nepal investment baink

नेवाः संकिपा ख्यलय् कोरोनाया लिच्वः

नेवा: अनलाइन न्युज – विजयरत्न | २०७६ चैत्र ७, शुक्रबार १३:२१:१६

किपू चिहासंकिपा कासा नं कोरोनां यानाः लिछ्यात

कोरोना भाइरसया संक्रमणं हलिंन्यंकं लिच्वः लाकाच्वंगु थ्व इलय् थुकिं लाकीगु संक्रमणपाखें सुरक्षित जुइत सचेतना अभियान न्ह्याका हःगु दु ।

थ्वहे झ्वलय् थन मासांम्वासां हुलमुलय् मजुइत सरकारं इनाप याःगु दुसा थनया स्कूल, कलेज लिसेलिसें सिनेमा हल बन्द याःगु दु । थथे सिनेमा हल बन्द याःबलय् कन्हय् शनिवाः बागबजाःया सिटी म्याक्स हलय् क्यनेगु धकाः क्वःछिनातःगु नेवाः संकिपा  ‘हिसिमति’ आः धाःसा मक्यनीगु जूगु दु ।

पूर्णकाजी ज्यापुं दयेकूगु थ्व फिल्मय् निकि महर्जन व योगेन ज्यापुया मेनरोल दु ।

अथेहे तुं वंगु फागुन २९ गते यलया गुण सिनेमाय् क्वःछिना तःगु  ‘एकसे एक’ संकिपा नं क्यनेज्या मजुल । बासु शाहीया निर्देशनय् दयेकूगु थ्व फिल्म नांजाःम्ह संगीतकार रत्न बेहोशीयात आर्थिक ग्वाहालि यायेया निंतिं शो जुइत्यंगु खः।

अथेहे तुं निर्देशक बासु शाहीया ‘बहिदार बाबु’ नांयागु फिल्मया शुटिंग नं दिकुगु दु ।

कोरोनापाखे सुरक्षित जुइत मेमेगु संकिपाया नं शुटिंग दिकाहःगुलिं थःम्हेसिनं नं शुटिंग दिकागु खँ निर्देशक शाहीं कनादिल ।

अथेहे तुं प्रदर्शनया तयारीइ थ्यनाच्वंगु  रामकृष्ण खडगीया ‘कर्म’, अमृतचन्द्र श्रेष्ठया ‘घोषक’, कलाकारं निर्देशक जूम्ह पल्पसा डंगोलया ‘ब्याहा यानागु लच्छि मदुनि’ व निर्देशक प्रदिप खडगीया बहुभाषी व बीग बजेट फिल्म ‘च्वापुफय्’थेंज्याःगु   नेवाः संकिपाया ल्यंदनिगु ज्या पूवंकेत ई काइगु जुगुलिं  क्यनेज्याय् नं लिच्वः लाइगु जूगु दु ।

कोरोना भाइरस संक्रमणया हुनिं किपू नगरपालिकां ग्वसाः ग्वःगु किपू चिहासंकिपा कासा नं लिज्याःगु दु ।

किपूया इतिहास, सामाजिक धार्मिक पक्षयात कःघानाः समग्र किपूया म्हसीका न्ह्यब्वयेगु ताःतुना न्ह्याकूगु उगु चिहासंकिपा कासाय् संकिपा दुतिनेगु ई फागुन मसान्ततक तयातःगु खःसां आः थ्व लिछ्याना २०७७ बैशाख मसान्त तक याःगु दु ।

Categorized in कला