Header Nepal rastra bank Adv

न्हूगु भेरियन्ट ओमिक्रोन ‘चिन्ताया विषय’ जूसां नं ग्यायेमाःगु अवस्था मदु : वाइडेन

नेवा: अनलाइन न्युज – ललेन्द्र शाक्य | २०७८ मङ्सिर १४, मंगलबार १७:०३:१९

अमेरिकी राष्ट्रपति जो बाइडेनं कोरोनाया न्हूगु भेरियन्ट ओमिक्रोनलिसे ग्याये हे माःगु अवस्था मदूगु स्पष्ट याःगु दु । सोमवाः ह्वाइटहाउसय् न्वःवासें बाइडेनं न्हूगु भेरियन्ट ‘चिन्ताया विषय’ जूसां नं ग्याये हे माःगु हुनि मदूगु स्पष्ट याःगु दु ।

बाइडेनं खोप काःपिन्त बुस्टर डोज कायेत तकं आग्रह यासें धाःगु विषययात उदृत यासें संचारमाध्यम एनबीसीं च्वःगु दु, ‘यदि छिसं खोप कायेधुनागु दु व न्हूगु भेरियन्टया हुनिं चिन्तित जुयागु दुसा बुस्टर डोज कयादिसँ, यदि खोप कयागु मदुनिसा कया हे दिसँ । न्हापांगु डोज कायेत वनादिसँ ।’

बाइडेनं खोप कायेगु व मास्क छ्यलेगु खःसा लकडाउनया अवस्था नं मवइगु स्पष्ट याःगु दु । मास्क छ्यलाबुला यायेगु पुलांगु शैलीइ लिहाँ वयेत तकं बाइडेनं सुझाब ब्यूगु दु ।

न्हूगु भेरियन्टविरुद्ध विद्यमान खोप व बुस्टर डोजं ज्या यायेफइगु सम्भावना दूगु धकाः प्रमुख मेडिकल सल्लाहकार एन्थोनी फाउचीं धाःगु नं वं न्यंकूगु न्यूज एजेन्सी एनबीसीइ न्ह्यथनातःगु दु ।

न्हूगु भेरियन्टलिसे वैज्ञानिक पलाः न्ह्याकाः ल्वायेगु नं वया धापू दु । वं धाःगु विषययात उदृत यासें संचारमाध्यम एनबीसीं च्वःगु दु, ‘भद्रगोल व अलमलया पलेसा वैज्ञानिक व ज्ञानयुक्त ज्या व गतिया लिसें थ्व भेरियन्टलिसे ल्वायेगु जुइ ।’

बाइडेनं लकडाउन वा थप यात्रा प्रतिबन्ध मयाःसे हे ओमिक्रोनयात नियन्त्रण यायेगु अवस्थाय् अमेरिका दूगु दाबी याःगु दु ।

Categorized in अन्तर्राष्ट्रिय