nepal investment baink

नेवाः नखः न्यूयोर्कया न्हूम्ह नायः डा. नरेशमान शाक्य

नेवा: अनलाइन न्युज – विजयरत्न | ने.सं. ११४४ पोहेलागा त्रयोदसी

नेवाः नखः न्यूयोर्कया जुमया माध्यमं जूगु तःमुन्ज्याँ  न्हूम्ह नायः कथं डा. नरेशमान शाक्ययात ल्यःगु दु ।

तःमुन्ज्याया बन्द सत्रय्, नेवाः नखः न्यूयोर्कया प्यक्वःगु ल्यज्या निर्वाचन आयुक्त विष्णुमान प्रधानं विधिपूर्वक क्वचायेकादीगु खः ।

न्हूगु ज्यासना पुचलय् नायः डा. नरेशमान शाक्यया नापनापं न्हापांम्ह न्वकू श्रुति अमात्य, निम्हम्ह न्वकू महेन्द्रकुमार वज्राचार्य, मूछ्यान्जे तुलसी नारायण चित्रकार, छ्यान्जे अनित श्रेष्ठ, दांभरिं सलोनी वन्त श्रेष्ठ व ल्यू दांभरिं मेनी श्रेष्ठपिन्त निर्विरोध कथं ल्यःगु खःसा ज्यासना पुचःया दुजलय् दिपक कुमार प्रधान, नम्रता प्रधान, राधिका श्रेष्ठ, किरण कुमार रन्जित, शोभना शाक्य, उजिला प्रधान, राजिव बाताजु व सबिना शाक्यपिं निर्विरोध ल्यःगु खः ।

उगु तःमुँज्यां विष्णुमान प्रधान व महेन्द्रवीर वज्राचार्ययात सल्लाहकार कथं दुथ्याकूगु दु ।

ल्यज्या जुइसिबें न्ह्यः तत्कालिन मूछ्यान्जे तुलसी नारायण चित्रकारं जूम (zoom) या माध्यमं न्ह्याकूगु तःमुँज्याय् नखःया नायः महेन्द्रवीर बज्राचार्य मुँज्या नायः जुयादीगु खः । नखःया पुलांम्ह नायः व सल्लाहकार विष्णुमान प्रधान मूपाहाँ कथं झायादीगु खः ।
उगु मुँज्याय् झायादीपिं सकसितं न्हापांम्ह न्वकू डा. नरेशमान शाक्यं लसकुस यानादीगु खः ।

ज्याझ्वःया सुरुइ हे झायादीपिं दुजःतय्‌गु सहभागिताया दर्ताया ज्या तत्कालिन  छ्यान्जे अनित श्रेष्ठ व ल्यूदांभरिं मेनी श्रेष्ठं यानादीगु खः । ज्याझ्वलय् झायादीपिं सकल दुजःपिन्सं थःथःगु म्हसीका बियादीगु खः ।

खुल्ला सत्रय्, मूछ्यान्जे तुलसी नारायण चित्रकारं संस्थाया निदँया कार्य प्रगति विवरण व संस्थां याःगु व जूगु ज्याखँत न्ह्यब्वयादीगु खःसा दांभरि सलोनी वन्त श्रेष्ठं आर्थिक प्रतिवेदन न्ह्यब्वयादीगु खः । न्ह्यब्वःगु उगु प्रतिवेदन मुँज्यां सर्वसम्मत कथं पारित याःगु खः ।

बन्द सत्रय्, नायः महेन्द्रवीर बज्राचार्यं न्हू ल्यःपिं ज्यासना पुचःयात कार्यकाल ताःलायेमा धकाः भिन्तुना बियादीगु खःसा मुँज्याय् झायादीपिं सकल दुजःपिन्त वय्‌कःपिनि ग्वाहालि, तिबः व न्ह्यथने बहः जुइकथं झायादीगुलिं दुनुगलं सुभाय् बियादीगु खः । वय्‌‌कलं थःगु कार्यकालय् नखःया थीथी ज्याझ्वलय् ग्वाहालि यानादीपिं सकल दुजः, संघसंस्था, मिसामिजं, स्वयंसेवी व ग्वाहालिमिपिन्त विशेष सुभाय् नं बियादिल ।  

नेवाः कला संस्कृतिया ख्यलय् दक्व समुदायलिसे सहकार्य यायां संस्थायात न्ह्यज्याकेगु व न्हू प्रविधि छ्यलाः भावी ज्याझ्वःत न्ह्याके माःगुलि बः बियाः न्हूम्ह नायः डा. नरेशमान शाक्यं मुँज्या क्वचायेकादीगु खः ।

मेपिं पदाधिकारी व दुजःपिन्सं नं थःथःपिनि प्रतिबद्धता प्वंकादीगु दु ।

नेवाः नखः न्यूयोर्क नेवाः परम्परा, कला व तजिलजिया संरक्षण, प्रवर्द्धन व न्हू पुस्ताय् पुस्तान्तरणया निंतिं सन् २०११ स पलिस्था जूगु संस्था खः । थुगु संस्थां समुदायया हितया निंतिं थीथी ज्याझ्वःत न्ह्याकावं वयाच्वंगु दु ।

Categorized in नेवाः