city axpris 2

न्यू जेनिथ इंग्लिश मोडेल स्कुलया रजत जयन्ती तःजिक हनीगु

नेवा: अनलाइन न्युज – विजयरत्न | ने.सं. ११४४ पोहेलागा चःह्रे

न्यू जेनिथ इंग्लिश मोडेल स्कुल नांयागु छगू नीजि संस्थागत ब्वनेकुथि थापना जूगु नीन्यादँ क्यंगु लसता हनेकथं  रजत जयन्ती ज्याझ्वः याइगु जूगु दु ।  

आः वइगु आइतवाः माघ २८ गते प्रज्ञा प्रतिष्ठान कमलादीइ रजत जयन्ती ज्याझ्वः तःजिक हनेगु खँ  बिहिवाः छगू पत्रकार भेटघाट ज्याझ्वः याना स्कुलका प्रिन्सिपल राज महर्जनं जानकारी बिउगु खः ।

येँ महानगरपालिकाया उपप्रमुख सुनिता डंगोलया मूपाहाँसुइ जुइगु उगु ज्याझ्वलय्  स्कुल थापना जूसांनिसें आःतकया  गतिविधि न्ह्यब्वइगु व थीथी सांस्कृतिक , खेलकुद ब्वज्या जुइगु खँ प्रिन्सिपल  महर्जनं कनादिल । वयकलं धयादीकथं ख्वीम्हसिबें अप्वः विद्यार्थीपिन्सं म्यूजिकल ओरस्चेस्ट्रा, म्युजिकय् अधारित तेक्वाण्डो सो, स्काउट पिरामिट, म्ये , हुलाप्याखं व नाटक न्ह्यब्वइगु जुगु दु ।

आइतवाः १२ बजे प्रज्ञा भवनय् जुइगु ज्याझ्वलय् प्याबसनया नायः प्रेमकुमरा राई, ज्यापु महागुथि, नगर कमिटीका पञ्च नारायण महर्जनया नापनापं येँ महानगरपालिका वडा १८, १७, १९, १५, २४ र २३ या वडा अध्यक्षपिं नं विशेष पाहाँ कथं झायादीगु खँ दु ।

अथेहेतुं प्रिन्सिपल महर्जनं थः शिक्षण पेशाय्  च्वनाः मुनागु अनुभव व भोगाई आधारित छगू सफूया नापनापं  ‘थर्ड युनिभर्स अफ न्यू जेनिथ स्कुल’ नांयागु स्मारिका म्यागेजन नं पितब्वज्या याइगु जूगु उगु ज्याझ्वलय्  स्कुलय्  २५ दँया दुने सेवारत शिक्षक, शिक्षिका व कर्मचारीपिन्त नं सम्मान याइगु जूगु दु ।

वि.सं. २०५६ सालय् प्राइमरी ब्लक अफ जेनिथ इंग्लिस सेकेण्डरी स्कुल बाफलया नामं  ७४ म्ह विद्यार्थीपाखें सुरु याःगु थ्व स्कुल शुरुइ नर्सरीनिसें न्यागू तगिंतक सञ्चालन याःगु खःसा आः ९५० म्ह विद्यार्थीं कक्षा १२ तक ब्वनाच्वंगु खँ नं प्रिन्सिपल राज महर्जनं कनादिल ।

किपा : बिक्रम खडगी

Categorized in स्थानिय-समाज