2565 buddha Jayanti ADV

नेवाः पत्रकार राष्ट्रिय दबूपाखें विचाः हायेकल

नेवा: अनलाइन न्युज – विजयरत्न | २०७८ जेठ २३, आइतबार १२:२१:०१

नेवाः पत्रकार राष्ट्रिय दबू केन्द्रपाखें कोविद १९या निगूगु लहरया हुनिं मदुपिं पत्रकारपिनि परिवारया जःपिन्त लुमंका बिचाः हायकेगु ज्या पत्रकारपिं मुना  शनिवाः भर्चुअल माध्यमपाखें ज्याझ्वः यागु दु । दबूया छ्याञ्जे केके मानन्धरं न्ह्याकूगु थुगु ज्याझ्वलय् दबूया मूछ्याञ्जे सुनिल महर्जनं लसकुस न्वचु तयादीगु खः । 

अथेहे नुगः खँ कनेगु झ्वलय् यलया पत्रकार गुणराज शाक्यं थः मां बेखामाया शाक्य मदुगु अवस्थाया दुःखं कःगु  भाव विभोर जुया थःगु खँ उलादिल  । थुकथं हे दबूया पुलांम्ह केन्द्रीय मूछ्यान्जे उदेन न्हूसायमिं थौंया थ्व विषम् परिस्थितिइ दबूपाखें थौंया अवस्थाय् पत्रकारपिन्त गुकथं तिबः बिइफइ थ्व विषयलय् ध्यान बिया तिबः बिइगु ज्या न्ह्योने न्ह्याका यंकल धाःसा दबू दु धैगु आभाष जुइगु खँ कनादिल । 

भर्चुअल ज्याझ्वलय् दबूया न्वकु रचना श्रेष्ठं थौंया थ्व दुःखद् व विषम् परिस्थितिइ नेवाः पत्रकार वर्गया मदुपिं जःपिं सुखावती भूवनय् बास लायेमा धकाः कामना याना छेँजःपिन्त धैर्य धारण यायेफयेमा धकाः आशिका नं यानादीगु खः । थुगु ज्याझ्वलय् दबूया केन्द्रीय दांभरिं सुरेन्द्रभक्त श्रेष्ठं नं थःगु खँ तयादीगु खःसा वयकलं थःगु खँया झ्वलय् थौंया थ्व विषम् परिस्थितिइ आपतविपतय् लानाच्वंपिं पत्रकारपिन्त तिबः बिइत छगू कमिति दयेकागु जानकारी बियादीगु खः । नापं वयकलं सुयातं तिबः आवश्यकपिन्सं कमितियात जानकारी बियादीत नं इनाप याःगु दु । 

उगु ज्याझ्वलय्  दबूया नायः सुरजबीर बज्राचार्यजुं थौंया थ्व अवस्था तसकं हे दुःखदायी ई जूगुलिं झी सकलें सुरक्षित रुपं न्ह्यायमाःगु खँय् बः बियादिल । नापं वयकलं थौंया इलय् सकसिनं सकसितं गुकथं सुरक्षित यायेफइगु खः उकथं याना वनेमाःगु खँय् नं बः बिसें मदुपिं अमर जुया वनेमाः धकाः नं कामना यानादिल ।  

थुगु कोविद १९ या निगूगु लहरया  महामारीया झ्वलय् पत्रकार दबू येँ जिल्लाया नायो अर्बिन्द्र मानसिंहया मां इन्द्रमाया सिं, यलया पत्रकार गुणराज शाक्यया मां बेखामाया शाक्य, शरणगोपाल डंगोलया मां श्रीमाया डंगोल, यलया पत्रकार राजेन्द्र शाक्यया मां व अबु, म्येहालामि व सन्चारकःमि रिता महर्जनया किजा ई. कबिन्द्र महर्जन व पुलांम्ह पत्रकार सुशिलवीरसिंह कंसाकारपिं कोविदया हुनिं मदुगु खः । नापं थुगु भर्चुअल विचाः मुज्याय् माणिक लाल श्रेष्ठ, इन्द्र माली, प्रेमध्वज प्रधान, रपापतिराज शर्मा, लक्ष्मण राजवंशी, मोहनसुन्दर श्रेष्ठ लगायत नेपालभाषा ख्यःयात थकया वनेत थःगु जीवनकालय् अहम् भूमिका म्हितादीपिन्त नं विचाः हायका लुमंकेगु याःगु खः ।

Categorized in नेवाः