zero media family planning adv

नेवाः युट्युबया न्हापांगु बुदिंया लसता खँ

नेवा: अनलाइन न्युज | २०७६ पौष १०, बिहिबार १२:४५:४९

न्ह्यखँ

नेवाः भासा, कला, साहित्य, संगित, सभ्यता, सँस्कृति, जात्रा पर्व व संस्कारयात समृद्ध यायेत झी पुस्तां यक्व हे योगदान याना थकुगु दु । नेपाःया राज्यसत्ताय् नेवाःतय्गु उपस्थिति व पहुच म्हो जुयावंगु अवस्थाय् नं नेपाः देय्या साँस्कृतिक म्हसिका कथं झीगु पुर्खां त्वःता थकुगु धरोहरयात राज्यं नाला कयावयाच्वंगु दु । नेपाःया राजनीतिक इतिहासयात लिफ तुला स्वयेबले नेवाः बिरोधि शासन व्यवस्थाया खायुगु ब्व नं झीसं स्वयेखं । उगु इलय् झी अग्रजपिसं राज्यया कोपन भाजनय् लायेमाःसां पत्र पत्रिका सफु, साहित्य सम्मेलन दबु प्याखँ, गीत संगित भजन अले आधुनिक संगितया माध्यमत छ्यलाः नेवाः जुयाया गौरब म्वाकादिल । नेपाःया ताःहाकःगु राजनीतिक आन्दोलनय् झी नेवाःतय्गु योगदान नं उतिकं हे दु । थौं लोकतान्त्रिक गणतन्त्र नेपाःया नागरिक जुयाः म्वायेखनाच्वंगु इलय् बिश्वय् उपलब्ध दुगु प्रविधियात छ्यलाः झी ह्योने वनेफुसा जक झी पुर्खाया धरोहर म्वाकातयेफइ, झीगु जातिय गौरब म्वाकातयेफइ । गथे म्हिगः झीसं एफ एम छ्यला अन लिपा अनलाइन पत्रिकायात नालाकयाः थौं सामाजिक सञ्जालया प्रबिधि छ्यलेगु आवश्यकता दु, अथे हे युट्युबयात छ्यलाः वनेगु आवश्यकता दु । थ्व हे खँ मनन यासें साधन स्रोत प्रविधिया ज्ञान आदिया मगामचा वास्ता मयासे एडजोन प्रालिपाखें ने.सं. ११३९ थिंलाथ्व द्वितिया (२०७५ मंसिर २३ गते) सार्वजनिक ज्याभ्mवलय् नेवाः युट्युब न्ह्याःगु घोषणा यानागु खः । यक्व हे कमी कमजोरी दु जुइ, तर थौं नेवाः युट्युब न्ह्याकागु दच्छि फुत । छिकपिनिगु साथ समर्थन व ग्वाहालिं यानाः थ्व सम्भब जूगु खः । थौं नेवाः युट्युब दच्छि क्यंगु लसता ज्याभ्mवः ग्वसाः ग्वयाच्वनाबले नेवाः युट्युबं आ दिपा कायेमाःगु स्थिति वइमखुत व अझ धिसिलाक्क न्ह्याइ धकाः घोषणा यानाच्वना ।

नेवाः युट्युब न्ह्याकागुया उद्देश्य  

नेवाःत सभ्य, उन्नत व सिर्जनशिल जाति खः । थौंकन्हय् हलिं न्यंक न्यनाच्वंपिं नेवाःतय्गु भासा, कला साहित्य सभ्यता व सँस्कृतियात नालाः थःगु म्हसिका म्वाकातयेगु तःधंगु हाथ्या वयाच्वंगु दु । नेवाः भावना दयां नं माः कथंया सामाग्री व लकस मन्त धाःसा उगु भावना नं तनावनी, नेवाः म्हसिका नं हुयावनी । सामाजिक सञ्जालं हलिंन्यकया मनूतय्गु दत्थुइ स्वापू तयाः थवं थवय् थःगु अभिब्यक्ति तयेगु व थीथी कथंया अन्तरक्रिया यायेगु अवसर ब्यूगु दु । थुकिइ नं भिडियो दकसिबे प्रभावकारी माध्यम खः । भिडियोया माध्यमं सः व संकिपा नितां न्ह्यब्वये फइ । सफु व पत्रिकाया माध्यमं न्ह्यब्वये मफुगु हलंज्वलंत न्ह्यब्वयेफइ, अझ मालधाःसा सफु पत्रिका व किपायात नं थुकिइ दुथ्याके फइ । फिल्म, म्युजिक भिडियो, प्रवचन, अन्तरवार्ता, टिभी सो, डकुमेन्ट्री, अडियो बुक आदि सकतां हे युट्युबया भिडियो मार्पmत न्ह्यब्वयेगु जुइ धुंकुगु इलय् नेवाःत थुकिइ ल्युने लानाच्वने मज्यु, थुकियात फयाफछि छ्यलेगु हे नेवाः युट्युबया उद्देश्य खः ।

चिहाकल धायेगुसा नेवाः युट्युबया मू आज्जु भिडियो पत्रकारिता खः । गुगु माध्यमं नेवाः व्यक्तित्व, नेवाः समाज, नेवाः म्हसीका, नेवाः संस्कृति, नेवाः परम्परा, नेवाः कलाक्षेत्र, नेवाः संकिपा लिसें नेवाः आन्दोलनयात थपू यानाः यंकेगु खः । थ्व आज्जु निरन्तर रुपं न्ह्यानाच्वनी । 

कःघानागु विषयबस्तु

थ्व दच्छिया दुने नेवाः युट्युबय् गुकथं भिडियोत अपलोड यायेमाःगु खः, उकथं यायेफूगु मदुनि । अथेखयां नं आःतकया दुने अथे धैगु दच्छिया दुने १६० गू भिडियोत अपलोड जूगु दु । गुकी चिहासंकिपा न्यागू अपलोड जूगु दुसा अथेहे म्यूजिक भिडियो न्यागू, व्यक्ति–व्यक्तित्व न्यागू, साहित्यिक ज्याझ्वः प्यंगू, म्हसीका ज्याझ्वः खुगू, नेपालभाषा ज्याझ्वः च्यागू, जिगु बाखँ स्वंगू, थ्वलिसें समसामयिक घटनायात कयाः दयेकूगु खँल्हाबल्हा, रिपोर्टिङ्ग, घटनाक्रम नापं यानाः १६० गू भिडियो थ्यंगु दु । 

नेवाः यूट्युब दुने अप्वः धयाथें विषयवस्तुनाप केन्द्रीत ज्याझ्वः दयेकेगु आज्जु खःसां नं थ्व दच्छिया दुने थ्व आज्जुसिबें बिस्कं तत्कालीन समसामयिक विषययात कयाः ज्याझ्वः दयेकाः भिडियो अपलोड याःगु दु ।

गतिबिधि

नेवाः युट्युबया ग्वसालय् जूगु थीथी गतिबिधि थुकथं जुल ।

क) नेवाः युट्युबया उलेज्या

ख) नेवाः युट्युबय् भाजु आर्यम नकःमिया निर्देशनया चिहा संकिपा “बच”ं या प्रिमियर 

ग) नेवाः युट्युब सच्छिन्हु क्यंगु लसता ज्याभ्mवः

घ) चिहा संकिपा नखःलय् नेवाः युट्युबया न्ह्यब्वया प्यंगु चिहा संकिपात दुथ्याकागु

ङ) नेपाल भासा टाइम्स चिहा संकिपा कासा ११३९ य् नेवाः युट्युबपाखें ब्वति काःगु स्वंगु चिहा संकिपाया 

   प्रिभ्यु व च्वमि, कलाकार व प्राबिधिक ग्वाहालिमिपिन्त सुभाय् देछा ज्याभ्mवः । 

उपलब्धि

क) नेवाः युट्युब पेयबल जुइत ताःलागु जुल 

ख) च्यानलया भ्युअर्स १,०५,१६२ व भिडियो स्वःगु ई २,९९,८४३ मिनेट व सब्सक्राइबर थ्यंमथ्यं १६००

   थ्यंगु दु ।

ख) नेपाल भासा टाइम्स चिहा संकिपा कासा ११३९य् नेवाः युट्युबया न्ह्यब्वया चिहा संकिपा 

   “ध्वः छध्वः रेखां क्यूगु” न्हाप लायेत ताःलागु जुल । 

आर्थिक पक्ष

 नेवाः युट्युबया आर्थिक पक्ष सबल मजुनी । च्यानल पेयबल जुल धैगुलिं आर्थिक सबलिकरणयात संकेत याइगु मखु । थ्व नं पत्रकारिताया न्हूगु ख्यः जूगुलिं आर्थिक पक्षय् तिबः जुइगु माध्यम धैगु थीथी संस्था नाप सहकार्य व बिज्ञापन हे खः । थुगु पक्षय् माक्व ध्यान बिइफुगु अवस्था मजुनि । नेवाः यूट्युबय् आःतक ब्यावसायिक रुपं १७ वडा ज्याकुथि, इन्द्रजात्रा व्यवस्थापन समिति व सेतो मच्छिन्द्रनाथ ब्यवस्थापन समितिपाखें ब्यावसायिक विज्ञापन कायेत ताःलाःगु दु । 

वःगु सुझाबत

क) मनोरञ्जनात्मक ज्याभ्mवःत अप्वयेकेमाःगु

ख) युवा पुस्तायात ध्यानय् तयाः ज्याभ्mवःत माःगु

ग) थीथी घटनाय् नेवाःतय्गु साझा अवधारणा दयेकेगु ज्याय् तिबः जुइगु कार्यक्रम दयेकेमाःगुु

घ) समसामयिक राजनीतिक घटनां नेवाःतय्त लाइगु लिच्वः छु गथे जुइ धैगु कनेगु ज्याभ्mवः न्ह्यब्वयेमाःगु

ङ) येँया ज्याभ्mवः जक अप्व कःघाना च्वंगुयात सुधार यानाः नेवाःत दुगु दक्व लागा कःघायेमाःगु

च) स्वनिगः पिनेया लागा व अनया साँस्कृतिक विशेषता कःघायेमाःगु

लिपाया योजना

नेवाः यूट्युबयात झीगु आज्जु कथं पूवंकेगु नितिं यूट्युबय् ज्या सनेगु नितिं दक्ष ज्यासनामिपिं तयाः यंकेगु व न्हियान्हिथं छुं नं छुं खँ झीगु दुने लाःगु विषयवस्तुयात कयाः  ज्याझ्वः दयेकाः यूट्युबय् अपलोड यायेगु खः । 

नेवाः यूट्युब न्ह्याकेगु नितिं तत्काल झीके गुलि जनशक्ति व गुलि यायेफूगु खः उलि हे शक्तियात ज्वनाः ज्या न्ह्याकेगु व आर्थिक रुपं आर्थिक सवलताया नितिं बजार व्यवस्थापन यायेगु खः ।   

 

 

दुजःपिं

सुजिब बज्राचार्य कजि

देवदास मानन्धरदुजः

राजिब राजोपाध्याय दुजः

ललेन्द्र शाक्य दुजः

योबन शाक्य दुजः

उमेश स्थापित दुजः

लिसा खँ

नेवाः युट्युबया साधन स्रोतया सिमितताय् ज्या यानाच्वनागु थुइका दिइ व सुझाबत वःगु कार्यान्वयन यायेत ई कायेफुगु खँ इनाप यानाच्वना । छिकपिनिगु साथ समर्थन ग्वाहालि दया हे च्वनिगु भलसा कयाच्वना । अले नेवाः युट्युबय् अपलोड जुइगु ज्याभ्mवः स्वयेगु त्वःमफिकेगु नितिं सब्स्क्रइब यानादिइत, लाइक यानादिइत व सेयर यानादिइत नं सकलसित इनाप यानाच्वना । नेवाः यु ट्युब झी सकसियागु युट्युब सुभाय् ।

( नेवाः युट्युबया दुजः उमेश स्थापितं म्हिगः ११४० थिंला गाः चरे नेवाः युट्युबया न्हपांगु बुन्हिंया लसताय् जुगु ज्याझ्वलय् न्ह्यब्वःगु खँ गथे खः अथे हे न्ह्यब्वःया – स.)

 

Categorized in बिचा: