने च्वंगु श्याम स्टेशनरी पसः व नेपालभाषा टाइम्स न्हिपौ असं थायमदु लागाय् इनेगु थासय् कायेफइगु खँ कनादीगु दु ।
तिथि पौ उपसमितिं थुगु तिथि पौ येँ, यल व ख्वपलिसें किपू, भ्वत, पन्ती लिसेलिसें थीथी नगरपालिका व वडा ज्याकुथिइ इनेगु ज्या यायेत्यंगु दु ।
थुगु तिथि पौ दुने नेपाल संवत, ईस्वी संवत व विक्रम संवत स्वतां तिथिमिति दुसा नेपाल संवतया तिथि गुकथं हिली, थुकिया चन्द्रमास गति नं दुथ्याकातःगु दु ।
Categorized in नेवाः