kmc bidya

न्हूदँया लसताय् थीथी खलः पुचःपाखें ज्याझ्वःया घोषणा

नेवा: अनलाइन न्युज – निश्चल | २०७६ आश्विन २९, बुधबार १३:२४:३१

नेपाल संवत् ११४० न्हूदँया लसताय् थीथी खलः पुचःपाखें न्हूदँ तःजिक न्यायेकेगु नितिं थीथी ज्याझ्वः याइगु जूगु दु ।
थ्वहे वइगु कौलागा षष्ठी शनिवाः येँया लगं खलःया ग्वसालय् येँया लगं त्वालय् सांस्कृतिक ज्याझ्वः लिसें नेवाः नसात्वसा स्टल व ज्येष्ठ नागरिक सम्मान यायेगु ज्याझ्वः तयातःगु दु ।
उगु ज्याझ्वःया उलेज्या येँ महानगरपालिकाया मेयर विद्यासुन्दर शाक्यं सुथसिया १०ः३० ता इलय् याइगु जूगु दु ।
अथेहे, कौलागा त्रयोदसि (कार्तिक ९ गते) शनिवाः श्री सरस्वतीस्थान विकास समाज १५ वडाया सरस्वतीस्थान मार्ग बिजेश्वरीइ न्हिनसिया ४ः३० ता इलय् झिक्वःगु सी इताः मतयाः ज्याझ्वः तयातःगु दु ।
अथेहे, कौलागा चतुर्दशी (कार्तिक १० गते) आइतवाः येँया २७ वडा ग्वसिफलय् प्रगतिशील ल्यायम्ह पुचःया ग्वसालय् न्हूदँ सांस्कृतिक सनिल ज्याझ्वः याइगु जूगु दु ।
थ्वहे झ्वलय् कौलागा चतुर्दशी (कार्तिक १० गते) आइतवाः हे येँया ओमबहाःया नःबहीलय् ओलम्पस क्लबया ग्वसालय् तुँच्चा ज्याझ्वः याइगु जूगु दु ।
न्हिनसिया पायछि २ः३० ता इलय् जुइगु उगु तुँच्चा ज्याझ्वलय् न्हूदँ समारोह समितिया पुलांम्ह नायः प्रा. सुवर्ण शाक्यं न्हूदँया लसताय् पिथनाच्वंगु १९ गू सफू कथं गोला खँ सफू पितब्वज्या ज्याझ्वः जुइगु जूगु दु ।
अथेहे, थँहिति मानन्धर गुथिया संयोजनय् कार्तिक महिनाया लिपांगु शनिवाः थँहितिइ तःजिक सांस्कृतिक ज्याझ्वःया लिसें फूड स्टल व सफू ब्वज्या ज्याझ्वः याइगु जूगु दु ।

( नेपाल संवत् ११४० न्हूदँया लसताय् छिगु संघसंस्थापाखें छुं नं कथंया ज्याझ्वःया ग्वसाः ग्वयागु दुसा नेवाः अनलाईनन्यूजया इमेल newaon1135@gmail.com व फोन ल्याः ०१४२२९५४७ जानकारी बियाः सुसूचित यायेगु ज्याय् ग्वाहालि यानादीत इनाप यानाच्वना । –सं.)

Categorized in राष्ट्रिय