nepal investment baink

नेवाः नांया संस्था दर्ता जुइगु

नेवा: अनलाइन न्युज | २०७९ माघ २०, शुक्रबार १४:११:२९

न्हापा लितछ्वःगु संस्था नं दर्ता यायेत सीडीओया निर्देशन

नेवाः नां दूगु संस्था दर्ता यायेत येँ जिल्लाया सीडीओ ज्याकुथि सहमत जूगु दु ।

बुधवाः बागमती प्रदेशया सांसद शैलेन्द्र बज्राचार्यया नेतृत्वय् वंगु पुचःलिसे खँ ल्हासें येँ जिल्लाया सीडीओ घनश्याम उपाध्यायं नेवाः खँग्वः तयाहःगु संस्था नं दर्ता यायेगु खँ कनादीगु खः ।

खँल्हाबल्हाय् सहायक सीडीओ देवी पाण्डे खत्री नं दीगु खः । सीडीओ उपाध्यायं नेवाः लगायत नेपाः दुनेया न्ह्यागु भासं नां तया हःसां अज्याःगु संस्था दर्ता यायेगु खँ कनादीगु खः । लिसें वय्कलं संस्था दर्ता यायेगु फाँटय् च्वनीम्ह अधिकृत खड्ग श्रेष्ठयात खस नेपाली बाहेक मेमेगु भासं वःगु संस्था नं दर्ता यानाबिइत निर्देशन बियादिल ।

थ्व स्वयां न्ह्यः सीडीओपाखें नेवाः नां तयाहःगु संस्था दर्ता मयाःसे लितछ्वयाहःगु खः । लिपांगु इलय् ‘सभ्यता नेपाः’ नांगु संस्थायात नेपाः खँग्वः लिकयाः ‘नेपाल’ ततया हजि धकाः दर्ता मयाःसे लितछ्वयाहःगु खः ।

थ्वहे विषयस बुधवाः सांसद शैलेन्द्र बज्राचार्यलिसें नेपालभाषा टाइम्सया सम्पादक सुरेश किरण मानन्धर व बजार व्यवस्थापक राजेन्द्र नीलःपिं सीडीओ ज्याकुथिइ खँ ल्हाःवंगु खःसा उगु इलय् सीडीओ उपाध्यायं ‘सम्पदा नेपाः’ लगायत उकुन्हुु लितछ्वयाहःगु मेमेगु संस्था नं दर्ता यायेगु बचं बियादीगु खः ।

वय्कलं संस्थाया नां अनुवाद मयाःसे बरु विधानय् प्रस्तावनाय् संस्थाया नांया अर्थ खुलेजुइक छझ्वः खस नेपाली भासं तयाहयेत नं इनाप यानादीगु दु ।

(नेपालभाषा टाइम्स न्हिपौ)

Categorized in पत्रपत्रिका