ad prabhu

न्हूदँया लसताय् पिदन न्हापांगु कोरोना सन्देशमूलक नगुमा

नेवा: अनलाइन न्युज – विजयरत्न | २०७७ मङ्सिर ५, शुक्रबार १३:३५:०७

नेपाःया नांजाःम्ह फोटोग्राफर राजभाई सुवालं थुगुसी न्हूदँ नेपाल सम्बत् ११४१ या लसताय् पिकाःगु नगुमा अथे धइगु क्यालेण्डर कोरोना विरुद्ध सचेतना ब्वलंकीगु सन्देश ह्वलेगु तातुना तया पिकाःगु दु ।

नीछदँ न्ह्यःनिसें नेपाल सम्बतया न्हूदँया लसताय् नेवाः तजिलजिं जाःगु नगुमा पिथना वयाच्वंम्ह फोटोग्राफर सुवालं थुगुसी कोरोना भाइरसया संक्रमणं पुनावइगु कोभिड १९ नांयागु विश्वव्यापि महामारीया विरुद्धय् सन्देश ह्वलाच्वंगु खँयात च्वछायेबहःगु खँ कथं कयाहःगु दुसा थुके मोडल कथं नेपाःया थीथी ख्यलय् तःधंगु योगदान बियावयादीपिं व्यक्तित्वपिनिगु किपाः छ्यलातःगुयात नं आपासिनं तारिफ हे यानाच्वंगु दु ।

थुगुसी पिदंगु नगुमाय् वाङमय शताब्दी पुरुष अतिकं हनेबहःम्ह सत्यमोहन जोशी, नेपाःया संगीत ख्यलय् गोल्डेन भ्वाइैस अफ नेपाल धकाः धयातःम्ह सांगितिक घरोहर प्रेमध्वज प्रधान, जनकवि दुर्गालाल श्रेष्ठ, ख्यालिजुजु मदनकृष्ण श्रेष्ठ, संस्कृतिविद् डा. चुण्डा बज्राचार्यया नापनापं ल्यायम्ह पुस्ताया प्रतिनिधि कथं मिस नेवाः ११३२ व नेपाल लिपि, रन्जना लिपियात न्हूपुस्ताया दथुइ थ्यंकेगु अभियानय् लगे जुयाच्वंम्ह लिपि अभियन्ता सुनिता डंगोलया किपाः ब्वयातःगु दुसा वयकःपिनिगु ल्हाःतिं हे च्वयातःगु कोरोना सचेतना सन्देश नं नगुमाय् न्ह्यथनातःगु दु ।

उलिजक मखुसे नगुमाय् कोभिड १९ पाखें सुरक्षित जुयाच्वनेत मजिमगाःगु उपाययात किपाः च्वया नं न्ह्यब्वयातःगु दु । फोटोग्राफर व थ्व नगुमाया हामा राजभाई सुवालया धापू कथं हलिमय् मेमेथाय् ला धायेमफु, नेपालय् थथे कोरोना विरुद्धया सन्देश ह्वलातःगु थ्व न्हापांगु नगुमा खः धइगु खनेदु ।

Categorized in राष्ट्रिय