swastha 3

नेविसंघं यात पेट्रोलियम पदार्थया मूल्यवृद्धि लितकायेत माग

नेवा: अनलाइन न्युज – ललेन्द्र शाक्य | २०७८ भाद्र ८, मंगलबार ११:०६:००

सत्तारुढ दन नेपाली कांग्रेस लिक्क लाःगु विद्यार्थी संघ नेपाल विद्यार्थी संघं पेट्रोलियम पदार्थय् जूगु मूल्यवृद्धि लितकायेत माग याःगु दु ।

सोमवाः चान्हय् निसें लागू जुइगु कथं नेपाल आयल निगमं पेट्रोल, डिजेल, मचिकं व एलपी ग्यास लिसें हवाई इन्धनया मू थकाःगु खः ।

नेविसंघया महामन्त्री बलदेव तिमल्सिनां मंगलवाः विज्ञप्ति सार्वजनिक यासें मूल्यवृद्धि लितकायेत मागु याःगु खः ।

नेविसंघं सार्वजनिक याःगु विज्ञप्तिइ धयातःगु दु, ‘कोरोना भाइरसया महामारी व उकिया प्रत्यक्ष असरपाखें प्रभावित उपभोक्तापिन्त थप पीडा बिइगु कथं नेपाल आयल निगमं पेट्रोलियम पदार्थय् याःगु मूल्यवृद्धिप्रति घोर भत्र्सना यानाच्वना । आहतया इलय् राहत बिइमाःगुलि कर व कमिसनय् लिप्त निगम जनताया भुतू बन्द याकेगु लँपुइ वनाच्वंगु दु । अत्यावश्यकीय उपभोग्य हलंज्वलखय् तःक्वःमछि याःगु मूल्यवृद्धिं उपभोक्तां चरम पीडा फयेमाःगु अवस्थाय् सरकारयात उगु मूल्यवृद्धि तत्काल लितकायेत माग यानाच्वना ।’

नेविसंघं स्वचालित मू प्रणालीया नामय् तःक्वःमछि मूल्यवृद्धि याःगु जनविरोधी ज्या जूगु दाबी यासें द्वपं ब्यूगु दु ।

आयल निगमं सोमवाः चान्हय् १२ ता ईनिसें लागू जुइगु कथं पेट्रोल, डिजेल, मचिकं व हवाई इन्धनय् प्रतिलिटर नितका नितका दां मूल्यवृद्धि यासें पेट्रोल १३० तका, डिजेल व मचिकं ११३ तका व हवाई इन्धन प्रतिलिटर ८६ तका लिसें भुतू ज्याय् छ्यलीगु एलपी ग्यासय् २५ तका वृद्धि यानाः १,४५० तका दां कायम याःगु दु ।

Categorized in बजाः