zero media family planning adv

न्यूज अपडेट : महोत्तरीं बेपत्ता जूपिं मिसामचात भारतय् लुल

नेवा: अनलाइन न्युज – ललेन्द्र शाक्य | २०७७ चैत्र १८, बुधबार ११:५१:०१

महोत्तरीया भंगहा नगरपालिकापाखें मंगलवाःनिसें बेपत्ता जूपिं ७ म्ह मिसामचात भारतया सितामढीइ लुयावःगु सुचं वयेधुंकाः नेपाल प्रहरीया छगू पुचः उखेपाखे थ्यंकूगु दु ।

बेपत्ता जूपिं भारतया सितामढीइ च्वंगु रेल्वे लाइन लिक्क लुयावःगु धासें भंगहा नगरपालिकाया प्रमुख संजीवकुमार साह नं प्रहरीयात जानकारी ब्यूगु खः ।

उगु सुचं वयेधुंकाः प्रहरीया छगू पुचः उपिं मिसामचात व इमिगु किपाःलिसें सितामढी वंगु खः । प्रमुख जिल्ला अधिकारी तिर्थराज भट्टराई नं धाःगु दु, नेपाःया मिसामचात सितामढीइ लुयावःगु सुचं वयेधुंकाः प्रहरीया पुचःयात इमिगु किपाःलिसें छ्वःगु दु । उपिं मिसामचात भंगहा नगरपालिकापाखें तंपिं हे खः कि मखु धैगु खँ छुं ई लिपा सीदइ ।

घाँय् लःवनेत नापं वंपिं भंगहा नगरपालिकाया ७ धर्मपुरया १८ दँया अस्मीता पासवान, नगीना पासवान, १५ दँया रिया पासवान, अर्चना पासवान, १३ दँया ज्योती पासवान, १० दँया रंजना पासवान व सीमा पासवान बेपत्ता जूगु खः ।

सशस्त्र प्रहरीया समन्वयस भारतीय प्रहरीं उपिं मिसामचापिन्त लुइकूगु भंगहा नगरपालिकाया प्रमुख साह नं धाःगु दु ।

नगर प्रमुख साह नं धाःगु दु, मिसामचात बेपत्ता जूगु खबर सशस्त्र प्रहरीपिन्त तकं बिइधुंकाः इमिसं भारतीय प्रहरीलिसे तत्काल हे समन्वय याःबलय् मिसामचात लुयावःगु खः । ७ म्हेसिगु हे नां नं मिलेजुइधुंकूगु दु ।

इपिं मिसामचात आः भारतीय प्रहरीया निगरानीइ दूगु साह नं धाःगु दु ।

नगर प्रमुख साह नं सितामढीइ लुयावःपिं मिसामचापिन्त हयेत थःहे उखेपाखे वनाच्वनागु धाःगु दु । साह नं धाःगु दु, इमित हयेत जिगु हे नेतृत्वय् पुचः वनाच्वनागु दु ।

मिसामचात छाय् व गुकथ. अनतक थ्यन धैगु खँ सीमदुनि । प्रमुख जिल्ला अधिकारी भट्टराई नं धाःगु दु, भारततक थ्यंकेत सुनाः समन्वय यात धैगु खँया अनुसन्धान जुयाच्वंगु दु ।

Categorized in दुर्घटना-अपराध