Newa Ekata Diwas Gosthi Adv

नेवाः जातीय संघसंस्था मुंकाः महासंघ जुइगु

नेवा: अनलाइन न्युज – विजयरत्न | २०७७ मङ्सिर ११, बिहिबार १२:२८:३२

नेवाः समाज दुनेया थीथी जातीय संगठनत मुंकाः मंकाः संगठनया रुपं नेवाः जातीय महासंघ गठन याइगु जूगु दु ।  

बुद्धवाः येँय् क्वचाःगु थीथी नेवाः जातीय संगठनत मुनाः नेवाः जातीय महासंघ गठन यायेगु निर्णय याःगु खः ।

उगु  मुनां जातीय संगठनतय्सं ताः इलंनिसें थीथी समस्या फयावःगु व अज्याःगु समस्या ज्यंकेत दक्वं संगठित जुयाः न्ह्याःवनेमाःगु लिच्वः पिकासें महासंघ गठन यायेगु निर्णय याःगु खः ।

ज्याझ्वलय् गोष्ठी कजि लिसें नेपाल खड्गी सेवा समितिया संरक्षक मनोज नेवाः खड्गीं नेवाः जातीय संगठनया एकता व सहकार्यया विषयस अवधारणा पौ न्ह्यब्वयादिलसा ज्याझ्वलय् कजि खड्गीं न्हूदँया र्‍याली, नेवाः एकता दिवस, गुथि विधेयकया आन्दोलन लिसें थीथी अभियानय् जातीय संगठनया महत्वपूर्ण भूमिका दइगु तर उगु भूमिकाया मूल्याङ्कन धाःसा बाँलाक गबलें हे मजू धकाः धयादिल ।

‘थीथी नेवाः गतिविधि व अभियानय् जातीय संगठनं हे बाजं थाना बीमाःगु, ब्वति क्यना बीमाःगु, तर झी न्ह्याब्लें छ्यंग्वलय् हे जक सिमित जुल,’ खड्गीं धयादिल ।

अवधारणा पतिइ जातीय महासंघ गठन यासें नेवाः समाजया परम्परागत पेशाया आधुनिकीकरण यासें समाजया आर्थिक उन्नतीइ योगदान बीगुया लिसें जातीय समाजतय् भवन दयेकेगु तक्कया उद्देश्य प्रस्ताव यानातःगु दु ।

येँ महानगरपालिकाया प्रमुख विद्यासुन्दर शाक्यं जातीय संगठनया एकताया विषय लसतां जाःगु धासें समाज, सम्पदा, संस्कृतिया संरक्षणय् सकलें जायेत इनाप यानादिल ।
स्थानीय भाषा, कला, संस्कृति, सम्पदाया संरक्षणय् येँ महानगरपालिकाया न्ह्याबलें साथ दइगु प्रतिवद्धता महानगर प्रमुख शाक्यं प्वंकादिल ।

येँ महानगरपालिका सम्पदा तथा पर्यटन समितिया कजि लिसें येँ महानगरपालिका १८ वडाया वडाध्यक्ष न्हुछेकाजी महर्जनं नेवाः जातीय संगठनयात नेतृत्व वर्गं प्रयोग जक यानावःगु धयादिल । गुथिया स्वामित्व कयातःगु जातीय संगठनं हे गुथि विधेयकया आन्दोलनया नेतृत्व याःगु खःसा आन्दोलन निष्कर्षय् थ्यनी धकाः महर्जनं धयादिल ।

थुगु हे मुनां महासंघ गठनया आवश्यक तयारीया ज्या न्ह्याकावनेत मनोज नेवाःया कजिसुइ ७ म्ह दुजःया नेवाः जातीय महासंघ तयारी समिति नं गठन याःगु दुसाः नखःचखलय् नेवाः समाज दुने एकरुपता हयेत थुगु हे तयारी समितिपाखें नेपाल पंंचाङ्ग निर्णायक समितिलिसे सहलह तच्वयेकेगु निर्णय नं  याःगु दु ।

Categorized in नेवाः