zero media family planning adv

न्हूगु संबिधानय् झिगु असमति छु छु खः

नेवाः स्वायत्त राज्य मंकाः संघर्ष समितिया इनाप
नेवाः एकता दिवस तःजिक हने !
झी नेवाःतय्सं दँय् दसं मंकाः कथं पोहेलाथ्व ९ कुन्हु नेवाः एकता दिवस हनावयाच्वनागु खुदँ दत । थुगसि नं झी सकलें जानाः थुगु दिवसयात न्हापा लिपा थें तःजिक हनेत्यना – माघ ४ गते सोमवाः कुन्हु ! नापं देसय् न्हूगु संविधान वये धुंकाः थुकथं नेवाःत छप्पं छधी जुयाः थथे नेवाः एकता दिवस हनेगु झन उप्वः आवश्यकता नं तायेकाच्वना ।
नेवाः स्वायत्त राज्यया सुनिश्चितता सकल नेवाःया मंकाः तातुना खत, तर न्हूगु संविधानपाखें थुकथंया अधिकारया ब्यवस्था मयाः । संघीयताया नामय् गुगु कथं ऐतिहासिक, भाषिक, सांस्कृतिक, जातीय पहिचान मदुगु न्हय्गू प्रदेशया ब्यवस्था यात अन नेवाः लगायत देय्या गुगु नं आदिवासी जनाजतिया वाहुल्यता मदु, बरु, सलंसःदँ न्ह्यवनिसें नेपाःया राज्यसत्ताय् एकःति यानावयाच्वंपि खँय् ब्रम्हुतय्त जक नीति निरधारण व नेतृत्वयायेगु थासय् अःपुक थ्यंकेगु न्हूगु राजनीतिक आधार दयेकूगु दु । तःगु भाषा दुगु नेपाः थुज्वःगु देसय् वहुभाषिक नीति नालेमाःगु खँयात नं संविधानय् ब्यवस्था मजू । खँय् भाय्यात हे सरकारी ज्याखँया भाय् धकाः मान्यता बीगु ज्या जुल ।
संघीयताय् मदेयकं मगाःगु केन्द्रय् साझेदारी सरकार व प्रादेशिक स्तरय् स्वायत्तता, स्वशासन व आत्मनिर्णय अधिकारया ब्यवस्था खः, तर न्हूगु संविधानय् संघीयता खँग्वलय् न्ह्यथनेगु जूसां ब्यवहारिक ल्याखं पुलांगु हे केन्द्रीकृत शासन ब्यवस्थायात बःबियातल ।
निर्वाचन प्रणालीया नापनापं देय्या प्रशासनिक, न्यायपालिकानिसें फुक्कभनं समानुपातिक समावेशी सिद्धान्त कथं प्रतिनिधित्वया सुनिश्चित जुइमाःगु खँयात नं थ्व संविधानपाखें स्विकार मयात । तःगु जाति, समुदाय, भाषाभाषी दुगु नेपाः थुज्वःगु देय्या संविधानय् खँय् आर्य ( ब्रम्हु, क्षेत्री, दशनामी व सन्यासी) यात जक दुथ्याकाः मेगु पनपक्ष यात ।
धर्मनिरिपेक्षतायात खँग्वलय् जक छाय्पिया सनातन हिन्दू धर्म, परम्पराया पक्षय् संविधानयात थने हःगु दु ।
थुकथं, न्हूगु संविधानयात दुवालेबले थ्व सिबें न्ह्यवया नेपाःया अन्तरिम संविधान– २०६३ पाखें सुनिश्चित याये धुंकुगु अधिकारयात तकं क्वपालाः देय्या राजनीतियात  लिछ्यायेगु दु । उकिं थ्व संविधानप्रति झी सकल नेवाःतय् असमति दु । थ्वहे असमतियात मंकाः कथं न्ह्यब्वयेगु छगू सडक आन्दोलनया रुपय् थुगसिया नेवाः एकता दिवस झीसँ हनाच्वना ।
नापं ताःइलंनिसें देसय् आदिवासी जनजाति, मधेशी, मुस्लिम, महिला, दलित समुदाययापाखें तराई लगायत थीथी लागाया आन्दोलनपाखें ह्वनावयाच्वंगु न्यायोचित माग प्रति झीगु समर्थन व एकेवद्धता क्यने कथं नं थुगु एकता दिवस खत ।
दक्षिणी सीमानाया असहज स्थितिया कारणं ब्वलनाच्वंगु चिकं, ग्यास, उपभोग्य ज्वलं अले बिजुलीया अभाव व लोड सेडिङ्गया कारणं सर्वसाधारणया जीवन न्हिथं अतिकं कष्टकर जुयाच्वंगु नापनापं न्यंकभनंया हाकुबन्जा उप्वया वनाच्वंगु थौंया ई तर  राज्यया उपस्थिति शून्य जुयाच्वंगु अबस्थाया विरोध कथं नं थ्व झीगु एकता दिवस खः ।
नेवाः स्वायत्त राज्यया अधिकार प्राप्त मजूतले नेवाःतय् आन्दोलन न्ह्यानाच्वनि । सकलें नेवाःत छथासं मुने ! नेवाःत छधी छपाँय् जुयाः दने !
नेवाः एकता जिन्दावाद !
नेवा राज्य जिन्दावाद !
नेवाः स्वायत्त राज्य मंकाः संघर्ष समिति
येँ, नेपाः ।
( नेवाः स्वायत्त राज्य मंकाः संघर्ष समिति ११३६ थिंलागाः १२ छगू पत्रकार सम्मेलन यासें पित ब्यूगू इनाप पौ गथे खः अथे हे पिथना कथं )