nepal life 2076 3 18

न्हापांम्ह मिसा प्रधानमन्त्री जूगु छघौ दुने हे राजीनामा

नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार ०९:५१:४९

मागडालेना एन्डरसन स्वीडेनया न्हापांम्ह प्रधानमन्त्री पदय् नियुक्त जुल । तर, नियुक्तिया छघौ दुने हे राजीनामा बिल ।

मागडालेना एन्डरसन बुधवाः थःगु पार्टी सोसियल डेमोक्र्याटया नेता जुसें प्रधानमन्त्री नियुक्त जूगु खः । गठबन्धनया मेगु दल ग्रिन्स पार्टीं बजेट अस्वीकर यासें समर्थन लितकाल । बजेट पारित जुइमफयेधुंकाः एनडरसनं राजीनामा बिल ।

एन्डरसनं राजीनामा बिइधुंकाः स्वीडेनय् न्हूगु सरकार नीस्वनेत मेगु प्रक्रिया न्ह्यःने वंगु दु ।

तर, स्वीडेनया न्हापांम्ह मिसा प्रधानमन्त्री जुसें एन्डरसनं इतिहास दयेकूगु दु । स्वीडेनय् मिसापिन्सं मताधिकार कायेखंगु सच्छि दँ लिपा न्हापांगुखुसि मिसा प्रधानमन्त्री जूगु खः ।

५४ दँया एन्डरसन पुलांम्ह पौडी च्याम्पियन खः । वं उपसला विश्वविद्यालयस ब्वनाः सन् १९९६ स राजनीतिइ दुहाँ वःगु खः । एन्डरसन सन् १९९६ स स्वीडेनया प्रधानमन्त्री गोरान परसनया राजनीतिक सल्लाहकार जूगु खः ।

Categorized in अन्तर्राष्ट्रिय