नेवाः न्ह्यलुवाः डा. पुष्पराज राजकर्णिकारया आत्मकथा पीदन
नेवा: अनलाइन न्युज – Bijay Ratna | २०७८ पौष ६, मंगलबार १५:५३:१३
नेवाः न्ह्यलुवाः, नियात्राकार, समीक्षक व साहित्यकार डा. पुष्पराज राजकर्णिकारं थःगु आत्मकथा कथं च्वयादीगु ‘जीवन खसुइ’ नांयागु सफू पीदंगु दु ।
यलया पुच्वय् च्वंगु नेपाल हृदयरोग निवारण प्रतिष्ठानय् जूगु छगू ज्याझ्वलय् डा. पुष्पराज राजकर्णिकारया आत्मकथा ‘जीवन खसुइ’ सफूया पितब्वज्या संघीय मामिला तथा प्रशासनमन्त्री राजेन्द्र श्रेष्ठं यानादीगु खः ।
नेपालभाषा मंकाः खलःया संस्थापक नायः छत्रबहादुर कायस्थया सभापतित्वय् जूगु उगु ज्याझ्वलय् सफूया च्वमि डा. पुष्पराज राजकर्णिकारं थःगु न्हूगु सफूया विषयस न्वःवासे सफूया बारे खँ कनादीगु खः।
डा. राजकर्णिकार नेपालभाषा एकेदेमिया दांभरी नं खःसा उगु ज्याझ्वलय् नेपालभाषा एकेदेमीया सदस्य सचिव लिसें नेवाः न्ह्यलुवाः आख्यानकार मल्ल के सुन्दर, नेवाः देय् दबुया नायः नरेश ताम्राकार, नेपाल हृदयरोग निवारण प्रतिष्ठानया नायः बालकृष्ण तुलाधर, समालोचक पूर्णकाजी ताम्राकार, कवि भगतदास श्रेष्ठ, कुतः पिकाकया नायः विमल ताम्राकारं पितब्वज्या जूगु सफूयात कया थःथःगु नुगःखँ तयादीगु खः ।
Categorized in कला