नेवा: अनलाइन न्युज – ललेन्द्र शाक्य | ने.सं. ११४४ चिल्लागा नवमि (२०८० चैत्र २१ गते) बुधवाः

नेपालभाषा एकेदेमिपाखें नेवाः सांस्कृतिक ज्ञानकोश पिदनीगु जूगु दु ।

येँ महानगरपालिकाया ग्वाहालिं पिदनेत्यंगु उगु ज्ञानकोशयात कयाः म्हिगः मंगलवाः नेपालभाषा एकेदेमिइ छगू ज्याझ्वः याःगु दु ।

नेपालभाषा एकेदेमिया भाइस चान्सलर मल्ल के सुन्दरं ज्ञानकोशय् न्ह्यथनातःगु थीथी खँया जानकारी बियादीगु खः । वय्कलं नेवाः सांस्कृतिक ज्ञानकोशय् मुक्कं न्यागू ब्व न्ह्यथनातःगु जानकारी बियादिसें न्हापांगु ब्व नेवाः म्हसीका, निगूगु ब्व नेपालभाषा साहित्य, लिपि, ब्याकरण व शब्दकोश, स्वंगूगु ब्व संस्कृति व सम्पदा, प्यंगूगु ब्व प्रविधि, शिल्प व ज्ञान, अथेहे न्यागूगु ब्व संगीत, वाद्य, नाट्य, फिल्म दुथ्याःगु दु ।

भाइस चान्सलर सुन्दरं थथे न्यागू ब्वय् दुथ्याःगु ज्ञानकोश दुने छगू ब्वय् विषयगत धलः व सम्बन्धित किपाःत नापं दुथ्याकाः म्होतिं नं न्यासः पेज दूगुजानकारी बियादिल । अथेहे, वय्कलं न्यागू ब्वनापं यानाः स्वीच्यासः पेज दुथ्याःगु जानकारी बियादीगु दु ।

ज्याझ्वलय् वय्कलं थुगु ज्ञानकोश छापेयायेगु नितिं प्रेसय् वनेधुंकूगु खँ कनादिसें ज्ञानकोश नेवाःतय्गु छेँय् छेँय् थ्यंकेगु नितिं ग्वाहालि यानादीत सकलसित इनाप नं यानादीगु दु ।

नेपालभाषा एकेदेमिं थुगु ज्ञानकोशया मू प्यद्वः तका तयातःगु दुसा थौंकन्हय्हे बुकिङ यात धाःसा स्वद्वः तका क्वःछिनातःगु दु ।

मंगलवाः जूगु ज्याझ्वलय् आपालं आपाः थीथी ख्यःया व्यक्तिपिन्सं न्ह्यः हे थःत माःगु व मेपिनिगु नितिं उगु ज्ञानकोश बुकिङ याःगु दु ।

अथेहे, ज्ञानकोश अग्रिम बुकिङ यायेगु नितिं नेपालभाषा एकेदेमि वा नेपालभाषा ख्यःया व्यक्तिपिन्त स्वापू तयेत नं इनाप याःगु दु ।

Categorized in नेवाः