coved ad

न्हूदँया लसताय् रमेश महर्जन बियादिगु न्वचु

नेवा: अनलाइन न्युज – निश्चल | २०७८ कार्तिक २, मंगलबार ०७:२७:४६

न्हूदँया लसाताय् रमेश महर्जन बियादिगु न्वचु

(वंगु निदँ न्ह्यः नेपाल सम्बत् न्हुदँ राष्ट्रिय समारोह समिति ११४० या ग्वसालय् येँया बसन्तपुरय् जुगु भिंतुना सभाय् नायः कथं रमेश महर्जनं बियादिगु न्वचु थन न्ह्यब्वयाच्वना, भाजु महर्जन म्हिगः कोरनाया हुनिं आकाझाकां मदुगु खः । वयकःया लुमतिं उगु इलय् बियादिगु न्वचु आः नं महत्वपूर्ण खनेदुगुलिं न्ह्यवयाच्वना–स.)

नेपाःया म्हसिका, नेपाःया गौरब

राज्यं हे छ््यलेमाः, नेपाल सम्बत्

नेपाल सम्बत् ११४० न्हुदँया भिन्तुना

थ्व हे नारा ज्वनाः थौं झी थन न्हुदँ हं वयाच्वना ।

नेपाल सम्बत् न्हुदँ राष्ट्रिय समारोह समिति ११४० या ग्वसालय् न्ह्यानाच्वंगु थुगु न्हुदँ समारोहया मू पाहाँ सम्माननीय प्रधान मन्त्री खड्ग प्रसाद ओलिज्यू, झी सकस्यां हनाबना तयावयाच्वनाम्ह वाङमय शताब्दी पुरुष सत्यमोहन जोशीजु, नेपाल सम्बत् आन्दोलनया न्ह्यलुवा लिसें नेपालभाषा मंकाः खलःया नायः जनकवि दुर्गालाल श्रेष्ठज्यु , दबुलिइ आशण ग्रहण यानादीपिं अतिकं हनेबहपिं सल्लाहकार कथं नेपाल संबत्या आन्दोलनय् निरन्तर ज्वः मदुगु योगदान बियाः वयाच्वनादिइपिं पुर्व नायःपि, अथेहे दबुलिइ आशण ग्रहण यानादिइपिं भाषा आन्दोलनया न्ह्यलुवा व्यक्तित्वपिं, हनेबहपिं संघीय सांसद भाजुपिं, प्रदेश सभाया सांसद भाजु मय्जुपिं येँ महानगरपालिकाया मेयरभाजु व उपमेयर मय्जु अथे हे दबुलिइ दुपिं सकल हनेबहःपि नापं थौंया न्हूदँ ¥यालिइ ब्वतिकया झायादीपिं बाजं खलःया दाजु किजा तता केहेँपिं, थी थी खलः पुचः, संघ संस्था, क्लबपाखें झायादिइपिं व पत्रकार भाजु मय्जुपिं अले सुरक्षा निकाययात जि रमेश महर्जन नापं नेपाल सम्बत न्हुदँ राष्ट्रिय समारोह समिति ११४० पाखें हनाबना तयाच्वना । लसकुस यानाच्वना । 

थौंया थुगु भिन्तुना सभाय् दकसिबे न्हापां मदुम्ह नेपाल संबत् आन्दोलनया प्रणेता पद्मरत्न तुलाधरयात लुमंका च्वना , श्रद्धा प्वंकाच्वना । वय्कःया ज्वःमदुगु नेतृत्वया अभाव थौं झीसं, लोकतान्त्रिक राजनीतिक आन्दोलनया ख्यलं, साँस्कृतिक सामाजिक आन्दोलनया ख्यलं, मानवअधिकार आन्दोलनया ख्यलं, नेपालभाषा साहित्य व नेपाल संबत्या आन्दोलनया ख्यलं महसुुस यानाच्वनागु दु । सायद न्हापांगु पटक जुइफु थ्व बसन्तपुरया दबुलिइ वय्कःया उपस्थिति विना झीसं न्हूदँया समारोह ग्वसाः ग्वयाच्वना, न्हूदँ हनाच्वना ।

 दँय् दसं थे थुगुसिइ नेपाल सम्बत् ११४० न्हूदँ तःजिक हनेत जितः नायः ल्ययाः नेपाल सम्बत न्हुदँ राष्ट्रिय समारोह समिति ११४० गठन जूगु खँ छिकपिसं स्यूगु हे जुल । नेपाल सम्बत्यात राज्यपाखें राष्ट्रिय सम्बत् घोषणा याकेगु राष्ट्रवादी नेपाःमि पिनिगु मदिक्क न्ह्यानावयाच्वंगु आन्दोलनया निरन्तरता कथं थुगु न्हूदँ समारोह समिति निस्वनेगु ज्या जूगु छिकपिं सकलसित इनाप यानाच्वना । अले थुगुसिइ जितः नायः ल्यया दिइगुलिं छिकपिं सकलसित थ्व सभाया दबुलिं नं सुभाय् देछानाच्वना । जिगु क्षमतां फुगु तक थुगु आन्दोलनया नितिं थुगुसि व लिपा नं मदिक्क जिगु सक्रियता दइगु बचं जिं वियाच्वना ।

नेपाल संबत्या न्हूदँं हनेगु झी नेपाःमि जुयागु पहिचान न्ह्यब्वय्गु खः । झीसं दय्दसं न्हुदँ हनाः झीगु थीथी मागयात सरकार पाखें कार्यान्वयन याका वयाच्वनागु दु । नेपाल सम्बतयात राज्यपाखें राष्ट्रिय सम्बतया मान्यता  बिइकेत, म्हपुजा कुन्हु नेपाल सम्बत् न्हूदँया नामय बिदा बिइकेगुया लागि गजेटय् च्वकेत, सुचना विभागया क्यालेण्डरय् नेपाल सम्बत् उल्लेख याकेत, नेपाल सम्बत् निस्वनादिइम्ह शंखधर साख्वाःयात नेपाःया राष्ट्रिय बिभुति घोषणा याकेत , शंखधरया किपाः दुगु हुलाक टिकट प्रकाशन याकेत अले नेपाल संबत् प्रतिष्ठान निस्वनेया नितिं सरकारयात कबोल ल्हाकेत थुगु आन्दोलन ताःलाये धुंकुगु दु ।

तर नेपाल सम्बत्यात राज्यं थःगु दक्व ज्या खँय् छ्यलेगु जुयाच्वंगु मदुनि, न्हापा न्हापायापिं प्रधानमन्त्री पिसं थुगु हे दबुलिइ दनाः बियाथकुगु यक्व यक्व बचनत राज्यं पूवंकुगु मदुनि, गथेकि प्रधानमन्त्रीया लेटर पायडय् नेपाल सम्बत् च्वयेगु आदि आदि । उकिं थुगुसिइया  न्हूदँया नारा नं “नेपाःया म्हसिका, नेपाःया गौरव, राज्यं हे छ्यलेमा नेपाल सम्बत् ” धैगु क्वःछिनागु खँ लिसा कयाः इनाप यानाच्वना । थुगु नारायात सार्थक यायेगु व याकेगु ज्या थुगु नेपाल सम्बत् न्हूदँ राष्ट्रिय समारोह समिति ११४० पाखें नेपाल सम्बत् ११४० ज्वःछि याइ धैगु बचं नं बियाच्वना । थ्व झीगु नेपाःमि जुया या साँस्कृतिक दायित्व नं खः ।

झी स्वनिगलय् च्वंपिं नेपाःमि जनता थःगु जात्रापर्व साँस्कृतिक रितितिथि व व्यवहार हनेत तसकं च्वन्ह्याः । स्वनिगःया सम्पदा सँस्कृति देय्या पहिचान कथं धस्वानाः देय्या इज्जत तयाच्वंगु दु, थ्व सकतांया नितिं झी पुर्खां गुथिया व्यवस्था यानाथकुगु दु । सरकारं नं देय्या सम्पदा सँस्कृति अझ बाँलायेमा धैगु चाहना यानाच्वंगु दु । उकिं सरकारं सम्पदा सँस्कृति बाँलाकेगु ज्या यायेबले सरोकारदुपिं सँस्कृतिह्यमि जनतानापं सल्लाह कायेगु सहकार्य यायेगु बाँलाइ थें ता । उकिया नितिं सँस्कृतिह्यमि गुथियारपिनिगु सम्मेलन यानाः सरकारयात ग्वाहालि यायेगु सल्लाह जुयाच्वंगु खँ थन लुमंका च्वना । 

थ्व हे सभां सकल नेपाःमिया पाखें थ्व नं इनाप यानाच्वना । भौतिक विकास जरुरी खः, तर रैथाने स्थानीय जनता विस्थापित जुइमालिगु, जात्रापर्व सँस्कृति सम्पदा न्हनावनीगु विकास थ्व देसं प्वनाच्वंगु मदु धैगु खँय् सरकार सचेत दु धैगु भलसा जिमिसं कयाच्वना । सकल नेपाःमि जनता समृद्ध जुइगु, खुसि सुखि जुइगु बिकास झीगु देसयात माःगु दु ।

महाकवि सिद्धिदास महाजुं धैबिज्यागु दु “भाषा म्वाःसा जाति म्वाइ” । उकिं थनया बिकासं स्वनिगःया नेपाःमि जनताया अस्तित्व रक्षा जुइमा धयाच्वने बले नेपालभाषा म्वाकेमा धैगु खँ निश्चित रुपं न्ह्योने वइ । उकिया नितिं अनिवार्य स्थानीय मातृभाषा शिक्षाया व्यवस्था सरकारं यायेमाःगु खँय् नं ध्यानाकर्षण यानाच्वना । नेपाल सरकारया शिक्षा नीति व पाठ्यक्रम छनोटया समूह निर्धारणया नीति भिंकेमाःगु खँ नं लिसा कयाः धयाच्वना ।

अन्तय् मधासे मगाःगु खँ थुगुसिइ नेपाल संबत् हनेधुंका म्हपुजा यायेगु कि छन्हु न्ह्यो म्हपुजा याना कन्हय् खुनु नेपाल संबत् हनेगु धैगु तिथि मितिइ अलमल जुल । मेगु दँ निसें थुकथंया अलमल मजुइकेत सम्बन्धित निकाय व समितिनाप सहलह न्ह्याकेगु न्हूदँ समारोह समितिया कुतः जुइगु खँ न्ह्यथनाच्वना , नापं थुकिइ छिकपिं सकलसियागु व नेपाल सरकारया ग्वाहालि तिबः दइ धैगु भलसा नं कयाच्वना । नापं नेपाल संबत् हनाः सनिलय् म्हपुजा हनिपिनि कन्हय् किजापुजा यायेमाःगु यात सम्मान यानाः झीगु इनापय् बिदा ब्यूगुलि नेपाल सरकारयात सुभाय् बियाच्वना ।

अन्तय् समारोह समितिया निमन्त्रणा स्वीकार यानाः थुगु सभाय् व्वति कयादीपिं नेपाल सरकारया सम्मानीय प्रधानमन्त्री, सांसदपिं, मेयर उपमेयरपिं, बाजं खलः व थीथी संघसंस्थाया दाजु किजा तता केँहेपिं, पत्रकार पासापिं सकलसित दुनुगलं निसें सुभाय् देछानाच्वना । न्हूदँया भिंतुना । सकलसियागु जय जुइमा, भिं जुइमा ।सुभाय्

 

Categorized in बिचा: