नेवा: अनलाइन न्युज | २०७९ श्रावण २८, शनिबार ०८:२८:००

दँय् दसं वइगु सापारु थुगुसी नं न्ह्यानाच्वंगु दु  । थौं विशेष रुपं नेवाः समुदायपिन्सं सापारु नखं कथं हनीगु याइसा गैर नेवाःतसें थुगु नखःयात गाईजात्रा धकाः धाइ । थुगु नखःया खँ वइबलय् मल्लकालीन ईया येँया जुजु प्रताप मल्ल लुमंसे वइ ।

इतिहासय् न्यनाकथं, येँया जुजु प्रताप मल्लया काय् मत्यवं मदुगु हुनिं यानाः लानि अतिकं नुगः मछिंकाः च्वंगु इलय् जुजु प्रताप मल्लं लानिया नुगः शान्त यायेगु उपाय छ्यःगु खँ लुमंसे वइ ।

खँ छु धाःसा, लानि थः मचा मत्यवं सिनाः मन शान्त मजुया वींथें जुयाच्वंगु इलय् जुजु प्रताप मल्लं जनवर्ग न्ह्याका वयाच्वंगु सापारु नखः थःगु लाय्कू ९दरबार० दुने हयेगु इनाप यात । जुजुया इनाप कथं जनतां नं सापारु नखः थः जुजुया दरबार दुने चाःहिइकेगु यात । उगु इलंनिसें जनवर्गं थःगु छेँ थः मनू सितकि सीम्हेसिगु लुमन्तिइ मनूयात साः, गोसाईंया भेषय् पिथनाः देय् चाःहिइकेगु चलन न्ह्याना वयाच्वंगु खः ।

देसय् गुलि मनूत सित धैगु खँ सापारुया दिं पिहाँ वइगु साः व गोसाईं नं याना सी दइ । येँया जुजुं नं थः लानियात झी मचा जक मखु देसय् झी जनताया गुलि मचाखाचात व मनूत सिनाच्वंगु दु, छं जक छाय् नुगः मछिंकेमाःगु धैगु सान्त्वना बिइगु ताःतुना व लानियात क्यनेगु नितिं थुगु सापारु लाय्कू दुने नं चाःहिलेमाःगु चलन दयेकूगु खः । अले लानिया नुगः न्हिइकेगु ताःतुना मनूत थीथी भेषं चाःहिलेगु चलन नं थुबलेनिसें वल धैगु दुसा मेगु खँ देय्या शासकपिन्सं मखुगु ज्या यानाच्वंगुयात थुगु दिं विशेष रुपं व्यंग्य यायेत राज्यं छूट बियातःगु कथं ख्यालः वयेगु चलन न्ह्याःगु धकाः नं धाइ । उकिं थौंया दिं ख्यालः वयेगु चलन नं दु । थ्व चलन थौंतक नं न्ह्यानाच्वंगु दनि । धात्थें धायेगु खःसा सापारु नखः धैगु विशेष रुपं थः मदुपिं छेँजःपिं लुमंकेगु नखः धाःसा छुं पाइमखु ।

विशेषरुपं धायेगु खःसा थुगु सापारु नखः नेवाः समुदायं सदियौंनिसें हनावयाच्वंगु नखः खः । स्वनिगलय् जक मखु, देय्न्यंकं गन गन नेवाः वस्ती दु अन अन नेवाः समुदायं थुगु सापारु नखः भव्यरुपं हनावयाच्वंगु खनेदु । गथेकि, येँ थःथिति मदुगु प्रत्येक छेँखापतिं मनूयात सा९गाई० याना पिथनीसा न्हूगु छेँ दयेकूपिन्सं गोसाईं याना पिथनी । अथेहे ख्वपया सापारु विशेषरुपं न्ह्याइपुुसेच्वंगु नखः कथं काइ । अन अतिकं न्ह्याइपुसेच्वंगु धिन्तां किसि त्वाक्क प्याखं पिदनी । यलय् नं सापारु नखः भव्यरुपं हनी ।

थ्वहे झ्वलय् किपुली नं विशेष रुपं न्ह्याइपुस्से च्वंक सापारु नखः हनी । थन बुद्ध तपस्या च्वनाच्वंगु इलय् राक्षस गणपिन्सं बुद्धया तपस्या भंग यायेगु तातुनां वःगु मारया लुमन्ति धेंधेंपापां प्याखं न्ह्यब्वइगु चलन सदियौंनिसें न्ह्यानावयाच्वंगु दु । किपुली जक मखु स्वनिगःया थीथी थासय्, थीथी गां शहरय् नेवाःतसें तःजिक थुगु सापारु नखः हनाः वयाच्वंगु दु ।

उकिं थौंया दिं विशेष दिं खः । नेवाः समुदायपिनिगु विशेष नखः सापारुया दिं खः । 

Categorized in बिचा: