coved ad

न्यूज अपडेट : सल्यान दुर्घटनाय् सीपिनिगु ल्याः १२ म्ह थ्यन

नेवा: अनलाइन न्युज – ललेन्द्र शाक्य | २०७८ कार्तिक २१, आइतबार १६:०७:१९

सल्यानया कपुरकोटय् जूगु बस दुर्घटनाय् लानाः सीपिनिगु ल्याः १२ म्ह थ्यंगु दु ।

जिल्ला प्रहरी प्रमुख डिएसपी गोविन्द थापाया कथं सीपिंमध्ये १० म्ह मिजं व २ म्ह मिसा लाःगु दु । घटनास्थलय् ६ म्ह व अस्पतालय् ६ म्ह यानाः १२ म्ह सीगु खः । सीपिनिगु सनाखत मजूनिगु डिएसपी थापां जानकारी ब्यूगु दु ।

सल्यान सदरमुकाम खलंगापाखें दाङया तुलसीपुरपाखे वनाच्वंगु ना१ख १५५२ ल्याःया बस आइतवाः सुथय् ११ ता इलय् कपुरकोट गाउँपालिका ५ य् च्वंगु खारखोलाय् दुर्घटना जूगु खः ।

दुर्घटनाय् कम्ती नं १८ म्ह घाःपाः जूगु प्रहरीं जानकारी ब्यूगु दु । घाःपाः जूपिंमध्ये तच्वःगु अवस्थाया ७ म्हेसित वासः यायेगु नितिं नेपालगञ्ज छ्वःगु दु । मेपिं घाःपाः जूपिनिगु श्रीनगर व खलंगाय् थीथी अस्पतालय् वासः जुयाच्वंगु डिएसपी थापां जानकारी ब्यूगु दु ।

प्रहरीं तीव्र गतिया हुनिं बस दुर्घटना जूगु प्रारम्भिक अनुमान याःगु दु । बस सतकं २०० मिटर क्वय् कुतुंवंगु खः । स्वन्ति नखः न्यायेकाः सहरपाखे लिहाँ वयाच्वंपिं दुर्घटनाय् लाःगु खः ।

Categorized in दुर्घटना-अपराध