prabhu baink new

ने.सं. ११३५य् झिगु नेवाः फिल्म

 

  • विजयरत्न असंबरे

नेपाल सम्बतय् ११३३य् निर्देशक सनमकुमार श्रेष्ठया “ख्याः वल ख्याः वल”, निर्देशक मानिक उराय्या “अजः मिखा”, निर्देशक बासु शाहीया “ब्याहा याये म्हाः” रुपिन डंगोलया “मतिनाया स्वां” नापं यानाः मुक्कं प्यंगू जक नेवाः फिल्म पिदनसा ११३४य् निर्देशक भोगेन्द्र मानन्धरया “थ्वला ग्यानापू स्टायल”, निर्देशक सुरेन्द्र तुलाधरया “मू मदुगु जिन्दगी”, व अमृत महर्जनया “द्वपंमि सु” नापं यानाः स्वंगू हे जक फिल्म पिदन । थथे निदँतक स्वंगू प्यंगू जक नेवाः फिल्म पिदनाः नेवाः फिल्म ख्यः हे खिउँसे च्वंथें खने दयाच्वंगुलिं आः वयाः नेपाल सम्वत् ११३५ दुने मुक्कं झिगू फिल्म पिदंबलय् खिउँजः चिलावंथे तायेकाहःगु दुसा आः थूगुसी ने.सं. ११३६य् अझ थ्वसिबें अप्वः फिल्म पिदनी थें जाःगु लकस ब्वलनावःगु दु ।

नेपाल सम्बत ११३५ दुने पिदंगु नेवाः फिल्मय् निर्देशक आर्यम नकःमिया “तिमिला” दकले न्हापांगु खः । नेवाःतय् दथुई तना वनेत्यंगु नेवाः भाय्प्रतिया मतिना ज्वनाः विदेशं वःम्ह नेवाः म्ह्याय्मचाया बाखं दुगु थ्व फिल्मयात आपाःसिनं ययेकूगु खनेदत । अथेहे तुं थूगुसी पिदंगु मेमेगु फिल्मय् निर्देशक सनमकुमार श्रेष्ठया “लाय् मदु पसः कला मदु ससः” नं आपाःसिनं तारीफ याःगु फिल्म खः । भाषाख्यःया छम्ह साहित्यकारया स्याःचाःया बाखं दुगु थ्व फिल्मय् मेन रोल म्हितूम्ह महन्तलाल मल्लया ज्यायात नं आपाःसिनं तारीफ हे याःगु खनेदतसा “तिमिला” फिल्मय् विदेशं वःम्ह मिसामचाया रोल म्हितूम्ह मय्जु साक्षी मुल्मी राई न्हूम्ह कलाकार जूसां थःगु रोलय् बांलाक अभिनय याःगु खनेदत । थौंकन्हय् विदेशय् दां कमे यायेत वनीगुयात वैदेशिक रोजगार धाःथेंतुं न्हापा न्हापा अथे वनीगुयात तापलय् वनेगु धकाः धाइ । थथे तापलय् वनीगु ऐतिहासिक खँयात बाखनय् माः हनाः दयेकूगु “तापलय्” नांयागु फिल्मं स्वन्हुतक लगातार च्यारीटी शो क्यनाः छगू च्वछायेबहगु पलाः न्ह्याकूगु खनेदतसा स्वन्हुया दुने न्याद्वः स्वकुमितसें स्वःगु थ्व फिल्मं झिगू लख तका दां मुनाः छगू न्हूगु रेकर्ड तयेत ताःलाःगु खः ।उकी मध्ये छगु निर्देशक राज शाक्यया नखः नांयागु संकिपा धाःसा छगु च्यारिटी शोजक जूगु खनेदत ।

बौद्ध धर्मया प्रचार व सामाजिक चेतना सञ्चारया ख्यलय् तसकं प्रसिद्धम्ह व्यक्तित्व धम्मवति गुरुमांया जीवनी धका बय्बय् यानातःगु “धम्मवति”या न्हापांगु क्यनेज्या नं थुगुसी हे जुल । नेपाःया फिल्म ख्यलय् तकं नांजाःम्ह मेलिना मानन्धरया मेन रोल दुगु थ्व फिल्मया निर्देशक राज शाक्य खः । बारासी, सर्गः मिला, शंकरा, मिजं थेंज्याःगु आपालं नेवाः फिल्म दयेकेधुंकूम्ह राज शाक्यया धम्मवति फिल्मय् धम्मवति गुरुमांया जीवन बाखंसिबें आधुनिक परिवेशया विकृतियात न्ह्यब्वयेगु कुतः यानातःगु दुसा धम्मवति गुरुमांया आपालं भिंचितामिपिन्सं थ्व खँयात कुंख्युंगु नं खनेदत । नेवाः फिल्म ख्यलय् ननस्टप फिल्म मेकर धकाः धयातःम्ह बासु शाहीया “पागलपन” फिल्मं थ्रिलर शैलीया बाखं ज्वनातःगु खनेदत । अथेहेतुं थूगुसी नांजाःम्ह प्याखंम्वः रवि डंगोलं निर्देशन याःगु “टेम्पो चालक” नांयागु छगू फिल्म नं पिदन ।

विशेष यानाः ख्यालिन्हिलाय् नांजाःम्ह रवि डंगोलं “यांमिखा” थेंज्याःगु छगू धिसिलाःगु फिल्मपाखें थःगु निर्देशन यात्रा शुरु याःगु खःसा वयक भाजुं टेम्पो चालकयात नेवाः फिल्म कथं मखसे बहुभाषिक व बहुसाँस्कृतिक फिल्मया रुपय् पितहयेगु कुतः याःगु दु । थ्व फिल्मया निर्माता व मेन रोल म्हितूम्ह कलाकार गंगा बहादुर नेम्कुलं थ्व सिबें न्हापा “म्हसीका” नांयागु छगू शर्ट फिल्म नं दयेकेधुंकूगु खँ थनथाय् लुमंके बहजु ।

थूगुसी पिदंगु नेवाः फिल्मय् निर्देशक ललेन्द्र शाक्यया न्हापांगु निर्देशन पलाः कथं भौमचा पिदनसा थौंया सामाजिक व पारिवारीक स्थीति न्ह्यब्वयातःगु थ्व फिल्मयात आपासिनं ययेकूगु खनेदतसा निर्देशक हरिकृष्ण महर्जनया “स्यंगु छेँ” नांयागु फिल्म नं सामाजिक पारिवारिक बाखं दुगु नेवाः फिल्म खः । न्हापा “मतिनाया स्वां” दयेकेधुंकूम्ह निर्देशक व कलाकार रुपिन डंगोलया थूगुसी “जि यःम्ह पासा” पिदन । थुकथं थूगुसी गुंगू नेवाः फिल्म पिदंगु धइगु छगू च्वछायेबहगु खँया रुपय् कायेमाः । थगुने नगुने स्वंगू प्यंगू जक फिल्म पिदनाः छगू शून्य स्थीति खनेदुगुलिं थूगुसी वयाः झिगू झिगू फिल्म पिदंगु धइगु बांलाःगु हे खँ कथं कायेमाः । तर नेवाः फिल्मया बजाःकथं डिभिडि व भिसिडी अले निगू प्यंगू च्यारीटी शो दुने हे तक्यनाः च्वनेमाःगु बाध्यता धाःसा चिइके फुगु खनेमदुनि । थ्वहे झ्वलय् नेपालभाषा लगायत आदिबासी जनजाति मातृभाषाया फिल्म ख्यःया विकास अले हकहितया संरक्षण यायेगु ताःतुनाः नीस्वनातःगु थीथी भाय्या संघ संगठनया मंकाः संगठन आदिबासी जनजाति चलचित्र महासंघया कुतलय् राष्ट्रिय नाचघरय् नं नियमित रुपं आदिबासी जनजाति मातृभाय्या फिल्म क्यनेगु पलाः न्ह्याकेत्यंगु धइगु छगू लसताया चिं खःसा थुकिया लबः कायेत नेवाः संकिपामिपिं नं न्ह्यचिले फयेमा धकाः ने.सं. ११३६ न्हूदँया भिन्तुना ।