newayatataad 2

न्यूज अपडेट : गुल्मी जीप दुर्घटनाय् सीपिनिगु ल्याः ६ म्ह थ्यन

नेवा: अनलाइन न्युज – ललेन्द्र शाक्य | २०७७ मङ्सिर १२, शुक्रबार १२:५९:३८

गुल्मीइ जूगु जीप दुर्घटनाय् सीपिनिगु ल्याः ६ म्ह थ्यंगु दु । थौं शुक्रवाः सुथय् इस्मा गाउँपालिकां तम्घास वनाच्वंगु लु१ज ११६६ ल्याया जीप गाउँपालिकाया वडा ल्याः ४ या हुलय् दुर्घटना जुयाः ६ म्ह मनूत सीगु खः ।

दुर्घटनाय् ५ म्ह घटनास्थलय् हे सीगु खःसा थप छम्ह गुल्मी अस्पतालय् वासः यायेगु झ्वलय् सीगु जिल्ला प्रहरी ज्याकुथि गुल्मीया प्रहरी उपरीक्षक एसपी प्रविणलाल श्रेष्ठं जानकारी ब्यूगु दु ।

सीपिं इस्मा गाउँपालिका ४ हुलया ६५ दँया डम्बर हितान, ३३ दँया शिव दर्लामी, ३० दँया बसन्त दर्लामी, ३३ दँया धनबहादुर अछामी व मालिका गाउँपालिका ५ या ८० दँया सुन्दरी थापा व गुल्मी अस्पतालय् वासः याकाच्वंम्ह १९ दँया फर्सुराम थापा खः ।

दुर्घटनाय् यस्मा गाउँपालिका ४ हुलया हे २८ दँया सरस्वती दर्लामी व सहचालक २५ दँया कमल हितान घाःपाः जूगु दु । चालक बुद्ध बस्नेत धाःसा सकुशल जूगु प्रहरीं जानकारी ब्यूगु दु ।

घाःपाः जूपिनिगु गुल्मी अस्पतालय् वासः जुयाच्वंगु दु । प्रहरीया कथं जीपय् चालकलिसें ९ म्ह च्वनावंगु खः । जीप सतक. थ्यंमथ्यं ४०० मिटर क्वय् कुतुंवंगु खः ।

Categorized in दुर्घटना-अपराध