prabhu baink new

न्हापांगु बादेय् गां कप ब्याडमिन्टन कासा क्वचाल, सुविन व किरण न्हाप

नेवा: अनलाइन न्युज – ललेन्द्र शाक्य | २०७७ श्रावण २५, आइतबार १२:१३:२७

किपू नगरपालिका ९ वडाय् लाःगु बादेय् गां क्वलबया ग्वसालय् जूगु न्हापांगु बादेय् गां कप ब्याडमिन्टन कासा म्हिगः शनिवाः क्वचाःगु दु ।

उगु कासाय् बादेय् गां त्वाःया सुविन श्रेष्ठ व किरण महर्जनया जोडी न्हाप लायेत ताःलाःगु दु ।

उगु ब्याडमिन्टन कासाय् सिरपाः त्याकेत ताःलाःपिं कासामिपिं व ग्वाहालिमि संघसंस्थापिन्त सिरपाः व मतिनाया चिं छगू ज्याझ्वःया ग्वसाः ग्वयाः लःल्हाःगु खः ।

उगु ज्याझ्वलय् किपू नगरपालिका ९ वडाया वडाध्यक्षलिसें कासामि गंगाराम महर्जन मूपाहाँ कथं झायादीगु खः ।

उगु न्हापांगु बादेय् गां कप ब्याडमिन्टन कासाया कजि ९ वडाया वडा दुजः प्रेमकृष्ण श्रेष्ठ खः ।

बादेय् गां क्लबया आज्जु त्वाःया बासिन्दापिन्त कासा प्रति नुगः क्वसायेकेगु जूगु खँ कनादिसें कासाया कजि प्रेमकृष्ण श्रेष्ठं कासा लिसेलिसें सामाजिक ज्याय् नं बादेय् गां त्वाःया बासिन्दापिन्त आकर्षित याकेगु व त्वाःया विकास निर्माण ज्याय् नुगः क्वसायेकेगु खः धकाः धयादीगु दु ।

ज्याझ्वलय् कासा न्ह्याकेगु नितिं भौतिक व आर्थिक रुपं ग्वाहालि यानादीपिं ग्वाहालिमिपिनिगु नं उपस्थिति दूगु खः ।

Categorized in कासा